Nehemías 13
13
Nehemíase' cu ca'anbesic yéetel u t'aan Junab Ku bix u najmal u cuxtal le caajo'
1Ti' le kiino'obo', xo'oc tu táan tuláacal le máaco'obo', u dzíibo'ob Moisés, ca j ila'ab te j dzíibo', le j amonitaob yéetel le j moabilobo', ma' u najmal u cajtalo'ob yéetel u caajal Kui'. 2(tumen leti'obe' ma' jóoko'ob u kamo'ob le j israelitaob yéetel janal mix yéetel ukuli', ba'ale' tu bo'otajo'ob Balam u ti'al u loolob t'anta'alo'ob, quex tumen Kue' tu sutaj qui' t'aanil le loolob t'aano'.) 3Bey túuno', chéen p'elac tu yu'ubilaco'ob le a'almaj t'aano', ja'atz ti' u caajil Israel tuláacal le máaxo'ob tu xa'akbesajuba'ob yéetel le j táanxel lu'umilo'obo'.
4Ma'ili' úuchuc lelo', aj kiin Eliasibe' leti' máax canantic ca'ach u cúuchil u ta'aca'al nu'uculo'ob u kulnaj c Ku. Tu yo'olal Eliasib u láaktzil Tobíase', 5tu dzaj majnil ti' jun p'éel nojoch káasabnajil, le tu'ux cu ta'aca'al ti'ibil óolalo'ob, poom, nu'uculo'ob, yéetel u diezmoil le trigoo', vino, yéetel aceite, le a'ala'an ca'ach unaj u dza'abal ti' j levitaob, ti' aj kaayo'ob, ti' aj canano'ob, yéetel le patano'ob u ti'al le aj kiino'obo'. 6Le ca j úuch tuláacal le ba'alo'oba' tene' mina'anen ca'ach Jerusalén, tumen tu ja'abil treinta yéetel dos ti' u ajawil Artajerjes u ajawil Babiloniae', suunajen te jalach najo'; quex tumen ca máan ya'ab kiine' tin káataj ti' ajawo' ca u cha'a in suut, 7ca suunajen Jerusalén, bey tin wilaj le kaas tu beetaj Eliasib iquil u dzaamail jun p'éel káasabnaj ti' Tobías tu sujuy lu'umil u kulnaj Junab Ku. 8Le ba'alo'ob tu beetaj in táaj p'u'ujul, ca tin láaj pulaj táancab u ba'aluba'ob Tobías. 9Cu dzo'ocole' tin wa'alaj ca láaj p'o'oboc ca p'áatac utz yanil, yéetel ca dza'abac tu cúuchil le nu'uculo'ob tu kulnaj Junab Ku, le ti'ibil óolalo' yéetel le poomo'.
10Bey xan tin wojéeltaj ma' j ku'ub ti' j levitaob mix ti' le aj kaayo'ob u janalo'obo' le beetic jujun túule' j púudze' ca'aj suunaj tu lu'umil. 11Ca túun tin wa'alaj u nu'uc ti' u jalachilo'ob tu yo'olal tu p'atajo'ob u kulnaj Junab Ku. Cu dzo'ocole' tin much'quintaj le aj kiino'ob, j levitaob ca tin dzajo'ob tu meyajilo'ob, 12tuláacal Judá tu taasaj te tu'ux cu ta'aca'al nu'uculo'ob, u diezmos trigo, vino, yéetel aceite. 13Cu dzo'ocole' u ti'al u canantico'ob le u najilo'ob u ta'acbesa'al ba'alo'obe', tin dzaj aj kiin Selemías, aj dzíib Sadoc, yéetel jun túul j levita cu kaaba'intic Pedaías, tin dzaj xan bey u yáantaje', Hanán u paal Zacur u yáabil xan Matanías, tumen leti'obe' ma'alob wíinico'ob. Leti'ob cu j bin t'oxic ti' u yéet meyajo'obo'. 14¡In Ku: kam le ba'ax quin beetica'; yéetel ma' a tu'ubsic tuláacal le ba'ax utz dzo'oc in beetic tu yo'olal u kulnaj in Ku yéetel tu yo'olal u kultajil!
