Málkúsi 13
13
Yɛɛ́so a á ega eshúŋɔ páʼ Mía Ŋgyā Ndém a a shʉʼ egɔ́ ntak také
(Mat 24.1-3; Lúk 21.5-7)
1Yɛɛ́so á kó nnɔ̄ŋ efhɔ́ɔ á Mía Ŋgyā Ndém ntúɔ́, mmɔʼ ŋiŋ nnɔ yi á lé á mbū yí ŋ́gɛ: «Mɔʼɔ́ wek, cʉ nzāʼ meŋgyā ega njʉ́ɔ. Jʉ́ɔ emɔ̄ʼ mepɔŋ metɔ́ pīi mɛ́ le lɔ̄k mbɔ́. » 2Yɛɛ́so á pwɛt á mbū yí ŋ́gɛ: «O ó si njʉ́ɔ mepɔŋ meŋgyā muɔ ɔ? Ké nzhɛ́ á légɛ, mɛ́ e shʉʼ epú ekem, tɛ tɔ́ a á le zɛ́t ánɛ mmɔʼ nzápne ɛ́. »
3Yɛɛ́so á ghʉ nnáŋ á ndo lekwɛ̄t Methʉ́ Olive, tɛ nnɔ̄ŋ njʉ́ɔ á Mía Ŋgyā Ndém á nzéŋ mmɔʼ. Piɛ pɔ́ Jáak mbɔɔ Jáaŋ ŋghʉ̄ Aŋdlɛya, é fak nnɛ̄t nzɛ́tte á yí ŋ́gɛ: 4«Lɛ eshúŋ á wék afʉʼ zīi, anu zīi o ó lé lā, a láʼa ŋgɔ̄ á ntɔ́kɔ. Akɔ̄ ayiŋne á láʼ etswi á légɛ, menu mɛ́t ntsem é si ŋgɔ̄ á eshʉʼɛ ɛ́?»
Yɛɛ́so a á ega eshúŋɔ anu ŋgʉɔ̄ʼ zīi, e é si eshʉ̄ʼɛ
(Mat 10.17-22; 24.4-14; Lúk 12.11-12; 21.8-19)
5Yɛɛ́so á lɛ nzī á leshūŋ á wɔ́p ŋ́gɛ: «Pɛ epá, ndɛ́ʼ pɛ ecʉ́ʼ, ŋiŋ á ghʉ pɛ efāa nzhɛ. 6Epuɔ tɛ nzáne é shʉʼ elɔk lezēŋ tsá, éshʉʼ á mvhɔ pɛ, awíɛ awíɛ a enɔŋ ndʉ́ɛ́ ŋ́gɛ, yí mé Nzaʼ‑Ŋkhʉ. Élé épúp, élɔk eghʉ, atʉtʉ epuɔ a efhó ánɛ mɛnzhɛ mbɔŋ ntó. 7Pɛ shʉʼɛ nnáŋ tɛ njúʼ mɛ́ nɔ̄ŋ ŋghítɛ ncu á ntē alāʼ, ńnɔ̄ŋ ŋghítɛ ncu yīi é si eshʉ̄ʼɛ, ndɛ́ʼ pɛ epɔ́k. Ecʉɔ etsō mɛ́t é pɔŋteé á lezi mvhɔ ntɔ́k, tɛ́ ŋké le ndɔ̄kɔ ŋ́gɛ, ŋgɔŋ e gɔ ezho emi í. 8Epuɔ taʼ alāʼ e shʉʼ enáŋ tɛ epʉ́ʼɛ nnɛ̄t, égʉɔ elʉɔ́ʼ amɔ̄ʼ. Mmɔʼ efɔ a elū á esī, ńdʉɔ́ʼ mmɔʼ. Atsáʼ a ecʉ̄ʼne ejʉʼ ejʉʼ, afʉɔne a ewhʉ̄. Menu muɔ mɛ́t e gɔ́ páʼā, ŋ́gɔ́ nzií ŋgʉɔ̄ʼ, ŋ́gʉɔ̄ʼ menzwí yīi, mɔ́ a á si nzīi á lezāŋ á yí.
