1 Corintios 2
2
U péectzilil Cristo máax quíim ti' cruz
1Ba'ale' sucu'une'ex, le ca j binen in tze'ect ti' te'ex le jaaj cu taal ti' Kuo', ma' tin tze'ecta yéetel talan t'aano'obi'. 2Tumen le ca j yanchajen ichile'exe', ma' tin wóoltaj in wojéelt u láak ba'al wa ma' chéen Jesucristo, le máax si'in ti' cruzo'. 3J taalen ta táane'ex yéetel x ma' muuk óolal, táan in quiquilanquil tumen sajaquen, 4yéetel le ca j t'aanajen le ca tin tze'ectaj te'ex le ma'alob péectzilo', ma' tin wóoltaj in tzol xiquinte'ex yéetel u t'ano'ob máaco'ob canbalnaja'ano'obi'. Ba'ale' tin tzol xiquinte'ex yéetel Quili'ich Pixan bey xan yéetel u páajtalil Ku, 5u ti'al ca jéedzec a wocsaj óolale'ex yóokol u páajtalil Ku, ma' yóokol u na'at máaco'obi'.
Kue' cu dzáicuba kaj óoltbil tu yo'olal u Quili'ich Pixan
6Ba'ale' c a'alic t'aano'ob chuup yéetel na'at ichil le máaxo'ob dzo'oc u ch'íijilo'ob ti' u yocsaj óolo'obo'. Ba'ale' le na'ata' ma' u yóokolcaabili' mix joka'an ti' u nuuctaquil le yóokolcaaba', máaxo'ob séeba'an u mina'achajlo'ob. 7Táan c t'aan tu yo'olal u ta'acbil na'at Ku, tu yo'olal le ta'acbil tuucul yanji ti' Ku, ma'ili' u beet u yóokolcaabe' u ti'al u toquico'on u ti'al kiino'ob mina'an u xuul. 8Mix jun túul ti' u jalachilo'ob yóokolcaab tu na'ataj lela', tumen wa ca u na'ato'obe' ma' táan ca'ach u sinico'ob ti' cruz le nojbe'en Yuumtzilo'. 9Ba'ale' je'el bix cu ya'alic le Quili'ich Dzíibo': Kue' u nu'uctmaj, u ti'al le máaxo'ob u yaabiltmao' Kuo', ba'alo'ob ma' ila'an mix u'uya'an, mix tuculta'an tumen mix máaqui'. 10Leti' le ba'alo'ob tu beetaj Ku c kaj óoltic tu yo'olal u Quilich Pixano', tumen le Quili'ich Pixano' cu xaklic tuláacal, tac u jach ta'acbil ba'alo'ob Ku. 11Ichil máaco'obe', ¿máax je'el u yojéeltic ba'ax yaan tu pucsi'ikal máac wa ma' chéen le pixan yaan ti'o'? Bey xan chéen u Quili'ich Pixan Ku cu páajtal u yojéeltic ba'ax yaan ti' Yuum Ku. 12To'one' ma' t kamaj u pixan yóokolcaabi' ba'ale' le pixan cu taal ti' Kuo', u ti'al ca c na'at le ba'alo'ob u dzaamaj to'on Ku ichil u yutzilo'. 13To'one' c a'alic le ba'alo'oba' yéetel t'aano'ob u ca'ansmaj to'on u Quili'ich Pixan Ku, ma' yéetel t'aano'ob c canmaj chéen yéetel na'ati'. Bey c tzoolic le pixanbe'en ba'alo'obo' ti' le máaxo'ob yano'ob ti' le Pixano'.
14Le máax mina'an ti' le pixano' ma' tu kamic le ba'alo'ob cu taal ti' u Quili'ich Pixan Kuo', tumen u ti'al leti'e' chéen báaxal t'aano'ob. Ma' tu páajtal u na'atic xan tumen le ba'alo'oba' kabéet u na'ata'al yéetel pixanbe'en tuucul. 15Ba'ale' le máax yaan Quili'ich Pixan ti'e' cu páajtal u xakaltic bix yanil tuláacal ba'al, ba'ale' leti'e' ma' tu páajtal u xakalta'al u tuucul tumen mix máac. 16Tumen le Quili'ich Dzíibo' cu ya'alic: ¿Máax dzo'oc u na'atic u tuucul Yuumtzil? ¿Máax cu páajtal u ca'ansic Ku? Ba'ale' yaan to'on u tuucul Cristo.
Currently Selected:
1 Corintios 2: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992