1 Juan 4
4
U Pixan Ku yéetel le pixan u p'ectmaj Cristóo
1In yaabilaj sucu'une'ex, ma' a wocsaj óoltique'ex tuláacal le máaxo'ob cu ya'alico'ob sáasilcunta'ano'ob tumen Kuo', ba'ale' túunte'exo'ob u ti'al a wilique'ex wa le pixan yaan ti'obo' u ti'al Ku wa ma'. Tumen le yóokolcaabo' táan u chu'upul yéetel tuuso'ob táan u ya'alico'ob táan u t'aano'ob tu kaaba' Ku. 2Ba'ale' te'exe' cu páajtal a kaj óoltique'ex ti' máax yaan u pixan Ku beya': Tuláacal máax cu kaj óoltic Jesucristoe' j taal je'el bix jun túul jaajil máaque', yaan u Pixan Ku ti'. 3Ba'ale' le máax ma' tu kaj óoltic Jesús beyo', mina'an u Pixan Ku ti' ba'ale' ti' leti'e' yaan le pixan u p'ectmaj Cristoo'. Te'exe' a wu'uymaje'ex bíin taalac le Pixano'; ma'alob túun, bele' ti' yaan yóokolcaabe'. 4Mejen paalale'ex, te'exe' u ti'ale'ex Ku, yéetel dzo'oc a dzáancha'atique'ex le j tuuso'obo'; tumen le máax yaan ti' te'exo' asab yaan u páajtalil ti' le máax yaan ti' le yóokolcaabilo'obo'. 5Leti'obe' yóokolcaabilo'ob; le o'olal cu ya'alico'ob u ba'alilo'ob yóokolcaab, yéetel le máaxo'ob yóokolcaabilo'obo' cu yu'ubico'ob. 6Ba'ale' to'one' u ti'alo'on Ku. Le máax u kaj óol Kue' cu yu'ubico'on; ba'ale' le máax ma' u ti'al Kue' ma' tu yu'ubico'on. Bey túuno' cu páajtal c kaj óoltic ti' máax yaan u pixanil le jaajo', yéetel ti' máax yaan u pixanil le tuuso'.
Kue' yaacunaj
7In yaabilaj sucu'une'ex, unaj c yaabilticbáa t baatzil, tumen le yaacunajo' ti' Ku u taal. Tuláacal máax cu yaacunaje' sija'an ti' Ku yéetel u kaj óol Ku. 8Le máax ma' tu yaacunaje' ma' u kaj óol Junab Kui', tumen Kue' yaacunaj. 9Kue' tu ye'esaj u yaacunaj ti' to'one' iquil tu túuxtilac u jun túulili' Paal way yóokolcaabe' u ti'al ca yanac to'on cuxtal tu yo'olal leti'. 10Le yaacunajo' leti' lela': ma' tumen to'on t yaabiltaj Kui', ba'ale' tumen leti' tu yaabiltajo'on to'one' ca tu túxtaj jun túul u paal u ti'al ca páatac u sa'atsa'al c kebano'ob tu yo'olal leti'.
11In yaabilaj sucu'une'ex, wa Ku bey tu yaabiltajo'ono', to'on xane' unaj c yaabilticbáa t baatzil. 12Kue' mix máac ilmajil mix bikin; ba'ale' wa c yaabilticbáa t baatzile', Kue' cuxa'an ti' to'on. 13U chíiculal cuxa'ano'on ti' Ku yéetel leti' cuxa'an ti' to'one' iquil u dzaamail to'on u Quili'ich Pixan. 14To'one' c ilmaj yéetel c a'alique' le Taatao' tu túuxtaj u Paal u ti'al u toc yóokolcaab. 15Je'el máaxac ca u ya'al Jesús u paal Kue', cuxa'an ti' Ku yéetel Kue' cuxa'an ti' leti'. 16Bey úuchic c ojéelt yéetel c ocsaj óolte' Kue' u yaabiltmajo'on. Kue' Yaacunaj; le máax cuxa'an ti' yaacunaje' cuxa'an ti' Ku, yéetel Kue' cuxa'an ti' leti'. 17Bey u kuchul yantal to'on jun p'éel utzil chuca'an yaacunajo', u ti'al ca yanac to'on kub óolal tu kiinil p'is óol; tumen to'one' beyo'on je'el bix Jesucristo way yóokolcaabe'. 18Tu'ux yaan yaacunaje' mina'an sajquili'. Ba'ale' le utzil chuca'an yaacunajo' cu jóokesic le sajquilo', tumen le sajquilo' yaan ba'al u yil yéetel jaadz. Le o'olale' wa yaan máax sajaque', tumen ma' kuchuc yantal ti'e' jun p'éel utzil chuca'an yaacunaji'. 19To'one' c yaabiltmaj Kue' tumen leti'e' tu yaabiltajo'on táanil. 20Ba'ale' wa yaan máax cu ya'alic: Tene' in yaabiltmaj Ku, ba'ale' u p'ecmaj u sucu'une', jun túul j tuus. Tumen wa jun túul máac ma' táan u yaabiltic u sucu'un, máax táan u yilique', ma' táan u páajtal u yaabiltic Ku máax ma' táan u yilic. 21Leti'e' u dzaamaj to'on le a'almaj t'aana: le máax u yaabiltmaj Kue' unaj u yaabiltic xan u sucu'un.
Currently Selected:
1 Juan 4: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992