2 Corintios 1
1
Pabloe' cu dzíib ti' u iglesial Corinto
1Teen Pabloe' u apóstol Jesucristo, tumen bey tu yóoltil Ku. Teen yéetel sucu'un Timoteoe' c dzíib ti' u sucu'unilo'ob u iglesia Ku yaan tu caajil Corinto, yéetel ti' tuláacal le máaxo'ob u ti'alo'ob Ku yaan tu lu'umil Acayao'. 2Kame'ex u siibal utzil yéetel u jéedzel óolal Ku c Taata yéetel Yuumtzil Jesucristo.
U mukyajo'ob Pablo
3Co'ox qui'iqui' t'antic Ku u Taata c Yuumtzil Jesucristo, le Taata cu ch'a'ic to'oon óotzililo' yéetel le Ku cu qui'imaccuntic c óol mantadzo'. 4Kue' cu qui'imaccuntic c óol ti' tuláacal c mukyajo'ob, u ti'al ca páatac c qui'imaccuntic u yóol le máaxo'ob cu mukyajo'obo', iquil c dzáic ti'ob le qui'imac óolal u dzaamaj to'on Kuo'. 5Tumen je'el bix cu ya'abtal ti' to'on u mukyajo'ob Cristoe', bey xan tu yo'olal Cristoe' c kamic jun p'éel nojoch qui'imac óolal. 6Le o'olale', wa to'on c mukyaje', cu yúuchul u ti'al ca yanac ti' te'ex qui'imac óolal yéetel tocsajil; wa Ku cu qui'imaccuntic c óole' cu yúuchul xane' u ti'al ca yanac ti' te'ex qui'imac óolal yéetel tocsajil, beyo' ca páatac a mukyajtique'ex yéetel chuca'an óolale' le yaayaj óolalo'ob c mukyajtic to'ono'. 7Yaan to'on ti' te'ex jun p'éel alab óolal ma' táan u péec, tumen c ojele' je'el bix táacpaja'ane'ex ti' le qui'imac óolal cu dzáic to'on Kuo'.
8Sucu'une'ex, c káat ca wojéelte'exe' buca'aj nojoch kaasil úuch to'on tu lu'umil Asia. Jun p'éel yaayaj óolal jach táaj nojoche' mina'anchaj to'on u muukil c mukyajtic, t tucultaj ma' bíin jóokoco'on ca'ach yéetel cuxtal. 9To'one' t u'uyabáa je'el bix le máaxo'ob xot kinta'ano'ob u ti'al quíimilo'. Ba'ale' j úuche' u ti'al ca ca'ansa'aco'on u ti'al c alab óolt Ku le máax cu ca'a púut cuxquintic le quimeno'obo', ma' c alab óolticbáa to'oni'. 10Kue' tu ta'acajo'on yéetel táan u toquico'on ti' le nojoch loolob quíimilo'. Ti' leti' c dzaamaj c alab óolal u ti'al ca u toco'on mantadz 11wa te'ex ca wáantico'one'ex yéetel a payalchi'ex. Wa ya'ab máaxo'ob cu payalchi'ob t o'olale' ya'ab máaxo'ob cun u dza'ob nib óolal ti' Ku tu yo'olal le siibal utzil cu dzáic to'ono'.
Ba'ax o'olal Pabloe' ma' bin Corintoi'
12Yaan jun p'éel ba'al cu dzáic to'on qui'imac óolal, leti' lela': c tuucule' cu ya'alic to'one' ma'alob xíimbalnajico'on way yóokolcaabe', x ma' ca'a p'éel ichil, yáax táanil ichile'ex. Lela' ma' úuch tu yo'olal c na'ati', ba'ale' Ku máax áanto'on yéetel u yutzil u ti'al ca páatac x cuxtal beyo'. 13Ti' le ba'axo'ob c dzíibtic te'exa' mina'an u láak ba'alo'ob wa ma' chéen le cu páajtal a xoquique'exo' yéetel ca na'atique'exo'. Bey xan quin pa'atic ca a na'ate'ex ma'alob, 14bey je'el bix dzo'oc u cáajal a na'atique'ex dze'edzeco', le kiin quéen taalac c Yuumtzil Jesuse' te'exe' cu páajtal a wu'uyique'ex qui'imac óolal t o'olal, je'el bix xan to'on yaan c u'uyic qui'imac óolal ta wéetele'exo'. 15Tu yo'olal le alab óolala' in tucultmaj in bin táanil in wile'ex, u ti'al in dzáic te'ex qui'imac óolalil in xíimbaltique'ex ca'a téen, 16tin tucultaj in xíimbaltique'ex le quéen máanaquen u ti'al in binbal Macedonia, cu dzo'ocole' le quéen suunaquene' quin xíimbaltique'ex tu ca'a téen. Beyo' te'exe' cu páajtal a wáantiquene'ex u ti'al in binbal Judea. 17¿Ma' tu jaajil in wóol wa tin tucultaj in beetic lela'? ¿Ca tucultique'ex wa tene' quin beetic wa ba'ax je'el bix u beetic jun túul yóokolcaabil máac, táanil cu ya'alic bey, cu dzo'ocole' ma'? 18Ba'ale' c cha'a chi'itic u kaaba' Ku u ti'al c jaajcuntic, to'one' ma' táan c a'alic te'ex táanil bey, cu dzo'ocole' ma'. 19Tumen Jesucristoe' u Paal Ku, máax tze'ecta'ab te'ex tumen Silvano', Timoteo yéetel tene', mix jun téen tu ya'alaj bey cu dzo'ocole' ma'. Ti' Cristoe' le ma'alob péectzilo' mantadz cu ya'alic bey, 20tumen ti' leti' cu béeychajal tuláacal u dzaa t'aano'ob Ku. Le o'olale' le quéen c qui'iqui' t'aant Kue' c a'alic Amén tu yo'olal Cristo Jesús. 21Ku máax beetic ca jéedzeco'on to'on yéetel te'ex ti' Cristo yéetel dzo'oc u yu'ubico'on ti'. 22Dzo'oc u dzalco'on yéetel dzo'oc u dzáic Quili'ich Pixan ti' c pucsi'ikal je'el bix u chíiculal ti' le ba'ax bíin c kamo'.
23Tu yo'olal u cuxtal quin ch'a'a chi'itic u kaaba' Ku u ti'al u jaajcuntique' wa ma' xi'iquen Corinto je'el bix in tucultmaje' chéen tu yo'olal in ch'a'a óotzilil ti' te'ex. 24Ma' tumen c káat oques ta wóole'ex yéetel muuk ba'ax unaj a wocsaj óoltique'ex, tumen jéedzel a wanile'ex ti' le ocsaj óolo'; ba'ax cu yúuchule' to'one' c káat áante'ex u ti'al ca yanac te'ex u mas ya'abil qui'imac óolal.
Currently Selected:
2 Corintios 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992