Eclesiastés 2
2
1Bey xan tin tucultaj: bejela'e' bin in ca'aj in náis in wóol; bíin in ca'aj in beet ba'ax in káati. ¡ba'ale' tac lelo' suunaj chéen waya'as! 2Ca tin wilaje' che'eje' chocopoolal, u qui' óolal bakel mix jun p'éel utz cu taasic.
3Yéetel in tuucul ti' yaan tu yáanal ojéelaje', tin wóoltaj in caxt muuk ti' ukul vino, u ti'al in wojéeltic wa leti' u asab utzil ca u beet wíinic tu dze'edzec kiinilo'ob u cuxtal way yóokolcaabe'.
4Tin beetaj nucuch ba'alo'ob; tin líiksaj jalach najo'ob; yanchaj in x péet pacho'ob u ti'a' u pa'akal uva. 5tin beetaj in cool, bey xan pakal nicte'ob, tin pakaj u jejeláas janalbe'en ich che'ob. 6tin beetaj u beelo'ob ja' u ti'al in jóoyabtic in pakalo'ob; 7Tin manaj j palitzilo'ob yéetel x palitzilo'ob, yaan xan síijo'ob tin wotoch; yanji' teen ya'ab x wacaxo'ob yéetel j tamano'ob asab ti' tuláacal le j cajlajo'ob Jerusalén táanil ti' téen. 8Tin niccuntaj oro yéetel plata, u ayikalilo'ob ca'ach u láak ajawo'ob yéetel u tzúuc caajilo'ob. Yanji xan ti' teen j kaayo'ob yéetel x kaayo'ob, tin beetaj tuláacal ba'ax qui' ti' u bakel wíinic yéetel jejeláas x keecho'ob.
9Tin beetajimbáa nojoch ba'al, j kuch u kiinil u yantal ti' teen ya'ab ba'al asab ti' tuláacal le j cajlajo'ob táanil ti' teen tu caajil Jerusaleno'. Quin nupic ti' lelo', le ojéelaj ma' tu p'atajeno'. 10Ma' tin su'ukintaj mix jun p'éel dzíibolaji'; mix xan tin su'ukintaj mix jun p'éel náaysaj óolali'. Tuláacal in meyajo'ob tu beetajo'ob utz ti' teen, leti' le utzo' in bo'olal.
11Cu dzo'ocole' tin dzajinbáa in tucult buca'aj ba'alo'ob tin beetaj yéetel buca'aj muuk tin xupaj, ca tin wilaj tuláacale' chéen waya'as, bey a wóoltic lap' iike', tumen mix ba'al utz u taal ti' wíinic way yóokolcaaba'.
12Cu dzo'ocole' tin máansaj in tuucul tu yo'olal le ojéelajo', jach j ma' na'atil yéetel le neetzilo': ¿Ba'ax bíin u beet le ajaw cu taal tin paacho', wa ma' le ba'ax dzo'oc u beeta'alo'? 13Ca tin wilaj asab utz le ojéelajo', ma' bey le ma' ojéelajilo', je'el bix ma'alobil le sáasil ti' le éekjoche'enilo'.
14Aj ojéelaje' cu meyaj ma'alob u yich ti', ba'ale' le j ma' ojéelajo' cu máan ich éekjoch'e'enil, ca tin wilaj tuláacalo'ob jun p'éelili' ba'ax cu pa'atico'ob, 15ca tin wa'alaj: Ba'ax u úuchuc ti' le j ma' ojéelajo' le xan bíin úuchuc ti' teen, bey túuno', mix ba'al u biilal ti' teen ya'ab ojéelaj ¡Tac lelo' chéen waya'as! 16Tumen ti' mix máac bíin ka'ajac aj ojéelaj mix j ma' ojéelaj; je'el bix u máan kiine' bey u tu'ubsa'al tuláacal ba'al, aj ojéelajo'ob yéetel j ma' ojéelajo'obe' cu láaj quíimilo'ob.
17Kuch in p'ectic le cuxtalo', tumen tuláacal ba'al cu beeta'al way yóokol caabe' kaas u taal ti' teen, tuláacal chéen waya'as, ¡bey a wóoltic a lap'ic iike'! 18Kuch in p'ectaj tuláacal le meyaj tin beetaj way yóokolcaaba', tumen tuláacal yaan in p'atic ti' máax cu bin u jeelinten, 19Ba'ax jach jaaje': aj ojéelaj wa j ma' ojéelaje' yaan u cha'ic tuláacal ba'ax tin náajaltaj yéetel in kíilcab te j lu'uma'. ¡Bey xan lelo' chéen waya'as!
20Le ca tin wilaj ba'ax dzo'oc in beetic way yóokolcaabe', ca tin yaj óoltaj úuchic in sen meyaj. 21Tumen yaan máax cu dzáic na'at, kaj óolal yéetel ba'ax u yojel tu meyaj, chéen u ti'al u láaj p'atic ti' máax ma' tu meyajtaji'. ¡Le xana' Chéen waya'as yéetel jun p'éel nojoch loolob tumen ma' u najmali'!
22Tu jaajile', ¿ba'ax cu náajaltic wíinic iquil u sen meyaj yéetel u sen ch'iquicubáa tuucul way yóokolcaabe'? 23Tuláacal u cuxtale' mukyajo'ob, jun p'éel yaayaj cuuch; mix yéetel áakab cu je'elel u tuucul. ¡Le xana' chéen waya'as!
24Ba'ax u najmal u beetic wíinique' janal, ukul, ca xan u qui'imaccuns u yóol yéetel u tojol u náajal, tumen dzo'oc in wilique' le xana' ti' Ku u taal. 25Tumen, ¿máax cu páajtal u janal wa u qui'imacchajal yóol, wa ma' tu yo'olal Ku? 26Tu jaajile' Kue' cu dzáic ojéelaj, kaj óolal yéetel qui'imac óolal ti' le máax utz u lúubul tu táan. Ba'ale' le máax cu kebanchajale' cu beetic u sen meyaj u ti'al much'quintic ayikalilo'ob, u ti'al u dzáa ti' le máax cu lúubul utzil ti'. ¡Lela' xana' chéen waya'as bey u yóoltic wíinic u lap' iike'!
Currently Selected:
Eclesiastés 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992