Málkúsi 16
16
Yɛɛ́so a á zím ánɛ lewhʉ̄
(Mat 28.1-8; Lúk 24.1-11; Jáŋ 20.1-10)
1Aleʼé aswite mɛ́t á kó mmī, Malía mɔ́ Makdala, mbɔɔ Malía mía Jáak, ŋ́ghʉ̄ á Salomɛ, é gʉɔ nzó á alamńda, ńdɔkɔ ŋgʉ̄ɔ mé nzɔʼɔ́ apfhō Yɛɛ́so. 2Njhʉ̄ é lá etsōʼ etsōʼ nzemɛ́nzēm, tɛ nu á nɔŋ esáʼa, ŋ́gɔ́ mvhɔ aleʼé ánɛ ŋgap alāʼ, pɔ́ nɔŋ ŋgʉ̄ɔ á lesi egā, 3ńziŋɛ ndʉ́ɛ́ á tsetsɛlɛ pɔ́p ŋ́gɛ: «Awɔ́ a a kó ekʉŋte á tɔ́ yīi, mɛ́ ke lɔ̄k ŋkápte nchu lesi, éyá á yímpɛ ɛ̄?» 4Ŋ́gʉɔ ŋkó éwú, ńcʉte njʉ́ɔ mbɔ, mɛ́ mbēkne á mía mía tɔ́ mɛ́t, á nchu lesi. 5Pɔ́ zíʼ ŋkó á ntē lesi, ńjʉ́ɔ mmɔʼ mɔ́ ŋgwɛso á náŋ á esī á ŋkɔʼɔ́ apū ete, ḿmāʼ á fhɔ́ nzhó, pɔ́ jʉ́ɔ épúp, ḿbú ncɔ̄ʼ tɛʼ. 6Tɛ́ á lé á mbū pɔ́p ŋ́gɛ: «Ndɛ́ʼ pɛ ezéŋ ncɔ̄ʼ, meŋ á zhɛ́ ŋ́gɛ, pɛ faʼa á Yɛɛ́so ŋiŋ Naázalɛt, páʼ mɛ́ ke kwɛtē á yí ánɛ mbaŋne paŋné. A á nzím ánɛ lewhʉ̄. A te zɛ́t ega á. Ajʉʼ zīi mɛ́ ke féŋ á yí éwú, a ejʉɔ. 7Pɛ egʉ̄ɔ tsetsɔŋɔ, ńtswī á mbū nnɔ Yɛɛ́so, mbɔɔ á mbū Piɛ ŋ́gɛ: «A á pik á Ŋgaliléa á nzwíʼte pɔ́p. Pɔ́ e kó éwú tɛ́ ejʉ́ɔ á yí, páʼ a le lé me pɔ́p épúp. » 8Além zɔ́p á tsɔ́ʼɔ, pɔ́ fhó á lesi ntó ŋkʉ̄, ŋgʉ̄ɔ tɛ ŋgia é sak, ńziŋɛ mvɛ̄tɛ, tɛ́ ŋké te anu á mbū ŋiŋ lé, melaʼ mīi pɔ́ lɛ si mbúu mbɔ́kɔ tɛʼ.
Mɛ́ é ega njʉ́ɔ á Yɛɛ́so, mbɔ a á zím ánɛ lewhʉ̄
[ 9Yɛɛ́so a le zím ánɛ lewhʉ̄ melanjhʉ̄, ánɛ mvhɔ aleʼé ánɛ ŋgap alāʼ páʼa, ńzī mvhɔ, ńtswī nnɛ̄t zi á mbū Malía mɔ́ Makdala, éyi a le jūŋ mesī ánɛ yí é esambīa. 10Malía mɛ́t á lɛ ŋgʉ̄ɔ mbɛ́te menu muɔ mɛ́t, éshúŋ epuɔ pīi pɔ́ a Yɛɛ́so é kɛɛ́ nziŋɛ. Mbɔ pɔ́ é ŋgɔ́ si nnɔŋ mmēkɛ, ńnɔŋ ndāa. 11Pɔ́ júʼ á légɛ Yɛɛ́so a zɛɛ́t nte, tɛ mbɔ a ke jʉ́ɔ á yí, pɔ́ té véŋ.
