Rom 1

1À ya mo Pɔl, wə̀d àfàʼì Yeso Kristo ŋwàʼri àŋwàʼrì azo̰. Ŋwiye ya chɔʼ amə gha mə yaʼ wə̀dtɔm Kristo. Wì ya bə̀ chɔʼ amə ane ni gha mə̀ chete ikən chɔm imbə̀ʼ Yeso Kristo. 2Ŋwiye ya fə bì kàʼ ikən chɔm gho̰ anjìm bədkə̀n məd. Mbɔb ya ŋwàʼrì imbə̀ʼ ikən chɔm gho̰ inga Àŋwàʼrì Ŋwiye. 3Ikən chɔm gho̰ ya imbə̀ʼ Ŋwan məd. Icheg wə̀d-aku, mbi ya gwi aməd inga inəbi fɔn Dèvid. 4Si ya gha, ane icheg Azwighi ìzḛzḛ, Ŋwiye ya chwi gha Yeso Kristo Anɔŋisəg ya ìwi Ŋwan. Wì ya chwi ane icheg ne wì ya zwemni aməd ane iwu ane ika Azwighi məd. 5Ŋwiye we chè anjìm Ŋwan məd we ni ghì ìchɔ̀mì ina. Ane, mba ya bə̀ bədtɔm Kristo imbə̀ʼ chètì inug imbə̀ʼ aməd abə bəd məjìm inga iben ijìm igun isəg. Àzo̰ biri ghì bəd nɔ̀ŋì ìwɔb ibḛfiŋ igun məd bə̀ zùgri aməd. 6Mbə̰ inən mbe bə̀ abɔ̀ʼ bəd mbe ne Ŋwiye ya chɔʼi gha mbe yaʼ bəd ìmbi Yeso Kristo.

7Ane, mə̀ ya ŋwàʼrà anìŋ abə bəd Kristo məjìm mbe ne yaʼi a Rom. Ŋwiye taŋ kɔ̀ŋ awən bə̀ chɔʼ awən gha mbə̀ yaʼ ìmbi bəd. Ŋwiye ìwa Mbaʼ fɔrɔ Anɔŋisəg Yeso Kristo ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Pɔl taŋ kə̀b ni ghò mùg bəd Kristo mbe a Rom

8Anug mbègtog ya gha, mə nàʼ məyakà abə ìmə Ŋwiye imbə̀ʼ awən anjìm Yeso Kristo imbə̀ʼ icheg ne bəd inga isəg ijìm mbe ghàmà inug chɔm imbə̀ʼ ìwən ibḛfiŋ we ne mbə̀ beri. 9Ŋwiye we ne mə fàʼà ibo kwàʼ ane ìmə fìŋ ijìm ni chètì ikən chɔm imbə̀ʼ Ŋwan məd, məd kyèri kwàʼ tesiʼ gha mə we wènde awən kwàʼ aghəm ajìm, anyumə̀ ne mə̀ chàʼrà Ŋwiye. 10Icheg ne mə̀ taŋ kə̀b ni bàd awən, mə we bòʼo ibo abə Ŋwiye gha wì fiʼe inɔnjì inum ni ghì gha mə̀ yeʼe bàd awən. 11Mə ya bòʼo ibo ibo ane imbə̀ʼ icheg ne mə̀ kɔ̀ŋ ni bàd awən ni ghì gha mbə̀ bere ineʼi we ne Azwighi Ŋwiye ze nàʼà imbə̀ʼ təm kà. 12Anug ze ne mə̀ kə̀bə̀ ni ghà ya gha, tì wete ìwa ibḛfiŋ mba mba. Mbə̀ wete amə, mə̀ bə̀ wètì awən. 13Ìmbum məfi fɔrɔ ìtum njàbi ne tì yaʼi ane ifɔti tì Kristo, mə kə̀b gha mbə̀ kyeri gha, mə̀ ya chuʼri nyɔd aghəm nɔʼ nɔʼ ni yeʼe bàd awən ni ghì gha bəd mɔ̀ʼɔ bḛ Yeso icheg ne mə̀ ya bə̀ ghì abə mbin tì bəd ne kayi mə̀Ju. Si ya gha, inug mɔ̀ʼɔ ya təmni amə.

