Mavanga 17

Pahuli na Silaasi baayeni hu musyenge a Tesalonika

1Pahuli na Silaasi baavyohili mu misyenge mya Apfipolisi na Apoloniya, na baayato hu musyenge a Tesalonika, hu bo baamoni nzo lisambulu yi Bayudaayo. 2We bu huli ipfu hya nde, Pahuli ayeni huuna. Mu basaba batatu ba baalandisini, nde amohi na Bayudaayo mu ma baasonehe ma Ngidi. 3Mu mambu ma nde hakabindula bo, nde akamwese, we bu mo mali. Masiya afwana umaamono pasi, na usuuha mu babaakwa. Nde akaleele bo: «Yisu mo wu me ndi mu unzaabisa benu wu, nde ni Masiya.» 4Mwana a baatu bakima ŋa hati la bo, baasiidi hiitu mu mambu momaana, na baabambini na Pahuli na Silaasi. Buuna ni bu hwasiidi kabu lilinene la bisu Ngeleke ba baakayusa Nzambi, na bakaasu babalahi ba likinzu, baayapfuutana na bo. 5Ka Bayudaayo bakima baamoni nyengi. Bo baakuukihi mwa biyahudi bi byaba mu manzila, na baatumi bo mu usa muyungisi na kele mutso musyenge woosi. Mu mawasa, bo baayapalila muutu mumosi nga nduhi a Yasoni hu nzo a nde, mu usaha Pahuli na Silaasi, mana babita bo ŋa kuungi la baatu. 6Ka bu baavelimono bo, bo baakangi Yasoni na bambaahi ba nde bakima ba imiinu. Na baabiti bo ŋa busu bu banzonzi ba musyenge. Bo baakafulaha: «Baatu mobaniba baamiikotese muyungisi mu toto yoosi, ka bunuubu, bo bamiiyato nate huni! 7Ka Yasoni ni wu miiyaka bo mu nzo a nde. Baatu mobaniba boosi a bali mu ukiinza mikele mya Pfumu Kayisaali ve. Bo bali mu uleele ti, huli na pfumu mukima nga nduhi Yisu.» 8Maambu momaana maasyelisi konge a baatu mitima, napa banzonzi ba musyenge. 9Ni mu buuna, bakuutu baakaambi bilangi huli Yasoni na bambaahi ba nde, mana banyahula bo.

Baayaki Pahuli na Silaasi hu musyenge a Beere

10Bu busi bwayili, baana ba ngu baatsindihi Pahuli na Silaasi hu musyenge a Beere. Bu baayato huuna, bo baayakoto hu nzo lisambulu yi Bayudaayo. 11Bayudaayo ba hu Beere baaba na matsimi mamabwe ti, ba bali hu musyenge a Tesalonika, baayaki mambu ma Nzambi mu bunyanga bu mutima. Pasi ilumbu, bo baakataanga ma baasonehe ma Ngidi, mu utsikaha tso ma baakayabisa bo, mali ma mbuli. 12Buuna, babalahi mu bo baasiidi hiitu. Na ŋa hati li Bangeleke, bakaasu ba likinzu na babahala babalahi ka, baasiidi hiitu. 13Ka Bayudaayo ba hu Tesalonika, baayuhi ti Pahuli aka mu ubwelongese mambu ma Nzambi hu Beere. Bo baayeni huuna, mu uyatuumbasa na usa kele ŋa hati la konge a baatu. 14Buuna mu mawasa, baana ba ngu baabatisi Pahuli hu tsyelo mubu mu uvolo likuumbi. Ka Silaasi na Timoteho baasaali hu Beere. 15Ba baakabita Pahuli, baayeni na nde nate hu musyenge a Atenesi. Titswene, mu tumili a Pahuli, bo baafutihi hu Beere, mana baleele Silaasi na Timoteho bayabiisala nde mu mawasa hu musyenge mowuna.

