2 Samuel 2
2
Davide' cu dza'abal u ajawt Judáa'
1Cu dzo'ocole' j Davide' káat chi'itnaj ti' Yuumtzile' ca tu ya'alaj ti': ¿U najmal wa in bin ti' wa ba'ax caajil ti' u caajilo'ob Judá?
Yuumtzile' tu núucaj ti': U najmal a bin.
David túune' tu káat chi'itaj: ¿Tu'ux u najmal in bin?
Yuumtzile' tu núucaj ti': Hebrón.
2Davide' j bin Hebrón yéetel u ca'a túulal u yatano'ob: Ahinoam, x jezreelil yéetel x Abigail u yatan ca'ach Nabal j carmelil. 3Tu bisaj xan u aj láakinajo'ob yéetel u láaktzililo'obe', ca j caajlajo'ob tu caajil Hebrón.
4Cu dzo'ocole', j kuch u j xiibilo'ob Judae', ca tu jun páaycuntajo'ob David, u ti'al ajawtal tu yóokol Judá.
Le ca j tzicbalta'ab ti' David u caajnáalilo'ob Jabes j Galaadilo'ob j muc Saúle', 5Davide' tu túuchi'itaj dze'edzec aj bisaj t'aano'ob a'alic ti'ob: Junab Ku bíin u qui' t'ante'ex úuchic a beetique'ex utz ti' Saúl a dzuulile'ex tu yo'olal ta mucajile'ex. 6Ku xan bíin u beet ti' te'ex utz yéetel jaaj óolal. Tene', bíin in beet ti' te'ex utz tu yo'olal le ba'ax ta beetaje'exo'. 7Ba'ale' bejela'e', yanac a wóole'ex yéetel j xiibchajque'ex, tumen quex dzo'oc u quíimil Saúl a dzuulile'exe', u ch'i'ibalo'ob Judae', dzo'oc u jun páaycuntiqueno'ob u ti'al ca ajawchajaquen.
Cu yantal ba'atel ti'ob Judá yéetel Israel
8Ba'ale' Abner, u paal Ner, u nojochil u aj ba'atelo'ob Saúle', tu ch'a'aj Is-boset u paal Saúle', ca tu bisaj Mahanaime', 9ca tu jun páaycuntaj u ti'al u ajawtal tu yóokolo'ob Galaad, Gesuri, Jezreel, Efraín yéetel tuláacal Israel. 10Is-bosete', yaan ca'ach ti' cuarenta ja'abo'ob ca tu chúunsaj u ajawtic Israel, tu beetaj u ajawil ca'a p'éel ja'ab. Ba'ale' u múuch' cajtalilo'ob u láaktzililo'ob Judae', David u ajawo'ob, 11Bey túuno', Davide' tu beetaj u ajawil Judá siete ja'abo'ob yéetel seis winalo'ob, u jalach caaj ca'ache', Hebrón.
12Abner túune' jóok Mahanaime', ca j bin Gabaón táanil ti' u aj ba'atelo'ob Is-boset. 13Joab u paal xan x Sarbia yéetel u aj ba'atelo'ob Davide', jóoko'ob Hebrone', ca tu nuptáantajuba'ob tu chuun u nu'uculo'ob tu'ux cu dza'abal ja' Gabaón. Le ca'a jaatz aj ba'atelo'oba', yanchaj jun jaatz ti'ob ti' jun tzéel u nu'uculo'ob le ja'o', yéetel u láak jun jaatze', tu láak jun tzéel. 14Abner túune' tu ya'alaj ti' Joab: Jóokoc u ti'al j ba'atel le j táanquelem j xi'ipaalal actáan ti' to'ono'.
Joabe', tu núucaj: ma'alob túun jóokoco'ob.
15Bey túuno', u ti'al ba'atel tu yo'olal Benjamín yéetel Is-boset u paal Saúle', j máano'ob táanil doce palitzilo'ob, yéetel u láak docee', tu yo'olal u aj ba'atelo'ob David. 16Tu jujun túulile', tu machaj u yéet ba'atel tu poole', ca tu ch'icaj u máascab tu ch'ala'atel, ca láaj lúubo'ob quimeno'ob. Let o'olal le cúuchil yaan Gabaono', j dzaab u kaaba'int Helcat-hazurim. 17Le ba'atelo', sen ooc yajil ti' le kiino', Abner yéetel u aj ba'atelo'obe', j pa'ab u muuko'ob tumen u aj ba'atelo'ob David. 18Te'elo', ti' ca'ach yano'ob óox túul u paalalo'ob Sarvia: Joab, Abisai yéetel Asael. Le u dzo'oca' cu yáalcab ca'ach sen chich bey jun túul quéej ti' jáanil lu'ume', 19ca j lacchaj u yáalcab tu paach Abnere', ma' tu cha'aj u púudzuli'.
