Ester 1
1
Jun p'éel janal tu beeta ajaw Asuero
1Le tzicbala' j úuch tu kiinil u méektáan ajaw Asuero tu yóokol ciento veintisiete u táabal caajo'ob, líikbal India tac Etiopía, 2tu tuulum caajil Susae' ti' ca'ach u dzaamaj u jalach káanche'i'. 3Tu yóox p'éel ja'abil u ajawile', ajaw Asueroe' tu beeta jun p'éel cha'an u ti'al tuláacal u nuuquil yéetel le máaxo'ob cu yáantaj meyajo'obo', bey xan ti' u náacomo'ob u aj ba'atelo'ob j persaob yéetel j medo'ob, yéetel xan u méektáano'ob yéetel u nuuquilo'ob le táabal caajo'obo', 4chéen u ti'al u ye'esic ti'ob u ayikalil yéetel u nojochil u ajawil, u ti'al xan u ye'esic u táaj qui'ichquelemil u ajawil. Le kiinbesajo' beta'ab táancoch ja'ab, 5cu dzo'ocole' tu beetaj u láak kiinbesajile', lela' j xaanchaj siete kiino'ob, tu beetaj tu cúuchil u paakal nicte'ilo'ob jalach naj. Tuláacal le máaxo'ob caja'ano'ob ca'ach tu tuulum caajil Susae' j t'a'ano'ob, u dzuulilo'ob bey u yóotzililo'ob. 6U táancabile' jadzutzquinta'ab yéetel qui'ichquelem t'inbil nooko'ob yaan sactaqui' yaan ch'ooji', yéetel ch'ooj kaxa'anta'ac yéetel jaxbil lino jula'antaco'ob ti' x léechebo'ob plata u ca'ajo'ob joka'antaco'ob ti' qui'ichquelem ocomo'ob mármol u ca'ajo'ob, bey xan dza'an ca'ach u nu'uculo'ob je'elel beeta'ano'ob yéetel oroo, yéetel plata, u beilo'obe' táaxcuna'an yéetel yuyulqui sac tuunicho'ob cu kaab'aintic nácar, bey xan yéetel sac yéetel box mármol. 7U nu'ucul tu'ux cu t'o'oxol vinoe' beeta'ano'ob yéetel oro, jejeláas u bixil, le vino ya'ab u t'o'oxol je'el bix u yutzil ajawe'. 8Ba'ale' ajawe' tu ya'alaj ti' u nuuquilo'ob le máaxo'ob táan óoltico'ob le u'ula'abo', ma' u cóoytico'ob mix máac u yuk ya'abi', u'ula'abo'obe' u yuko'ob le buca'aj u káato'obe'. 9Bey xan Vasti u yatan ajawe' tu beeta jun p'éel noj janal ti' u yatano'ob le u'ulabilo'ob tu jalach naj ajaw Asuero.
10Tu siete kiinil le cha'ano', le ajaw jach qui'i yóol tu yo'olal le vino cu yukico', ca tu túuxtaj Mehumán, Bizta, Harbona, Bigta, Abagta, Zetar yéetel Carcas, siete xiibo'ob ti' máaxo'ob utz u tuucul le ajawo', 11u ti'al ca bisa'ac tu táane' x ajaw Vasti u dzaamaj u péet jo'ol, u ti'al ca cha'anta'ac u qui'ichpamil tumen le caajo' bey tumen le nojoch máaco'obo', tu jaajile' seten qui'ichpam ca'achi'. 12Ba'ale' x ajawe' ma' tu yóoltaj u dzo'ocbes u t'aan ajawi', le j dzaab ti'ob le máaco'ob utz u tuucul tu yo'olabo'. Ajaw túune' seten p'u'uji, bey p'uja'anilo', 13tu káat chi'itaj ti' le máaxo'ob u kaj óoltmajo'ob le ya'almaj t'aano', tumen bey suuquil ca'achi', tuláacal u ba'aluba'ob ajawe' u najmal u paaclam tzicbata'al ichil le máaxo'ob u kaj óoltmajo'ob a'almaj t'aan yéetel ba'ax no'oja'an u beeta'al. 14Ichil le máaxo'ob naadz yanilo'ob ti' ajawo' lelo'oba Carsena, Setar, Admata, Tarsis, Meres, Marsena, yéetel Memucán, siete u nucuch cajnáalilo'ob persia yéetel Media, lelo'oba' u múuch' a'almaj xiquino'ob ajaw, máaxo'ob táacpaja'ano'ob tu meeyjul u méektáano'ob le lu'umo', 15Ajawe' tu káatchi'itaj ti'ob:
Je'el bix u nu'uctic le a'almaj t'aano', ¿ba'ax u najmal c beeta'al ti' x ajaw Vasti tumen ma' tu yóoltaj u dzo'ocbes ba'ax tin túuxtaj a'albil ti' tu chi' in aj bisaj t'aano'ob?
16Tu táan le máaxo'ob tzolxiquintic le ajawo', Memucane' tu núucaj ti' ajaw: X ajaw Vastie' ma' chéen tu paj u subtal a tzicbe'enil, ba'ale' tu pajaj xan u subtal tuláacal le méekt'aano'obo', bey xan tuláacal u múuch' caajilo'ob u ajawil Asuero. 17Le ba'ax tu beeta le x ajawo' yaan u yojéelta'al tumen tuláacal le x co'olelo'obo', lelo' bíin u beet u x ma' u'uyaj t'aanilo'ob ti' u yíichamo'ob tumen yaan u ya'alico'obe': Ajaw Asueroe' tu túuxtaj t'aanbil x ajaw Vastie' ba'ale leti'e' ma' tu yóoltaj bini'. 18U yatano'ob u nuuquilo'ob Persia yéetel Media, le quéen u yojéelto'ob le ba'ax tu beeta x ajawe' yaan u tutuc chi'itico'ob yéetel u yíichamo'ob bíin u taas kex óolal yéetel chi'ichnaquil. 19Bey túuno' wa utz u yu'ubic a tzicbe'enile', beet ca ojéelta'ac jun p'éel dzíibil xotkin, ca xan p'áatac dzíibta'an ichil u ya'almaj t'aanil Persia yéetel Media u ti'al ma' u manba'alcunsa'al: X ajaw Vastie' mix bikin ca náadzac tu táan ajaw. Yéetel u ka'aba' x ajawile' ca dza'abac ti' u láak co'olel cu najmaltic. 20Le jalach xotkiina u najmal u dza'abal ojéeltbil ichil tuláacal u caajnáalilo'ob ajawil, beyo' tuláacal le co'olelo'obo' bíin u dzo'ocbeso'ob u t'aan u yíichamo'ob, dzuul wa palitzil.
21Le ba'ax tu ya'alaj Memucano' jach utzchaj tu xiquin ajaw, bey xan ti' u j tzolxiquino'ob, ajawe' tu beeta je'el bix tu yu'ubilaque'. 22Ca túuxta'ab dzíibil ju'uno'ob caajal caajilo'ob ichil u ajawil, dzíibta'ano'ob tu jejeláas t'aano'ob le caajo'ob ti' u nojoch ajawilo', iquil u ya'alic ti' le íichamtzilo'obo' ca u beeto'ob ca u'uyac u t'aano'ob tu yotocho'ob yéetel ca t'aanaco'ob je'el bix u káato'obe'.
Currently Selected:
Ester 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992