14Mə bèrì anug ne mə̀ mənyìʼ fàʼ abə bəd məjìm: Mə bèrì ni fàʼ abə mə̀Grig#1:14 bəd mbe ne beri iwe fɔrɔ abə bəd mbe ne kayi mə̀Grig#1:14 bəd mbe ne kiri yaʼi izimi, bə̀ fɔrɔ abə bəd mbe ne kyeri anug fɔrɔ abə bəd mbe ne yaʼi abəŋ. 15À ya aton ze ne mə kə̀bə̀ ni chètì ikən chɔm gho̰ inən mbə̰ bəd ne yaʼi a Rom.

Ika ne ikən chɔm beri

16Chəyi mə bèrè tìnìrètog imbə̀ʼ ikən chɔm gho̰ ka; à ya ika Ŋwiye we ne pùmnə bəd məjìm ne nɔŋi ibḛfiŋ igun məd. Ikən chɔm gho̰ ya bì yaʼ abə mə̀Ju bɔŋ bəd ne kayi mə̀Ju. 17À ya ikən chɔm gho̰ we tòʼrò icheg ne Ŋwiye ghi bəd təm kòʼ ibo imbìghè. Ikən chɔm ya chwìye gha bəd mbe ne təmi kòʼ ya ko ane ibḛfiŋ bə̀ nwḭ̀yḛ̀ ane ibḛfiŋ. À ya kwàʼ icheg Ìngam Ŋwiye we ne gha, “Wə̀d ne ibḛfiŋ məd igun Ŋwiye ghi wì təm kòʼ, tengàŋ biri jəg ìtḛ̀”#1:17 “Wə̀d ne təmi kòʼ biri jəg ìtḛ̀ anjìm icheg ne wì nɔŋi ibḛfiŋ igun Ŋwiye.”.

Agaŋ Ŋwiye ze igun bəd

18Agaŋ Ŋwiye fə yeʼe tikaŋ igun bəd məjìm ne ghìyə̀ inug tibɔ̀ŋ imbə̀ʼ icheg ne chəyi ìwɔb ikuchèg we nàʼà apan gha bəd kyeri tesiʼ. 19Ane, Ŋwiye ya chə awɔb imbə̀ʼ icheg ne wì ya fə ghì anug ne mbɔb ya kòʼi ni kyeri imbə̀ʼ aməd Ŋwiye ze dù zen inɔb. 20Nɔ̀ʼ ane nyumə̀ ne Ŋwiye ya tangi isəg, məd Ŋwiye fə ghì inug nɔʼ nɔʼ ni chwi abə bəd gha zìye Ŋwiye we angu. Ineni inug nɔʼ nɔʼ mbe bə̀ angu kwàʼ asaŋ inga ighi mbe ne Ŋwiye tàngi ne chwìye inug imbə̀ʼ aməd we ne chəyi te bàrà. Inug mbe ya; ikuchèg məd icheg Ŋwiye fɔrɔ ika məd ne yaʼi ane ighə̀m imɔʼ. Ane, chəyi wə̀d mɔ̀ʼɔ ne tì we gha chəyi zìye kyeri Ŋwiye tesiʼ. 21Mbi jiʼì kyèri gha Ŋwiye we angu, si ya gha, chəyi mbɔb mbe ghùmnə aməd bə̀ nàʼà məyakà ibo icheg Ŋwiye. Mbɔb bèrì yaʼ tikɔndi anen bə̀ bèrì fìŋ ne tu. Mbɔb ya bə̀ chè imbìghè ni ghì inug tibɔ̀ŋ. 22Mbɔb ya kɔ̀ndɔ gha mbɔb bèrì iwe, nda mbɔb ya kwàʼ inen. 23Inɔb ne nji mbɔb ya ghùmnə Ŋwiye ne yaʼi izɔm ane ighə̀m imɔʼ, mbɔb bə̀ŋə̀ se ghùmnə yaʼ mə̀ŋwiye to. Mə̀ŋwiye mbo̰ ya mbi to mbi yaʼ icheg wə̀d ne tì wì ku, mbin ya icheg tìnən, mbin ya icheg nyam mben, mbin ya icheg nyam te ne swàrì swari aseg.