9Pɛ egē enáŋ, ńnɔŋ mbípɛ ntií ŋgʉɔ̄ʼ zīi, é gɔ eshʉʼe ánɛ pɛ. Mɛ́ e shʉʼ eshuŋne á wɛ́, élɔk egʉɔ mé mvhɔ asāʼ, égɔ á wɛ́ á ntē meŋgyā aswiŋte, étswá. Éshuŋne á wɛ́, élɔk egʉɔ á mvhɔ wɔ sáʼ‑ŋgɔŋ pɔ́ a mefɔ, pɔ́ eŋāk á wɛ́, melaʼ mīi pɛ é epuɔ pá. A egɔ́ épúp, pɛ elɔk eshúŋ á wɔ́p á ajū mīi, pɛ é si nzhɛ́ɛ ánɛ meŋ. 10Á gɔ́ɔ lɛ, mɛ́ eké nté njhʉ̄ ntswī ŋke mbɔŋ á mbū ŋgɔŋ ŋgɔŋ, tɛ́ menu muɔ mɛ́t e etɔ́k.
11Mɛ́ shʉʼɛ ŋgɔ̄ á wɛ́, ńnɔ̄ŋ eshūŋnɛ á wɛ́ ndɔkɔ ŋgʉ̄ɔ mé mvhɔ asāʼ, ndɛ́ʼ pɛ eté njhʉ̄ nzāp nnɛ̄t ŋ́gɛ, pɛ e kó elé egɛ akɔ̄ lɛ́. Afʉʼ mɛ́t á shʉʼɛ ŋkūʼ, Ndém á ghʉ̄ lɛ pɛ elé lɛ akɔ̄ lɛ́, pɛ elé épúp, melaʼ mīi aziɛ́ afʉʼ, pɛ mé le zɛ́t eshúŋnɛ ɛ́, Azwakne zí mé ecʉ́ʼɛ eshúŋnɛ ajʉʼ pɛ. 12A láʼ ekuʼ afʉʼ mɛ́t, méŋ mɔ́ a eswīŋ mmɔʼ, ŋ́gɛ mɛ́ ezwhí. Mɔʼɔ́ mɔ́ a ezéŋ ŋghʉ̄ azí épúp ánɛ méŋ yi. Ewɔŋkhʉ̄ e esɛnne ndʉɔ́ʼ memɔʼɔ́ pɔ́ a memía pɔ́p, ŋ́ghʉ̄ mɛ́ ezwhíte á wɔ́p. 13Epuɔ metsem e shʉʼ epú epa á wɛ́ melaʼ mīi, pɛ é epuɔ pá. Táʼ, ŋiŋ yīi a á ŋíŋ ánɛ meŋ tɛ ndáʼ nzōko, Ndém a eghʉ̄, a etswɛ́t. »
Yɛɛ́so a á ega ŋkɛ́ʼtɛ ayiŋne zīi, á tswii á mía ŋgeŋge
(Mat 24.15-25; Lúk 21.20-24; 17.23; 21.8)
14Yɛɛ́so á zéŋ ndé ŋ́gɛ: «Pɛ shʉʼɛ njʉ́ɔ á Píkɛ́ Píkɛ́, á tɛ‑avhō, á náŋ ánɛ ajʉʼ zīi, á kaá mbɔ̄ŋ ŋ́gɛ, a enáŋ éwú ú. Epuɔ pīi é ntē apak ŋgɔŋ Yudéa, é kʉ mbē mé mekwɛ̄t. Ntɔŋɔ ajʉʼ aŋwaʼne jʉɔ, a echʉ́ nnɛ̄t njúʼ. 15Menu muɔ mɛ́t é ge etɔ́ke, ŋiŋ á gɔ́ á athʉ́ ŋgyā yí, ndɛ́ʼ á sóʼo tɛ ŋ́gɛ, yí e kó á ŋgyā, épɛ́ azō elɔk ekʉʉ. 16Ndɛ́ʼ ŋiŋ yīi a á ŋgɔ́ á ŋkāʼ, á piŋ nzem á mba tɛ ŋ́gɛ, yí gɔ á mbɛ́ nzhó