Rut 2
2
X Rute' cu j meendzul tu cool j Booz
1Elimelec u yíicham x Noemie' yaan ca'ach jun túul u láaktzil cu kaaba'intic Booz. Lela' jun túul máac jach sen ayikal. 2Jun p'éel kiine' x Rute' tu ya'alaj ti' x Noemí:
Cha'a in bin te j cool tu'ux cu jo'ochol le cebadao' u ti'al in wilic wa yaan máax cu cha'ic in bin tu paach u ti'al in meendzultic le u yi'ijo'ob cu p'áatalo'obo'.
Ca núuca'ab ti' tumen u maama u yíicham: Xeen in x chuupul aal. 3Bey túuno' x Rute' j bin te joocho', ca jo'op' u molic le u yi'ij le cebada cu p'a'atal tumen le j meyajo'obo'. Tu dzaj utz ti'e', le tu'ux j bin joocho' u ti'al j Booz u láakzil Elimelec. 4Ti' lelo' j Booze' j luk Belén ca j kuch tu'ux cu yúuchul le joocho', ca tu te'escuntaj le máaxo'ob cu joocho'obo': ¡Yuumtzil ca Ti'anac ta wéetele'ex!
Leti'obe' tu núucajo'ob: Yuumtzil ca u qui' t'anteech xan.
5Cu dzo'ocole' Booze' tu káat chi'itaj ti' le máax nu'uctic le j meyajo'obo':
¿Máax láaktziltic le x ch'úupalo'?
6Ca j núuca'ab ti' tumen le j meyajo': Leti'e' jun túul x táanxel lu'umil, j taal yéetel Noemí tu caajil Moab. 7Tu káat chi'itaj ti' teen wa je'el in cha'ic u bin tu paach le j meyajo'ob u ti'al ca u mol le i'ijo'obo', j máan ja'atzcab táan u meyaj, táant u taal u ti'al ca chan je'eleque'.
8J Booz túune' tu ya'alaj ti' x Rut: U'uye, in x ch'upul paal. Ma' a bin ti' mix jun láak cúuchil u ti'al a molic i'ijo'ob. p'áaten way yéetel in x palitzilo'obe', 9xeen tu yéetelo'ob je'el tu'uxac ca a wil táan u jooch in j meyajo'obe'. Dzo'oc in wa'alic ti' in palitzilo'ob ma' a chi'ichnaccunta'al tumen mix máac. Le quéen a wu'uy ukaje', xeen a wuk ja' ti' le nucuch cáato'ob u chupmajo'ob leti'obo'.
10X Rute' noclaj lu'um ca tu káat chi'itaj ti' Booz: ¿Ba'axten jach sen utzech tin wéetel quex tumen tene' x táanxel lu'umilen?
11Booze' tu núucaj: Tene' jach ma'alob in wojel tuláacal ba'ax ta beetaj tu yo'olal u maama a j quimen íicham, bey xan in wojel ta p'ataj a taata yéetel a maama bey xan a lu'um u ti'al a taal cajtal tu yéetel, quex ma' a kaj óolo'on ca'achi'. 12¡Ku bíin u bo'ot ti' teech! ¡Yuumtzil u Junab Ku Israel, le máax ta caxtaj u ti'al u canantiquech u dzaj a bo'olil tu yo'olal le ba'ax dzo'oc a beetico'! 13Leti'e' tu núucaj:
Teche' sen utzech tin wéetel, a t'aano'obe' dzo'oc u sen líiksic in wóol. Tumen ta t'aanajen yéetel yaacunaj, quex tumen tene' mix táan u páajtal in quetiquimba yéetel jun túul ti' a x palitzilo'ob.
14Cu dzo'ocole' le ca j culajo'ob u ti'al janale', Booze' tu ya'alaj ti' x Rut: Co'oten waye', ch'ul jun xe'et' waaj ichil le janal su'udzquinta'ano'.
X Rute' ca j culaj tu tzéel le jochnáalo'obo', Booze' tu dzaj ti' le kéelbil neek cu jatico'obo'. leti'e' jaan tac ca ma'alob na'ajchajic, ma' tu láaj xupaji'. 15Cu dzo'ocole' ca j bin tu ca'a téen u mol le i'ijo'obo', Booze' tu ya'alaj ti' u palitzilo'obe':
Cha'ex u molic i'ijo'ob tac ichil le cebada kaxa'antaco'obo'. Ma' a wet'ique'ex ti'. 16Jóokese'ex xan wa jay p'éel i'ijo'ob ti' le kaxa'antaco'obo', u ti'al ca u mole'. ¡Ma' a chi'ichnaccuntique'ex!
17X Rute' tu molaj i'ijo'ob ti' le lu'umo' tac ca j áakabchaji. Le ca tu yoxo'omtaj le tu molajo', tu dzaj maanal veinte kilos cebada. 18Tu cuchaje' ca j bin te j caajo', ca tu ye'esaj ti' u maama u yíicham. Cu dzo'ocole' tu jóokesaj u yalab le janale' ca tu dzaj ti'.
19Noemie' tu káat chi'itaj ti': ¿Tu'ux meyajnajech bejela'e'? ¿Tu'ux ta sen molaj le buca'aj i'ijo'ob? ¡Qui' t'anta'ac le máax tu yáantajech beya'!
X Rute' tu tzicbaltaj ti' u maama u yíicham tu'ux ca'ach meyajnaji.
Ca tu ya'alaj: Le cool tu'ux meyajnajeno' u ti'al jun túul máac cu kaaba'intic Booz.
20Noemie' tu ya'alaj ti': ¡Yuumtzil ca u qui' t'ant le máaco'! Kue' dzo'oc u ye'esic ti' to'on u yutzil bejela'e', je'el bix tu beetaj yéetel le dzo'oc u quíimilo'obo'. Le máaco' c nadza'an láaktzil, let o'olale' leti' jun túul máax u najmal yáantico'on.
21X Rute' tu ya'alaj: Bey xan tu ya'alaj ti' teen, je'el u páajtal in bin meyaj yéetel u x meyajo'ob tac quéen dzo'ococ le joocho'.
22Noemí túune' tu núucaj ti' u yilib: In x ch'upul paal, bey in wóole' ma'alob ca p'áataquech yéetel u x palitzilo'ob, ma' a bin mix ti' jun u láak lu'um tu'ux je'el u páajtal a chi'ichnacunta'al tumen wa máaxe'.
23Bey túuno' Rute', meyajnaj yéetel u x palitzilo'ob Booz tac le ca j dzo'oc u joochil le cebadao' bey xan u joochil le trigoo'. ca'aliquile', ti' cajacbal tu yicnal u maama u yíichame'.
Currently Selected:
Rut 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992