Números 2
2
U tzoolol bix much'lajico'ob can jaatz israelitaobo'
1Yuumtzile' tu t'anaj Moisés yéetel Aarón ca tu ya'alaj ti'ob: 2Le j israelitaobo' unaj u much'talo'ob ma' jach náach tu bakpach u noj Paselil Much'tal, jujun túul yáanal u lacam, yéetel u chíiculal u láaktzilo'ob.
3Tu lakine' bíin je'elec le jaatzul cu xíimbal yáanal u lacam Judá. U jaatzul u ch'i'ibalo'ob Judae' u nojchile' Naasón u paal Aminadad, 4tuláacale' sesenta yéetel cuatro mil seiscientos j xiibo'ob. 5Tu tzéele' bíin je'elec u jaatzul u ch'i'ibalo'ob Isacar, u nojchile' Natanael, u paal Zuar, 6tu pa'ate'ile', cincuenta yéetel cuatro mil cuatrocientos j xiibo'ob. 7Bíin xan much'lac tu tzéel u jaatzul u ch'i'ibalo'ob Zabulón, u nojchile' Eliab, u paal Helón, 8tu pa'ate'ile' cincuenta yéetel siete mil cuatrocientos j xiibo'ob. 9U j xiibilo'ob Judae' chúucpaj óox múuch' le bíin xíimbalnaco'ob tu táan le j israelitaob, ciento ochenta yéetel seis mil cuatrocientos j xiibo'ob.
10Tu noojole' bíin je'elec u jaatzul cu xíimbalo'ob yáanal u lacam Rubén. U nojoch u ch'i'ibalo'ob Rubene' Elisur, u paal Sedeur, 11tu pa'ate'ile' cuarenta yéetel seis mil quinientos j xiibo'ob. 12Tu tzéele' bíin je'elec u jaatzul u ch'i'ibalo'ob Simeón, u nojchile' Selumiel, u paal Surisadai, 13tu pa'ate'ile' cincuenta yéetel nueve mil trescientos j xiibo'ob. 14Bíin xan je'elec yéetelo'ob u ch'i'ibalo'ob Gad, u nojoche' Eliasaf, u paal Reuel, 15tuláacale' cuarenta yéetel cinco mil seiscientos cincuenta j xiibo'ob. 16Beyo' u caajilo'ob Rubene' bíin chúucpajac óox múuch', tu pa'ate'ile' ciento cincuenta y un mil cuatrocientos j xiibo'ob yaan u xíimbalo'ob tu paach le yáaxo'.
17Le j levitaobo' bíin xíimbalnaco'ob chúumuc ti' le can múuch' j xiibo'ob u ti'al u bisico'ob u noj Paselil Much'tal. Le can p'éel cajtalilo'ob bíin xíimbalnaco'ob yáanal u lacam tu paach u láak caaj tu tzoolol je'el bix much'lico'ob ca'ache'.
18Chikine' yaan u je'elel u múuch'ul le j xiibo'ob cu xíimbalo'ob yáanal u lacam Efraín. U nojoche' Elisama, u paal Amiud, 19tu pa'ate'ile' cuarenta mil quinientos j xiibo'ob. 20Tu tzéele' bíin je'elec u jaatzul u ch'i'ibalo'ob Manasés, u nojchile' Gamaliel u paal Pedasur, 21tu pa'ate'ile' treinta yéetel dos mil doscientos j xiibo'ob. 22Yaan xan u dza'abal tu tzéele' u jaatz u múuch' cajtalil yotochnáalo'ob Benjamín, u nojchile' Abidán, u paal Gedeoni, 23tu pa'ate'ile' treinta yéetel cinco mil cuatrocientos j xiibo'ob. 24Beyo' u cajtalil Efraine' cu chuquic óox múuch', tu pa'ate'ile' ciento ocho mil cien j xiibo'ob, yaan u xíimbalo'ob tu óox tzoolol.
25Tu noojole' bíin je'elec u jaatzul le j xiibo'ob cu xíimbalo'ob yáanal u lacam Dan, u nojchile' Ahieser, u paal Amisadai, 26tu pa'ate'ile' sesenta yéetel dos mil setecientos j xiibo'ob. 27Tu tzéele' bíin je'elec u jaatzul u ch'i'ibalo'ob Aser, u nojchile' Pagiel, u paal Ocrán, 28tu pa'ate'ile' cuarenta un mil quinientos j xiibo'ob. 29Tu tzéelo'ob xane' bíin je'elec u jaatzul u ch'i'ibalo'ob Neftalí, u nojoche' Ahira, u paal Enán, 30tu pa'ate'ile' cincuenta yéetel tres mil cuatrocientos j xiibo'ob. 31Beyo' u caajil Dane' cu chúucpajal óox múuch' j xiibo'ob, le o'ox múuch'o', tu pa'ate'ile' ciento cincuenta yéetel siete mil seiscientos j xiibo'ob bíin u nu'up'o'ob u tzoolol tu paach u lacamo'ob. 32Tu pa'ate'il u ch'i'ilancab le j israelitaob cu dzo'ocol u xo'ocol tu pa'ate'ile' tu dzaj seiscientos tres mil quinientos j xiibo'ob. 33Ba'ale' je'el bix tu tzol t'antaj Yuumtzil ti' Moisese', le levitaobo' ma' xo'oco'ob ichil le buca'aj xo'oco'. 34Le j israelitaobo' tu beetajo'ob tuláacal je'el bix Yuumtzil tu nu'uctilac ti' Moisese': tu jujun túulile' much'laj yáanal u lacam, yaan u xíimbalo'ob tu tzéel u cajtalil u yotochnáalo'ob yéetel u láaktzilo'ob.
Currently Selected:
Números 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992