efwɔ̄k zi. 17Yɛɛ́ ŋgʉɔ̄ʼ zīi wɔnzwí pīi é ŋgɔ Ndém, pɔ́ a wɔ mévho, é láʼa ŋgɔ̄ á njʉ́ɔ ánɛ meleʼé mɛ́t lée. 18Pɛ eswíŋte á Ndém ŋ́gɛ, ndɛ́ʼ menu mɛ́t é tó afʉʼ mbeŋ. 19Pɛ eswíŋte melaʼ mīi, a láʼ ekuʼ ánɛ meleʼé mɛ́t, epuɔ menɔŋ epú njʉ́ɔ ŋgʉɔ̄ʼ tɛ mbɔ pɔ́ la mmɔʼ épúp jʉ́ɔ ɔ́, tɛ efhó páʼ Ndém a le nɔ̄ŋ ŋgɔŋ, éshʉʼ ntshí tsetsɔŋɔ, épīŋ le láʼ nzéŋ mmɔʼ épúp njʉ́ɔ ɔ́. 20Ŋ́gɔ́ éyi Atsyapuɔ a kɛ te wíʼe mvéŋ ŋ́gɛ, yí e shʉʼ etswɛ́tte nzwiŋ eleʼé alāʼ mɛ́t ɛ́, mbɔ tsɔ taʼ ŋiŋ a te shʉʼ evuʼu ú. Táʼ, a le ké ntswɛ́tte, melaʼ epuɔ pí pīi, a le tsɔ́ʼē. 21Afʉʼ mɛ́t á shʉʼɛ ŋkūʼ, ŋiŋ á lé á mbū pɛ ŋ́gɛ, ayi Nzaʼ‑Ŋkhʉ a á ega lāa, kɛ́ ŋ́gɛ, a ayi a á ege lée, ndɛ́ʼ pɛ evéŋ ajū mīi, ŋgaŋ a lʉ́ɛ́. 22Emɔ̄ʼ epuɔ e shʉʼ elu á esī, étáŋ mela gɛ, pɔ́ é wɔ Nzaʼ‑Ŋkhʉ, emɔ̄ʼ e etáŋ mela ŋ́gɛ, pɔ́ é metswi‑ŋke Ndém, énɔŋ eghʉɛ meyiŋne anu pɔ́ meŋkʉʼne anu, élɔkɔ epɔptɛ epuɔ, tɛ ŋgɔ́ yīi, pɔ́ gɔ ezéŋ ḿbɔ̄pte epuɔ pīi, Ndém a le tsɔ́ʼ á wɔ́p, ŋ́gɛ pɔ́ egɔ́ epuɔ pí. 23Pɛ eké mbá, meŋ á té njhʉ̄ eshúŋ á wɛ́ ajūɔ tsem zīi, a fú etɔ́ke.
24A láʼ ekuʼ ánɛ meleʼé mɛ́t, afʉʼ ŋgʉɔ̄ʼ a etɔ́k tɛ mmī, lezēk nu e epí, lezēk saŋ é le zéŋ ejʉʼ ŋkɛ̄ʼɛ ɛ́. 25Mecɔʼ saŋ e efhó á lephū esóʼo mbwɛ̄t á esī, ecū mīi, é pɔɔ́ŋ mbʉʼ á lephū, e ecʉ́ʼɛ ncʉ̄ʼne cʉʼne. 26Mɛ́ elɛ njʉ́ɔ Méŋ‑Ŋiŋnɔŋ a elɔ̄k á mía mía mete pɔ́ shʉ́shɔ́k, éshʉ̄ʼ á ntē alɔ. 27Ńtó mecɔʼ Ndém á ntē ŋgɔŋ meshhʉ̄ lekua, tɛ efhó mmɔʼ eshhʉ̄ esī atsetsáʼ, ŋ́gʉɔ ŋkó mmɔʼ. Pɔ́ egʉ̄ɔ, ńcúʼte epuɔ pīi, Ndém a le tsɔ́ʼ á wɔ́p, ŋ́gɛ pɔ́ egɔ́ epuɔ pí, ńdɔk eshʉ̄ʼ mé lezēŋ tsí.