24Icheg ne mbɔb mbe ghìyə̀ ane, Ŋwiye sàŋì awɔb gha mbɔb se ghìyə̀ inug bə bə mbe ne ìtɔb fìŋ te ghə̀ʼrə̀ ne ya anug ni fànì ne zìye tìnìrètog igun inɔb. 25À ya ane imbə̀ʼ icheg ne mbɔb ya wàʼa tesiʼ imbə̀ʼ Ŋwiye se bḛ yaʼ anug ako. Ane, mbɔb fə sàŋì Ŋwiye ne tangi ighi ijìm se ghùmnə bə̀ fàʼà yaʼ abə ighi mbe ne Ŋwiye tàngi. Məd ya Ŋwiye we ne tì beri ni ya ghùmnə aməd mà nyumə̀ ijìm! À ya ane!

26Anjìm inug mbo̰ ne mbɔb mbe ghìyə̀, Ŋwiye fə sàŋì awɔb abə ìmbɔb inug tibɔ̀ŋ mbe ne nàʼà tìnìrètog abə bəd. Mə̀yi mbe ne abɔ̀ʼ inɔb fə bə̀ŋì anug ni fɔti tì mbaŋà se fɔ̀tɔ awɔb yaʼ tì mə̀yi awən. 27À ya bə̀ ane ne mbaŋà fə bə sàŋì anug ni fɔti tì mə̀yi se taŋ kɔ̀ŋɔ̀ awɔb yaʼ ni fɔti tì mbaŋà awən. Mbaŋà ya se fàʼà inug ne nàʼà tìnìrètog tì mbaŋà tin. Ìzɔb chùd ya gha ngəʼ biri yeʼe igun inɔb imbə̀ʼ izunì inug mbe ne mbɔb mbe ghìyə̀.

28Icheg ne chəyi mbɔb ya kɔndi gha ze bɔ̀ŋ ni kyeri Ŋwiye, Ŋwiye ya sàŋì awɔb gha mbe bere tikɔndi tibɔ̀ŋ imbə̀ʼ se ghìyə̀ inug ne chəyi mbɔb beri ni ghì. 29Tiku inug tibɔ̀ŋ ijìm fə nyi zweg inga inɔb: inug tibɔ̀ŋ, àdeg, anug ni ghə̀ʼrì ighi bə kɔ̀ŋɔ̀ ni ghì inug tibɔ̀ŋ igun mə̀mbin; mbɔb fə zì atog ane anug ni ghì àdeg, anug ni zì fìŋ igun ighi bəd ndəŋ, anug ni zweti bəd, achɔb, anug ni tambi bəd fɔrɔ ane anug ni taŋ mənaŋ. Mbɔb mbe ghìyə̀ mənèghe; 30Mbɔb fə zì atog ane anug ni chìkì tikum bəd, bà̰ Ŋwiye, chàpì bəd, anug ni swèg achɔb tì bəd tì anug ni kɔ̀m igo; Mbɔb mbe tànga tiku inɔnjì feg tijìm ni ghì inug tibɔ̀ŋ; Mbɔb mbe ghìyə̀ ìkɔ̀b abə ìmbɔb mə̀mbaʼ fɔrɔ ìmbɔb mbì ngɔb; 31Mbɔb mbe ghìyə̀ anen, chəyi mbɔb mbe kàʼà anug fàʼà; chəyi mbɔb mbe kɔ̀ŋɔ̀ bəd; chəyi mbɔb mbe bèrè àsɔ̀mnəfiŋ igun wə̀d. 32Ka mbɔb jiʼì kyèri isɔbi anug Ŋwiye ne təmi kòʼ, gha bəd mbe ne ghìyə̀ tiku inug ìto̰ kòʼ ni ku, mbɔb ya bə̀ kiri che imbìghè ni ghì inug mbo̰ bə̀ ywìrè chɔ̀tɔ̀ bəd mbe ne ghìyə̀ tiku inug ìto̰.

Currently Selected:

Rom 1: MBTP

Highlight

Copy

Compare