Jonás 1
1
Jonase' cu púudzul ti' Ku
1Yuumtzile' tu t'anaj Jonás u paal Amitai, ca tu ya'alaj ti': 2Xeen tu noj caajil Nínive u ti'al ca a tze'ect bin in ca'aj in xu'uls, tumen tac ti' téen dzo'oc u kuchul u péectzilil u kasa'anil.
3Ba'ale' Jonase', u ti'al ma' u beetic ba'ax j a'ala'ab ti' tumen Yuumtzile', tu yóoltaj púudzul ti', ca j bin tu jáal u ka'anabil u caajil Jope, tu'ux tu núuptáantaj jun p'éel cheem ta'itac u jóokol u binbal Tarsis; tu bo'otaj u tojol u binbal te'elo' ca j ooc ichil le cheemo'. 4Ba'ale' Yuumtzile' tu beetaj u yustaj jun p'éel ka'amcach iik, ca j líik tu'ux taam le ka'anabo' jun p'éel ka'amcach súusut iik, ca j ila'ab bey bin u ca'aj u xe'exet'pajal le cheemo'. 5Le u aj meyjulo'ob le cheem chu'upo'ob yéetel sajaquil, tu jujun túulilo'ob jo'op' u payalchi'ob ti' u kuob. U ti'al u sáalcuntico'ob le cheemo' tu pulajo'ob tuláacal le cuuch ichil le ka'anabo'. Ca'aliquile' Jonase' ema'an tu cúuchil tu'ux cu ta'aca'al u cuuch le cheemo', te'elo' ti' j p'áat t'uubul j weneli'. 6U nojochil túun le cheemo' j bin tac tu'ux cu wenel Jonase' ca tu ya'alaj ti': ¿ba'ax ca beetic waye'? Chéen wenel ca beetic. ¡Líiken payalchi'inen ti' a Ku! Je'elajqui' ca u yóolt u beet utz ti' to'one'ex ca u toco'on.
7Ca'aliquile' le u aj meyjulo'ob le cheemo' táan u ya'alico'ob tu baatzilo'ob: Co'ox buul u ti'al ca c ile'ex ti' máax yaan u si'ipilil le loob mukyajtica'. Buulnajo'obe' ca j lúub túun tu yóokol Jonás. 8Ca túun tu ya'alajo'ob ti': A'al ti' to'on ba'ax o'olal j taal le kaas ti' to'ona'. ¿Ba'ax o'olal j taalech waye'? ¿Tu'ux a taal? ¿Tu'ux a caajal? ¿Ti' ba'ax ch'i'ibal a taal?
9Jonase' tu núucaj: Hebreoen, quin dzáic kultajil ti' Yuumtzil, u Kuil ca'an, le máax beetmajil le ka'anaba', yéetel le lu'uma'.
10-11Jonase' tu tzicbaltaj ti' u aj meyjulo'ob le cheemo' leti'e' táan ca'ach u púudzul ti' Yuumtzil, leti'obe', ca tu yu'ubajo'obe' éetel táan u yilico'ob bix u bin u bin u líikil u nucuch cuclil le ka'anabo', tu seen ch'a'ajo'ob sajaquil, ca tu káat chi'itajo'ob ti' Jonás: ¿Ba'axten ta beetaj le ba'al beya'? ¿Ba'ax u najmal c beetic ta wéetel u ti'al ca jéedzec le ka'anaba'?
12Ca tu núucaj Jonás: pulene'ex te j ka'anabo', beyo' le ka'anabo' cu jedzcunticubáa. Tene' in wojel ti' teen yaan u si'ipilil úuchic u taal le nojoch chac ikal ta wóokole'exa'.
13Le u aj meyjulo'ob le cheemo' ca jo'op' u báabtico'ob le cheem yéetel tuláacal u muuko'ob u ti'al u nadzico'ob tu jáal le ka'anabo', ba'ale' ma' j páatchaji', tumen le ka'anabo' táan u bin u bin líikil u nucuch cuclil. 14Ca túun j payalchi'inajo'ob ti' Yuumtzil ca tu ya'alajo'ob: Yuumtzil ma' a cha'ic c quíimil tu yo'olal u si'ipil le máaca'. Wa mina'an u si'ipile' ma' a taquic c pool tu yo'olal u quíimil, tumen teche', Yuumtzil, ca beetic ba'ax je'el bix a wojelile'.
15Le ca'aj dzo'oc u ya'alico'ob lela', tu léench'intajo'ob Jonás te j ka'anabo', le ka'anab túuno' jéedzi. 16Le ca j ila'ab tumen le u aj meyjulo'ob le cheemo', tu yu'ubajo'ob jun p'éel nojoch tziiquil ti' Yuumtzil, ca tu kubajo'ob jun p'éel quíimsbil ba'alche' bey xan tu beetajo'ob séebchi'ob ti'.
17Ca'aliquile', Yuumtzile' tu nu'ucbesaj jun túul nojoch cay u ti'al u lu'ukul Jonás. Jonás túune' tu máansaj óox p'éel kiin yéetel óox p'éel áakab tu jobnel le cayo'.
Currently Selected:
Jonás 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992