2 Tesalonika 3
3
Usambila mu bisu
1Mu umana, baana ba ngu, baasambilaani mu bisu, mana mambu ma Pfumu matsamuha mu mawasa na bakiinza mo matsyelo makima, we bu bali mu ukiinza mo huli benu. 2Baasambilaani kaka mu bisu, mana bisu liyoboho ŋa busu bwa baatu ba nga bukanyi, na mavaanga ma mabi. Mu tooni ati, boosi a bali na imiinu ve. 3Ka Pfumu li nga imbuli. Nde sa ahwadisa benu na nde sa akeelese benu ŋa busu bu Muboho. 4Bisu lili na hiitu mu Pfumu ti benu lili mu usa, na luukaabwesa ma bisu lili mu utuma benu. 5Nyaha Pfumu abaabita mitima mya benu hutsyelo litondo la Nzambi. Nyaha nde abaamweese benu buni benu luuba na mukonono mutso mapasi, we bu Kristo hamweesi ifwaani.
Usala mu ifwaani hi iluumbi hya Yisu
6Baana baa ngu, mu nduhi a Pfumu a bisu Yisu Kristo, livondi benu mu utahuha na pasi nde nga bubolo, buuve nga a mbiili yi yaveleyelemene na ndongisili yi bisu laaviidi bo. 7Benu mwakulu liyabi buni benu lafwana uduukala ifwaani hya bisu. Mu tooni ati, bisu a laabeedi babolo ŋa bisu laabeedi huli benu ve. 8Bisu a laavondi pasi muutu byudya bi bungodu ve. Ka bisu laakasala, nyangu na butsuhu, hutso ikolili na munyongi, mu uveleva muutu tso mumosi, mupfuna wu ubuungala bisu. 9Ka bisu ti laabeedi na muswa wu uvondo benu. Ni ifwaani bisu laatondi umweese benu, mana benu lidukala hyo. 10Ni mu buuna, ŋa bisu laabeedi huli benu, bisu laaviidi benu tumili mo yiniiyi: «Woosi wu uveletondo usala, anyaha kaka udya.»
11Ka bisu lili mu uyuha ti bakima ŋa hati la benu, na mbiili yi yavelefwana. Bo bali hutso budwa na bo bali mu ukoto mu misamu mi myaveletala bo. 12Huli baatu mo baana, bisu lili mu uvondo na lili mu utuma bo mu nduhi a Pfumu Yisu Kristo ti, bo baafwana ubaasala taangu yoosi mu ubaha byudya. 13Ka benu, baana ba ngu, hwadaani mu ubaavanga bubwe a likolo ve.
14Tso muutu a hasiingili ma bisu lili mu utuma mutso muhanda mo wunuwu ve, tsikahaani nde na a liba likoongo na nde ve, mana nde amono tsonyi. 15Ka a livolo nde we muboho a benu ve. Syembaani nde we mwaana a ngu a beno.
Mabwehe ma tsyelele
16Nyaha Pfumu a hyenze nde mwakulu, ava benu hyenze taangu yoosi, we bu nde atoondi! Nyaha Pfumu aba na benu boosi! 17Mu kaka la me Pahuli, me ndi mu upa benu bwehe. Ni mu iliimbu mo hiina, me umbaatala mihanda mya me myosi. 18Nyaha Pfumu a bisu Yisu Kristo asyeme benu boosi!
© (Active), Wycliffe Bible Translators, Inc. All rights reserved.