15Ti' le kiino'obo' tin wilaj tu caajil Judá, yaan ca'ach máaxo'ob tu kiinil sábadoe' cu yedzico'ob ca'ach uva u ti'al u beetico'ob vino, cu púutico'ob ca'ach u chúuchuch káaxilo'ob trigo, cu dzáico'ob vino u cuch u burro'ob, yéetel u ch'úuyul uva, higos yéetel tuláacal jejeláas cuuch, yéetel xan tu kiinil sábadoe' cu bisico'ob Jerusalén. Ca túun tin keyajo'ob tu yo'olal u conico'ob u jocho'ob le kiino'. 16U láak ba'ale' dze'edzec ti' le máaxo'ob sijnalo'ob Tiro, cajacbalo'ob ca'ach te'elo', cu bisico'ob cay yéetel tuláacal jejeláas ba'alo'ob u ti'al u cono'ob ti' le judiob Jerusalenilo'ob tu kiinil sábado. 17Ca túun tin keyaj u nuuquilo'ob Judá, ca tin wa'alaj ti'ob: ¿Ba'ax kaasilo'ob ca beetiquex iquil a manba'alcuntique'ex sábado? 18Jach bey tu beetilac le a máanja'an ch'i'ibale'exo'obo' tu yo'olale' c Kue' tu túuxtaj ya'ab núumyail yóokol le caaja'. ¿A káate'ex wa a seten beete'ex p'u'ujul Ku u ti'al ca u beet loob ti' Israel tu yo'olal a manba'alcuntique'ex sábado?
19Ca túun tin wa'alaje' chéen p'el u ye'esame'entale' ca dza'abac ojéeltbile', sábado, ca ka'alac u jool caajilo'ob Jerusalén, yéetel ma' u je'ebel tac u máan sábado. Tin dzaj xan tu jool caajilo'obe', dze'edzec in palitzilo'ob u ti'al ma' u cha'ico'ob u yocsa'al mix jun p'éel cuch sábado. 20Le j kax coonolo'ob yéetel le j con chuucho'obo', ya'ab u téenel j p'áato'ob u máanso'ob áakab tu paach caajil Jerusalén, 21ba'ale' tene' sacach t'aanajen yéetelo'ob ca tin keyo'ob tu yo'olal u p'áatalo'ob u máanso'ob áakab actáan ti' le tuulumo', ca tin wa'alaj ti'obe' wa cu suut p'áatalo'obe', quin beetic u ka'alalo'ob, líikbal ti' le kiino' ma' j suunajo'ob sábadoi'. 22Cu dzo'ocole' tin wa'alaj ti' le j levitaob ca u yutzquinto'ob yanilo'ob u ti'al ca xi'ico'ob u cananto'ob u joolo'ob le caajo' u ti'al ma' u manba'alcunta'al sábado. ¡In Ku: ka'ajquen teech tu yo'olal xan le ba'alo'oba', ca a ch'a'a teen óotzilil je'el bix a wutzil óolale'!
23Tin wilaj xan ti' le kiino'obo' yaan dze'edzec le judiob j dzo'oc ca'ach u dzo'ocol u beelo'ob yéetel u co'olelilo'ob Asdod, Amón yéetel Moab; 24yéetel táancoch u paalalo'obe' cu t'anico'ob u t'aanil Asdod, yéetel u t'aano'ob u láak lu'umo'ob, ba'ale' u t'aan le judiobo' ma' u yojelo'ob ca'achi'. 25Tutucchi'inajen yéetelo'ob ca tin loolob t'antajo'ob. Yaan dze'edzeque' tin loxaj ca tin jocaj u tzo'otzel u poolo'ob, ca tin beetaj u jalach t'antico'ob tu kaaba' Junab Kue', ma' bíin u cha'ob u dzo'ocol u beelo'ob u x ch'upul paalal, mix u j xibil paalal yéetel táanxel caajilo'obi', mix u yóoltico'ob u ti'al u yatanto'ob u paalal wa u yatano'ob leti'ob u x co'olelo'ob le máaco'obo'. Ca xan tin wa'alaj: 26¡Lela' leti' le u keban Salomón, u ajawil Israel! Quex beyo' ichil le ya'abcach lu'umo'obo' ma' j anchaj jun túul ajaw je'el bix leti'e', yaabilta'ab xan tumen Ku, ca tu dzaj bey u ajawil tuláacal Israele', le x táanxel lu'umil co'olelo'obo' tu beetajo'ob u kebanchajal. 27Le beetique' ma' tu bin j p'atbil a talam kebanchajle'ex tu táan c Ku, tu yo'olal u dzo'ocol a beele'ex yéetel x táanxel lu'umilo'ob.
28Ti' jun túul u paal Joiadae', u paal nojoch aj kiin Eliasib, leti' xane' u ja'an ca'ach Sanbalat le j horonitae', tin tojolch'intaj tin táan. 29¡In Ku: ka'ajac ti' teech máaxo'ob tu manba'alcuntajo'ob u meeyjul le aj kiinilo' yéetel a nup t'aanil le aj kiinilo' yéetel le j levitailo!
30Bey tin púutilaco'ob ti' tuláacal ba'ax táanxel caajil, ca tin t'oxaj u meyaj tu jujun túulil, le aj kiino'ob, le j levitaob jujun túul tu'ux u najmal u meyaje'; 31bey xan le janalo'ob yéetel le si'o', tu kiinilo'ob úunchac u ku'ubulo'obo', yéetel u taasa'al u yáax yich pakal. ¡In Ku: Ka'ajac ti' teech a beetic utz!
Currently Selected:
Nehemías 13: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992