12Á tɔ́k épúp, Yɛɛ́so á zéŋ ntwī nnɛ̄t zi ntií ndɛʼɛ, á mbū megaŋ nnɔ pí mémpīa, mbɔ pɔ́ ŋgɔ́ á mɛnzhɛ nnɔ̄ŋ efhɔ́ɔ á tésɔŋ ŋgʉ̄ɔ mé alāʼ. 13Pɔ́ piŋ nzem, ḿbɛ́te eshúŋ mmɔʼ nnɔ wɔ́p. Pɔ́ zéŋ te áa véŋ.
14Ŋ́gē emakne, Yɛɛ́so á ŋwak á mvhɔ megaŋ nnɔ pí, épuɔ ntsɔp zɛ́mɔʼɔ́ mé legēm. Mbɔ pɔ́ nnáŋte á esī, ńnɔŋ mpfɛ́tɛ azō. Yɛɛ́so á thú wɔ́p, melaʼ leghi tsɔ́p á letsɛ̄lɛ, mbɔɔ páʼ pɔ́ é lʉʼ á levēŋ menu mīi, emɔ̄ʼ epuɔ é ke shúŋ á wɔ́p, ŋ́gɛ pɔ́ njʉ́ɔ á yí mbɔ a á zím ánɛ lewhʉ̄. 15Ńdé á mbū pɔ́p ŋ́gɛ: «Pɛ egʉɔ ŋkʉ́ʼne á ŋgɔŋ esī atsetsáʼ ntsem, ńtswī ŋke mbɔŋ á mbū nzwɛt ŋiŋnɔŋ ntsem. 16Ŋiŋ yīi a á véŋ ŋke mbɔŋ mɛ́t, mɛ́ noʼ á yí á ntshi, a a shʉʼ etswɛ́te. Ŋiŋ yīi a ka véŋ ɛ́, a eláʼ ndákne. 17Epuɔ pīi pɔ́ e shʉʼ evéŋ, meŋkʉʼne anu muɔ páʼa, e shʉʼ eghʉ mɛ́ ezhɛ́ á wɔ́p: pɔ́ e shʉʼɛ elɔkɔ lezēŋ tsá, éjuŋɔ mesī ánɛ epuɔ, éshúŋnɛ melāʼ, mbɔ pɔ́ la zíʼnɛ ɛ́. 18Pɔ́ shʉʼɛ ndɔ̄k mbū mɔ́p ŋgɔ̄ nnū, kɛɛ́ nnú mecɔp lɛ̄ɛ, mbɔ amɔ̄ʼ azō á gɔ le wɔ́p ghʉ. Pɔ́ shʉʼɛ ezápa mbū mɔ́p á athū megaŋ agɔ, pɔ́ etʉ̄ɛ̄. »
Yɛɛ́so a á ega mbīŋɛ nzem mé lephū
(Lúk 24.50-53; MeM 1.9-11)
19Atsyapuɔ Yɛɛ́so á shúŋne á mbū nnɔ yí épúp tɛ mīi, Ndém á ghʉ á kɔ́ʼ mé lephū, ńnáŋ á ŋkɔʼɔ́ apū ete yí. 20Megaŋ nnɔ Yɛɛ́so ntsem é pú ŋgʉ̄ɔ, ŋ́kʉ́ʼne ejʉʼ tsem ntswī ŋke mbɔŋ. Atsyapuɔ á nɔŋ ntswítɛ á wɔ́p ánɛ afaʼ jʉɔ mɛ́t, ḿbiŋɛ ŋghʉ̄ɛ pɔ́ ghʉɛ meŋkʉʼne anu, e nɔŋ ntswīi á légɛ, ŋke mɛ́t é fhɔ́ɔ á mbū Ndém#16.20 Emɔ̄ʼ meŋwaʼne mīi é fhoó ŋguʼ, é té mekém 9-20 éwɛ..]
Currently Selected:
Málkúsi 16: ybb
Highlight
Copy
Compare
Share
Want to have your highlights saved across all your devices? Sign up or sign in
© CABTAL
