2 Corintios 2
2
1Le o'olal tin tucultaj ma' in xíimbaltique'ex tu ca'a téen yéetel yaayaj óolal. 2Tumen wa teen quin beetic u yajtal a wóole'exe', ¿máax túun cun beetic u qui'imactal a wóol? Chéen te'ex máaxe'ex dzo'oc in beetic u yajtal a wóole'ex. 3Le o'olale' j dzíibnajen te'ex le je'el bix tin beetilaco', tumen unaj a dzáique'ex teen qui'imac óolal. Tumen jach in wojel le quéen in wu'uyinbáa qui'imac in wóole' tuláacale'ex can a wu'uyaba'ex qui'imac a wóole'ex xan. 4Tumen le ca tin dzíibtaj le ju'un tin túuxtaj te'exo', tin dzíibtaj yéetel u ja'il in wich, tumen tin wu'uyjinbáa jach okom yéetel jach yaj in wóol; ba'ale' ma' tin dzíibtaj u ti'al in dzáic te'ex yaayaj óolalo', ba'ale' u ti'al ca a wojéelte'exe' in yaacunaj ti' te'exe' jach nojoch.
Sa'atsaj si'ipil u ti'al máax tu beetaj kaas
5Ba'ale' wa yaan máax dzo'oc u dzáic yaj óolale', ma' ti' teen u dzaamai' ba'ale' quin tucultique' ti' te'ex tuláacalile'ex, wa ma' máan tip'a'an ba'ax quin wa'aliqui'. 6Le jaadz j dzaab ti' le máac tumen u asab ya'abil ichile'exo' ti'ibil yéetel lelo'. 7Bejla'e, ba'ax unaj a beetique'exe' a sa'atsique'ex yéetel a qui'imaccuntique'ex u yóol tu yo'olal ya'abcach yaayaj óolal. 8Le o'olale' quin káat óoltic ti' te'exe' ca a we'ese'ex tu ca'a téen ti'e' le yaacunaj yaan te'ex ti'o'. 9Dzíibnajen táanil tu yóokol lela', chéen u ti'al ca in wil wa je'el a beetique'ex tu tuláacal ba'ax quin wa'alic ti' te'exe'. 10Bejla'e túuna', le máax ti' ca sa'atsique'ex wa ba'axe', tac teen quin sa'atesic ti'. Tumen le ba'ax in sa'atsmaje' tin sa'atsaj ta wo'o'lale'ex tu táan Cristo, 11u ti'al ma' tu'usul tumen Satanás, tumen ma'alob c kaj óolmail u kaakas tuuculo'ob.
Pabloe' j máan tu caajil Troas
12Le ca j kuchen Troas u ti'al in tze'ectic u ma'alob péectzil Cristoe', je'ekabchaj teen jun p'éel jool naj u ti'al in meyaj tu yo'olal Yuumtzil. 13Ba'ale' in pucsi'ikale' ma' jeedzel u yóoli' tumen ma' tin wilaj c sucu'un Titoi'. Le o'olale', tin wa'alaj ti'ob: Táan in bine'. Ca j binen tu lu'umil Macedonia.
Tu yo'olal Cristo c dzáaacha'atmaj le kaaso'
14Ba'ale' nib óolal ti' Ku, máax mantadz cu beetic c dzáancha'atic le kaaso' tu yo'olal Cristo Jesús, yéetel t o'olale' cu dzáic ojéeltbil u ma'alob péectzilil, bey je'el bix jun p'éel ba'al jach qui'iboc cu t'i'it'pajal tuláacal tu'uxe'. 15Tumen u ti'al Kue' to'on u qui'iboquil Cristo yéetel cu t'i'it'pajal ti' le to'oclo'obo' bey xan ti' le cu sa'atalo'obo'. 16U ti'al le máaxo'ob cu sa'atalo'obo', le qui'iboca' bey jun p'éel booc cu quiimsaje', ba'ale' u ti'al le máaxo'ob cu to'oclo'obo', bey jun p'éel booc cu dzáic cuxtal ti'obe' ¿Máax túun jach ma'alob u ti'al lela'? 17Tu jaajile' to'one' ma' beyo'on le ya'ab máaco'ob cu conico'ob u t'aan Kuo'; ba'ale' tu yo'olal Cristoe' c t'aan yéetel jaaj óolal tu táan Ku, je'el bix máaxo'ob túuxta'ano'ob tumen Kue'.
Currently Selected:
2 Corintios 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992