Athʉ́ zīi mefho mí é gɛ ŋkwhūnɛ
(Mat 24.32-35; Lúk 21.29-33)
28«Pɛ epɛ́ efʉʼ ánɛ athʉ́ zīi, mefho mí é gɛ ŋkwhūnɛ. Mefho mí é kwhuneē tɛ á piŋ ŋghʉ̄ nzī á letɔ̄p, pɛ zhɛ́ ŋ́gɛ, mbeŋ e é si ŋgɔ̄ á mbiŋɛ́. 29Ndeŋ ndeŋ épúp, pɛ shʉʼɛ njʉ́ɔ emuɔ menu mɛ́t é nɔ̄ŋ ntɔ́kɔ, pɛ zhɛ́ ŋ́gɛ, Méŋ‑Ŋiŋnɔŋ a á si eshʉ̄ʼɛ. Ŋ́gɛ a á shʉʼ tɛ ŋgɔ́ á nchu ŋgyā. 30Meŋ a shúŋ á wɛ́ á kwaʼ anuúnē: epuɔ ŋguʼ puɔ é té shʉʼ ekwhʉ́te metsem, té gɔ́ yīi, emuɔ menu mɛ́t ntsem é shʉʼ ɛ́. 31Lephū pɔ́ esī atsetsáʼ e fú epú emii, táʼ, ashuŋne zá a epú nzɛ́t áa épúp.
Ndém yí méŋwɛ̄t mé zhɛɛ́ á nzoknzem aleʼé
(Mat 24.36-44)
32«Táʼ, ŋiŋ a gɔ le zhɛ́ aleʼé zīi, menu muɔ mɛ́t é gʉɔ mé ntɔ́kɔ ɔ́, ḿbīŋ le njhʉ̄ zhɛ́. Mecɔʼ Ndém á athʉ́ lephū é té si nzhɛ́ɛ azɔ́p ɔ́, tɛ mbɔɔ Méŋ Ndém. Ndém Mɔʼɔ́ yíléyī mé si nzhɛ́ɛ. 33Páʼ pɛ ka zhɛ́ afʉʼ zīi, menu mɛ́t e shʉʼ egɔ́ɔ lā, pɛ elāk athū zɛ́, ndɛ́ʼ ŋiŋ á lí. 34Anu aleʼé mɛ́t, á swhií anu ŋiŋ yīi, a á si ŋgʉ̄ɔ mé leziŋ. Ŋ́gē etó á mba, ńtsékne megaŋ afaʼ éwú, ŋ́gyá azi afaʼ awíɛ awíɛ, ńdé á mbū mbio‑mba ŋ́gɛ, ndɛ́ʼ á cʉ́ʼ ndí. 35Púp, ndɛ́ʼ ŋiŋ á lí, melaʼ mīi pɛ ka zhɛ́ afʉʼ zīi, ŋgaŋ mba a gɔ á ŋkɔ́ʼ ɔ́. Kɛ a a kɔ́ʼ eseéŋ‑njhʉ̄ lɛ́, kɛ tée‑etsōʼ lɛ́ɛ, kɛ ŋkʉɔʼ a ge etɔ́ŋ, tɛ́ a ekɔ́ʼ lɛ́ɛ, kɛ a a kɔ́ʼ nzemɛ́nzēm lɛ́ɛ. 36Ndɛ́ʼ á ge etɔ́kne á wɛ́, pɛ enɔ̄ɔŋ ndíi. 37Anu zīi meŋ ndʉ́ɛ́ á mbū pɛ lā, meŋ mbúu ndʉ́ɛ́ á mbū epuɔ metsem, ŋ́gɛ: ndɛ́ʼ ŋiŋ á lí. »
Currently Selected:
Málkúsi 13: ybb
Highlight
Copy
Compare
Share
Want to have your highlights saved across all your devices? Sign up or sign in
© CABTAL
