Levítico 27
27
Ba'axo'ob jun páaycuna'ano'ob u ti'al Ku
1Yuumtzile' tu t'anaj Moisese' ca tu ya'alaj ti': 2A'al ti' le j israelitaobo': le máax u káat u dzáa u bo'olal jun p'éel séeb chi' ti' Yuumtzil je'el bix unaj u dza'abal u bo'olal jun túul máaque', 3jun túul xiib yaan veinte tac sesenta ja'abo'ob ti'e' bíin a beet u bo'otic cincuenta sac taakino'ob je'el bix le u p'iisil le quili'ich najo'; 4jun túul co'olele', unaj u bo'otic treinta sac taakino'ob. 5Le máax yaan cinco tac veinte ja'abo'ob ti'e', bíin u bo'ot veinte sac taakino'ob wa j xiib, wa co'olele' bíin u bo'ot diez sac taakin. 6U ti'al mejen paalal yaan jun winal ti'ob tac cinco ja'abo'obe', bíin dza'abac u bo'olal cinco sac taakino'ob u ti'al mejen j xiibo'ob yéetel óox p'éel u ti'al mejen x ch'úupal. 7U ti'al máaxo'ob dzo'oc u máan sesenta u ja'abilo'obe', bíin u bo'oto'ob le j xiibo'obo' quince taakino'ob, diez co'olelo'ob. 8Wa sen óotzil máax beet le séeb chi'o' tu yóolal lelo' ma' tu páajtal u bo'otic le buca'aj a'ala'an u ti'al jun p'éel séeb chi'o', bíin káata'ac ti' le aj kiin cu ya'al buca'aj unaj u bo'otic le máac beet le séeb chi'o'.
9Ti' le ba'alche'ob cu táanbesa'alo'ob ti' Yuumtzilo', tuláacal ba'alche' cu ku'ubul ti' Yuumtzile' cu p'áatal jun páaycuna'an, 10ma' bíin páatac u ke'exel yéetel u láak ba'alche' asab jadzutz wa asab kaasi'. Wa yaan u dza'abal u kexe', cu p'áatal jun páaycuna'an le ba'alche' táanbesa'ano', bey xan le cu dza'abal u keexinto'.
11Ti' le ba'alche'ob ma' janalbe'eno'obo' ma' bíin páatac u táanbesa'alo'ob ti' Yuumtzilo', bíin bisa'ac ti' le aj kiino', 12u ti'al u ya'alic bajux u bo'olal le ba'alche'o'. Le buca'aj bíin u ya'al le aj kiino' unaj u bo'ota'al, 13wa taac u ca'a ti'alintic le ba'alche'ob, unaj u bo'otic jun jatz ti' cinco jaatzul u tiip'il ti' le suuc u bo'ota'alo'.
14Wa yaan máax cu jun páaycuntic u yotoch ti' Yuumtzile', le aj kiino' unaj u ya'alic bajux u tojol le najo'. Le bajux bíin u tucult le aj kiino' unaj u bo'ota'al. 15Ba'ale' wa le máax jun páaycunt le naj u káat u ca'a máano', unaj u bo'otic pa'ate' yéetel jun jatz ti' cinco jaatzul u tojol le buca'aj suuc u bo'ota'alo', cu ca'a ti'alintic le najo'.
16Wa máax cu jun páaycuntic ti' Yuumtzil jun xéet' u lu'ume', u tojol le lu'umo', bíin tuculta'ac je'el bix buca'aj bíin u dzáa u joochile', lelo' cincuenta sac taakino'ob tu yo'olal doscientos yéetel veinte litros cebada. 17Wa cu jun páaycuntic u lu'um líikbal u cáajbal u ja'abil jáalkabile', cu p'áatal u tojol je'el bix a'ala'anilo'; 18ba'ale' wa cu jun páaycuntic cu dzo'ocol u máan u ja'abil jáalkabile', le aj kiino' bíin u tucult buca'aj sac taakin u naj u dzáic, yaan u lukesic le buca'aj unaj u bo'ota'al ti' le ja'abo'ob dzo'oc u máan ti' u ja'abil le jáalkabilo'.