Pahuli li mu ulongese Musamu wu Mubwe hu Atenesi

16Bu Pahuli hakakeele Silaasi na Timoteho hu Atenesi, nde aba na inganganyi mu umono buni bifwita bibilahi byaba mu musyenge mowuna mu pasi mbuha. 17Nde akasobosono matsimi na Bayudaayo mu nzo lisambulu yi Bayudaayo, napa bakima ba baakakinza Nzambi. Pasi ilumbu, nde akamoho ka itwadi na ba baakaba mu mataandala ma mikuungi. 18Ni huuna, biyedi banga kumbu Bayepikule na Basotoyise#17.18 Bayepikule na Basotoyise: baatu ba baakangama mu makinya ma nyutu, na baatu bakima ba baakangama mu matsimi ma kwamisili a nyutu na ma mukonono., baakayatoyo na nde. Bana baakafuula: «Litodo molinili hima lili mu uleele hya tsiki?» Baatu bakima ti: «Nde we wu li mulongisi a mambu ma binzanzambi bya byenyi». Bo baafutili buuna, mu toni ati, bo baakayuha Pahuli mu uyabisa tsangu yimbwe ya Yisu na ya tsuhili a nde mu babaakwa. 19Buuna, bo baavoli Pahuli na ubita nde hu isyelo hya Ayelopaze hu banzonzi baakapfutana mu pfuundu a bo. Na baafuuli nde: «Bisu utwala uyaba pila a ndongisili yi nyatihi yi we li mu ulongese baatu? 20We li mu uyabisa mu matswi ma bisu misamu mi bisu laaveletsikaha, na bisu litondi uyaba mbindulili a myo.» 21Bo baavondi mbindulili moyiina, mu toni ati, bisu musyenge a Atenesi boosi, na byenyi bi byayidi ŋa hati la bo, baakavyoso tangu a bo yoosi ndulu mu ubaatoyo. Bo baakavyoso tangu a bo mu ubaatsotso na ubaayuha mambu ma manyatihi.

Ikumbu hya Pahuli hu isyelo hya Ayelopaze

22Pahuli atelimi ŋa hati la pfuundu banzonzi na aleeli: «Benu bisu Atenesi, me ndi mu umono mu moosi ti benu laakangama mu inzambi hya benu. 23Mu toni ati, me ataangila musyenge a benu, na me atsikaha bifwita bya benu. Mu hati bifwita mobiina, me atsoolo mwa ibanga imosi hya ndongisili, hi baasonehe bunuubu: “Huli nzambi wu baaveleyaba.” Wu benu libaakiinza hwavele uyaba, ni nde me miinzanzaabisa benu. 24Nzambi a Pungu wu avanga tsi, na byosi bi bili mu yo, nde ni wu li Pfumu a yulu na toto. Na nde a habatsahala mu bibanga bi baatunga mu myoho mya baatu ve. 25Nde a hali na nzala ati basalila nde mu myoho mya baatu ve, we nde wu li na nzala isiha. Mu toni ati, nde ni wu ubaava monyi huli boosi, muvumu na bina byosi. 26Ndulu mu muutu mumosi, nde avangi mabuli moosi, mana mo matsahala mu toto yoosi. Nde akese huli baatu matangu, na mandilu ma bitanzi ma bo baafwana ubaatsahala. 27Nzambi avangi bo, mana bo basaha nde, na peleve mu upeebete, bo utwala usoolo nde. Mu mbuli, Nzambi a hali lala tso na mumosi mu bisu ve. 28Mu toni ati:

“Ni mu nde, bisu lili monyi,

libanyingama na lili ba lili.”

Maana ni ma basonihi bakima ba benu baaleeli:

“Bisu ka lili ba ibandu hya Nzambi.”

29Ubaamono ti bisu ni ba ibandu hya Nzambi, bisu utwala uba na tsimi ve, ti Nzambi ifwani hi ifwita hya wolo. Tso nde ifwani hi ifwita hi itali hya talu, buve hi mamanya ma baavanga mu bungeele na matsimi ma bumuutu ve. 30Kaahu Nzambi asiidi kolo-kolo mu maana moosi, bu baatu baakaveleyaba ma baakavanga. Ka loloyi, nde li mu uyabisa huli boosi, mu mambuha moosi, mu unyongo mu mavanga ma bo, na usobo mbiili a bo. 31Nzambi amiisoolo ilumbu hi nde hutsundasa baatu boosi mu butsiitsa, mu nzila a muutu wu nde hamiisoolo. Nde amiimwese imbangi huli baatu boosi, ti muutu mowuna na ali, bu hamiisuula nde ŋa hati la babaakwa.»

32Bu bo baayuhi ti Pahuli li mu utoyo mu tsuhili a babaakwa, bana baasyebi nde. Na bakima baaleeli: «Mu dyambu molina, bisu ka ilumbu ikima lu uyuha we.» 33Buuna Pahuli asiisi bo. 34Ka mwana a kabu limosi la baatu, baayapfuutana na nde, na baasiidi hiitu mu Yisu. Ŋa hati la bo hwaba Denisya, mumosi wa pfuundu banzonzi ba Ayelopaze, na mukaasu mumosi nduhi Damalisya, na bakima-bakima.

Currently Selected:

Mavanga 17: TSA

Highlight

Copy