Romanos 16
16
1Quin kubentic te'ex c quiic Febe, máax diaconisa tu iglesiail Cencrea. 2Kame'ex ma'alob tu kaaba' Yuumtzil, je'el bix unaj u ka'amal le ocsaj óolo'obo', yéetel áante'ex ti' je'el ba'alac ca kabéetchajac ti'e', tumen leti'e' ya'ab máaxo'ob u yáantmaj, tac teen u yáantmajen.
3Te'escunte'ex Priscila yéetel Aquila, máaxo'ob in wéet meyajo'ob ti' u meeyjul Cristo Jesús. 4Leti'obe' tu dzaj u cuxtalo'ob tu táan káak tin wo'olal; bey túuno' quin dzáic u nib óolalil ti'ob, ma' chéen teni', ba'ale' tuláacal u iglesiailo'ob le ma' judíobo'. 5Te'escunte'ex xan le sucu'uno'ob cu much'talo'ob tu yotoch Priscila yéetel Aquilao'. Te'escunte'ex in amigo Epeneto, máax jach in yaabiltmaj, leti' máax tu yáax ocsaj óoltaj Cristo tu lu'umil Acaya. 6Te'escunte'ex María máax ya'ab meyaj dzo'oc u beetic ichile'ex. 7Te'escunte'ex in wéet caajalo'ob Andrónico yéetel Junias, máaxo'ob j ka'alo'ob tin wéetel; leti'obe' nuuctaco'ob ichil le apóstolo'obo', yéetel tu yocsaj óolto'ob Cristo táanil ti' teen.
8Te'escunte'ex in amigo Amplias, máax in yaabiltmaj ti' Yuumtzil. 9Te'escunte'ex Urbano, máax c éet meyaj ti' Cristo Jesús, bey xan Estaquis máax in yaabiltmaj. 10Te'escunte'ex Apeles, máax dzo'oc u beetic ya'abcach ba'alo'ob u ti'al u ye'esic u yocsaj óolal ti' Cristo, bey xan le máaxo'ob u láako'ob Aristóbuloo'. 11Te'escunte'ex in wéet caajal Herodión, bey xan le máaxo'ob u láako'ob Narcisoo', máaxo'ob cu yocsaj óoltico'ob Yuumtzil. 12Te'escunte'ex Trifena yéetel Trifosa, máaxo'ob táan u meyajo'ob ti' u meeyjul Yuumtzil, bey xan c quiic Pérsida máax c jach yaabiltmaj, máax ya'ab meyaj u beetmaj ti' u meeyjul Yuumtzil. 13Te'escunte'ex Rufo, máax nojoch ichil u yocsaj óolo'ob Yuumtzil, bey xan u maama, máax bey jun túul maamatzil in ti'alte'. 14Te'escunte'ex Asíncrito, Flegonte, Hermas, Patrobas, Hermes, bey xan le sucu'uno'ob yaan tu yéetelo'obo'. 15Te'escunte'ex xan Filólogo yéetel Julia Nereo yéetel u quiic, bey xan Olimpas yéetel tuláacal le sucu'uno'ob ti' le ocsaj óolal yano'ob tu yéetelo'obo'.
16Te'escuntaba'ex ta baatzile'ex yéetel jun p'éel quili'ich dzu'udz. Tuláacal u iglesiaob Cristo cu túuxtic te'ex te'escunajo'ob. 17Sucu'une'ex quin káat óoltic te'ex ca a wile'ex le máaxo'ob cu beetico'ob jatzlantáambailo'obo' yéetel cu dzáico'ob tu'ux u t'óochpajal máaco', tumen lela' ti' yaan tu contra le ca'ansajo'ob ta canaje'exo'. Tzelaba'ex ti'ob, 18tumen le máaco'obo' ma' táan u meyajtico'ob c Yuumtzil Jesucristoi', ba'ale' táan u meyajtico'ob u dzíibolalo'ob, yéetel muumun ch'ujuc t'aano'obe' cu tusic u pucsi'ikal le máaxo'ob cabal u yóolo'obo'. 19Tuláacal u yojelo'ob bix ta wu'uyile'ex t'aan; le o'olale' cu qui'imactal in wóol, yéetel in káate' ca a dzáa a wóole'ex u ti'al a beetique'ex le utzo', ma' u ti'al a beetique'ex le kaaso'. 20U Kuil jéedzele' séeba'an bíin u dzáancha'at Satanás yáanal a wooque'ex. U siibal c utzil c Yuumtzil Jesucristoe' ca yanac ti' te'ex.
21Cu túuxtic te'ex te'escunajo'ob Timoteo, máax in wéet meyaj, bey xan Lucio, Jasón yéetel Sosipater in wéet caajalo'ob. 22Teen, Tercio, máax táan in dzíibtic le ju'una', bey xan quin túuxtic te'ex te'escunajo'ob tu kaaba' Yuumtzil.
23Cu te'escuntique'ex Gayo. Ti' kucha'anen tu yotoche', ti' xan cu much'tal tuláacal le iglesiao'. Bey xan cu te'escuntique'ex Erasto, máax canantic u ayikalil le caaja', bey xan sucu'un Cuarto.
24U siibal C Yuumtzil Jesucristo ca yanac ti' tuláacale'ex. Amén.
U dzooc qui'iqui'it'aano'ob
25Bejela'e', co'ox qui'iqui' t'antic Ku, le máax cu páajtal u beetic u yantal a muuke'ex, je'el bix cu ya'alic le ma'alob péectzil tocsajil quin tze'ectica' yéetel u ca'asajilo'ob Jesucristo. Lela' queet yanil yéetel le ba'axo'ob dzo'oc u dzáic Ku u ti'al ojéeltbilo' ba'ax u ta'acmaj ca'ach ma'ilil cáajac u yóokolcaabe', 26ba'ale' bejela'e' dzo'oc u dza'abal u ti'al ojéeltbil tu yo'olal le Quili'ich Dzíibo'ob tu p'atal le aj bóobato'obo', je'el bix tu ya'aljilac Ku mina'an u xuulo'. Le u ta'acbil tuucul Kua' dzo'oc u dza'abal ojéeltbil bejela'e' ti' tuláacal le caajo'obo' u ti'al ca ocsaj óolnaco'ob yéetel ca u yu'ubo'ob u t'aan. 27¡Ti' Ku, máax chéen leti' yaan u na'at, yanac nojbe'enil tu yo'olal Jesucristo mantadz! Amén.
Currently Selected:
Romanos 16: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992