19Wa le máax jun páaycunt le lu'um u káat u man tu ca'a téene', unaj u bo'otic pa'ate' yéetel jun jatz ti' cinco jaatzul ti' le buca'aj a'ala'anilo', cu ca'a ti'alintic; 20ba'ale' wa ma' tu ca'a manic tumen le lu'um táan u co'onol ti' u láak máaco', ma' bin páatac u ca'a ti'alintiqui'. 21Le quéen p'áatac mina'an u taatail le lu'um tu ja'abil jáalkabilo', cu jun páaycunta'al chéen u ti'al Yuumtzil, le aj kiino' cu ch'a'ic u ti'alinte.
22Le máax cu jun páaycuntic ti' Yuumtzil jun p'éel manbil lu'um ma' u kam ba'albáil ti' u taataob, 23le aj kiino' bíin u dzáa u tojol le je'el bix buca'aj u kiinilo'ob u bin u ja'abil jáalkabile', le máaco' bin u bo'ot láili' ti' le kiin le buca'aj a'ala'ab u tojol le lu'um, cu jun páaycuntic u ti'al Yuumtzilo'. 24Tu ja'abil jáalkabile', le lu'umo' cu suut ti'alintbil tumen le máax cone', u jach yuumil le lu'umo'.
25Tuláacal le ba'axo'ob bíin tuculta'ac bajux bin u tojolt, unaj je'el bix le siclo,#27.25 Siclo u káat ya'ale' taakin yaan u alil once gramos ti'. yaan once gramos ti'ob tumen lelo' leti' le p'is jóokesa'an chéen u ti'al le quili'ich najo'. 26Ti' u yáax aalo'ob wacaxe' u ti'al Yuumtzil tumen yáax aalo'ob, mix máac unaj u jun páaycuntic. Quex chan wacax wa quex chan j tamane' u ti'al Yuumtzil. 27Wa jun túul ba'alche' ma' janalbe'ene', je'el u páajtal u bo'ota'al le bajux bíin a'ala'ac pa'ate' yéetel u tiip'il jun jaatz ti' cinco jaatzul ti' le buca'aj u tojolo'. Ba'ale' wa ma' tu ca'a ma'anale', je'el u páajtal u co'onol ti' le buca'aj suuquilo'.
28Le máax cu jun páaycuntic u ti'al Yuumtzil jun jatz ti' le ba'alo'ob u ti'al je'el bix máaco'ob, wa lu'umo'ob tu kamaj ti' u taataob, mix jun p'éel ti' le ba'axo'ob cu jun páaycuna'an je'el u páajtal u co'onol wa cu ma'anal tumen le máax conmailo'; tuláacal le ba'ax jun páaycuna'ano', sen quili'ich u ti'al Yuumtzil. 29Ma' xan bíin páatac u bo'otal u cuxtal mix jun túul máac xot kinta'an u ti'al j quíimsbile': yaan u quíimil.
30Jun jaatz ti' diez jaatzilo'ob ti' tuláacal u yich lu'ume', je'el bix neeko'ob yéetel u yich che'obe', u ti'al Yuumtzil jun páaycuna'an u ti'al. 31Le máax u káat u ca'a ti'alint jun p'íit ti' u jatz le diez jaatzulo', yaan u bo'otic u tojol yéetel u ti'ip'il jun jatz ti' cinco jaatzul.
32Jun túul ti' diez wacaxo'ob wa ti' u ba'alche'ilo'ob a waalake'exe', yaan u jun páaycunta'al u ti'al Yuumtzil, 33ma' bin yéeya'ac u jadzutzilo'ob wa u kaasilo'obi', mix unaj u ke'exel jun túul yéetel u láak jun túul. Wa yaan cu ke'exele', le ba'alche' cu yáax dza'abal yéetel le cu dza'abal u ti'al u keexo', cu p'áatalo'ob jun páaycunta'ano'ob, ma' tu páajtal u ca'a su'utul ti' u taatail.
34Lela' leti' le a'almaj t'aano'ob tu dzaj Yuumtzil ti' Moisés u ti'al le israelitaob tu witzil Sinaio'.
Currently Selected:
Levítico 27: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992