20Le ca j paacatnaj Abner paachile', tu ka'am a'alaj: ¡Teech baaca'an Asael!
¡Asaele' tu núucaj: bey je'el bix a wilico', teen!
21Abner túune' tu ya'alaj ti': P'at a ch'a'apachtiquen. Asab ma'alob ca a mach jun túul ti' le palitzilo'obo', ca a láaj toc ba'ax cu bisic.
Ba'ale' tu yo'olal ma' tu yóoltaj Asael u jáawal u ch'a'apachtique', 22Abnere' tu ca'a a'alaj ti':
¡P'at a ch'a'apachtiquen, ma' a caxtic in beetic loob ti' teech! ¿Cu dzo'ocole' bix quin bin tu táan a sucu'un Joab?
23Bey tumen Asael ma' tu yóoltaj u tzelubáa tu yicnalo', Abnere' tu lomaj tu nak yéetel u lóomte', ca j jóok tu pu'uch, Asaele', j lúub quimen te'elo'. Tuláacal le máaxo'ob cu kuchulo'ob ca'ach tu'ux j lúub quimeno', cu wa'atalo'ob u yilo'ob. 24Ba'ale' Joab yéetel Abisaie', xi'ic u bin u ch'a'apachtico'ob Abner. Tu yocbal kiine', j kucho'ob tu jo'ol lu'umilo'ob Ama, le yaan actáan ti' Gía, tu bejil u x tocoy lu'umil Gabaón. 25Te'elo', le j benjaminitaobo', tu nupajuba'ob ti' Abnere', ca yanchajo'ob jun múuch'ili' tu ca'analil le pu'uco'.
26Abner túune' tu ka'am a'alaj ti' Joab: ¿Ma' wa bíin jáawac le quíimsaj winiquila'? ¿Ma' wa ta wilic chéen bíin u taas to'on yayaj óolal? ¿Ba'ax ca pa'atic u ti'al ca a wa'al ti' a aj ba'atelo'ob ca jáawac u ch'a'apachtico'ob u láako'ob?
27Joabe', tu núucaj: Quin jalach t'antic ti' teech tu kaaba' Junab Ku wa ma' ta wa'alic ti' teen le ba'ala', in aj ba'atelo'obe', bíin u ch'a'apachto'ob ca'ach u láako'ob tac u sáastal tu láak kiin.
28Joabe', tu ya'alaj tu séeblaquil ca jóopsa'ac le paaxo'obo', tuláacal le j xiibo'obo', tu p'atajo'ob u ch'a'apachtico'ob le j israelitaobo', tu p'atajo'ob xan u ba'atelo'ob tu yéetelo'ob. 29Abner yéetel le j xiibo'ob láakintmaile', xíimbalnajo'ob ti' u táax kóom lu'umil Arabá bul áakab, ca tu xot'ajo'ob bej iquil tu ch'actilaco'ob Jordán yéetel Bitrone', ca j kucho'ob Mahanaim.
30Joabe' tu p'ataj u ch'a'apachtic Abnere', ca tu much'quintaj u aj ba'atelo'ob, le ca tu t'anaj u kaaba'obe', tu yilaj j quíim diecinueve u nuuquil u aj ba'atelo'ob David, ti' quíimsa'ab Asael ichilo'obe'. 31Ba'ale' u aj ba'atelo'ob Davide', tu quíisajo'ob Trecientos sesenta u láaktzililo'ob Benjamín yéetel u aj ba'atelo'ob Abner.
32Cu dzo'ocole', u wíinclil Asaele', j bisa'ab Belene', ca j mu'uc tu mucnal u taata. Joab yéetel u aj ba'atelo'obe', j xíimbalnajo'ob bul áakabe', ca j kucho'ob Hebrón piknal u sáastal.
Currently Selected:
2 Samuel 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992