Inug ne si nwḭ̀yḛ̀ 1

Inug mbègtog imbə̀ʼ Àŋwàʼrì azo̰

1Aŋa ya inug mbe ne biri zàmbì dù ne Ŋwiye ya gha abə Yeso Kristo gha wì chwi abə ìmbi bəd àfàʼì. Yeso Kristo ya tɔm ìwi angirə̀ abə ìwi wə̀d àfàʼì ne ikum məd ya Jɔn gha wì ghiyə bəd kyeri inug mbo̰. 2Jɔn fə ŋwàʼrì inug ijìm mbe ne wì ya bàri ne ya inug imbə̀ʼ Ìngam Ŋwiye tì inug imbə̀ʼ Yeso Kristo. 3Ŋwiye zì àbɔrɔ̀bɔd igun wə̀d we ne fɔ̀ŋɔ ikən Ŋwiye gho̰. Ŋwiye bə̀ zì àbɔrɔ̀bɔd igun bəd mbe ne zùghə bə̀ fàʼà inug mbe ne mbi ŋwaʼri inga àŋwàʼrì azo̰ imbə̀ʼ icheg ne nyùmə̀ we ne inug mbo̰ biri dù fə tinde.

Jɔn chà ichaʼri abə tifeti bəd Kristo ìsàmbe

4À ya mo Jɔn ŋwàʼri àŋwàʼrì azo̰ abə tifeti bəd Kristo te ìsàmbe ne yaʼi inga aba aben ze a Esìyà.

Məd we ne yaʼi amad anìŋ, ne ya bi yaʼ, ne biri ywìri yèʼe, wì ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd. Izwighi mbe ìsàmbe ne yaʼi imbìghè atən ifɔn məd mbe bə ghì ìchɔ̀mì inən bə̀ ghì mbə̀ chughi ane àbɔrɔ̀bɔd. 5Yeso Kristo we ne ghà tesiʼ, ne yaʼi wə̀d mbègtog ne ya zweme ane iwu, ne à ya məd we tùmbə̀ məfɔn məjìm igun isəg, wì ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Yeso kɔ̀ŋ awa. Ane, wì ya chè anjìm anəm ze ne wì ya tùti igun azed abaʼri, chì awa aton ika we ne inug tibɔ̀ŋ ya beri igun ina. 6Wì ya chɔʼ awa ane məfɔn bə̀ fɔrɔ ane bəd àfàʼì inga anug ìfɔ̀n Ŋwiye. Wì ya ghì ane ni gha tì se fàʼà abə Ŋwiye ne bə yaʼ Mbaʼ məd. Tì ghumni Yeso Kristo ne beri ika ni tùmbì isəg kwàʼ ane ighə̀m imɔʼ! À ya ane.

7Mbə̀ nḛ, məd we yèʼe inga pàʼ. Bəd məjìm biri bàd aməd, fɔrɔ bèyi bəd mbe ne ya zùmi məd ane ighɔŋ, zweti. Tinəbi tijìm igun isəg biri dèg imbə̀ʼ aməd. À ya icheg ne ze biri yaʼ! À ya ane.

8“Anɔŋisəg Ŋwiyekɔʼ we ne yaʼi amad anìŋ, ne ya bi yaʼ, ni biri ywiri yeʼe, ghà gha, ‹Mo ya Iko fɔrɔ Ìnwḭ.›”#1:8 Iko ya Alfà ne ya ighə àŋwàʼrì mbègtog ane ìngam Grig. Ìnwḭ ya Omegà ne ya ighə àŋwàʼrì we ne si nwḭ̀yḛ̀ inga ìngam Grig.

Jɔn bàd Kristo inga anatì njə̀m

9Mo, Jɔn we ne yaʼi ìwən ifi, mə we bə̀ zə̰ ngəʼ tì inən icheg ne tì yaʼi inga anug ìfɔ̀n Ŋwiye. Mo we bə̀ nyìme fìŋ se nyìʼè inug aton ngəʼ icheg inən. Inug mbo̰ ya imbə̀ʼ icheg ne tì yaʼi ane ifɔti tì Yeso. Mbi ya kamni mə inga aben, chà amə inga Patmòs, akəmi asiŋi ìseg ze ne igyi che kad. Mbi ya chà amə angu imbə̀ʼ icheg ne mə̀ yaya ghà Ìngam Ŋwiye fɔrɔ imbə̀ʼ icheg ne mə̀ yaya ghà tesiʼ imbə̀ʼ Yeso. 10À ya yaʼ igun aneg ze ne bəd Kristo mbe ghùmnə Anɔŋisəg, Azwighi Ŋwiye ya nyi inga inum, mə zug gì ka ka inum anjìm. Gì ze ya ghàm icheg tàŋ gha, 11“Ŋwàʼra inug mbe ne àghò we bàrà inga àŋwàʼrì. Àghò ŋwaʼra inug mbe chà abə tifeti bəd Kristo te ìsàmbe ne yaʼi a Efesùs, tì Sìmayinà, tì Pègamùm, tì Tìyàtirà, tì Sadìs, tì Fìlàdefìyà fɔrɔ Làwùdisìyà.”

12Mə ya ghabri nèn ni bàd wə̀d ne ghàmà inum. Anyumə̀ ne mə̀ ya ghabri nèn ane, mə̀ ya bàd itən inam ìsàmbe ne mbi tangi ane gol. 13Wə̀d mɔ̀ʼɔ ne ya yaʼi icheg Ŋwan Wə̀d ya yaʼ inga ìsàn itən inam mbe. Wì ya zì ndwi màʼi, bə̀ tim ìkɔ̀bì ne mbi ya tangi ane gol ibo igun igo. 14Nyɔŋ atog məd yaya fùyə icheg àbɔ̀ŋɔ kə̀ icheg awḛ. Aghə məd yaya njànda icheg inemi iywid. 15Tikye ighog məd yaya zùʼə icheg atə̰ brons ne mbi tɔ̰ kwàʼ icheg chɔm inga iswəŋi iywid anam. Gì məd ya yaʼ icheg ni gha à ya ifo ne jòʼò. 16Wì ya nyimi titəm iməg ìsàmbe inga àzi abo jəghi. Ibeg ibid ne tɔ iba ijìm ya dù ibo inga ichug. Ìfe məd yaya zùʼə kwàʼ icheg ne nyùmə̀ we zùʼə ane àngɔŋ tisi.

17Anyumə̀ ne mə̀ ya bàri aməd, mə̀ ya gùg aseg ibo imbìghè si yaʼ icheg awu wə̀d. Wì ya si nɔ̀ŋì àzi abo jəghi igun inum ghà inum gha, “Imbə̀ʼ àghò bɔ awe, mo ya wə̀d mbègtog bə̀ yaʼ wə̀d ne si nwḭ̀yḛ̀. 18Mo ya wə̀d we ne yaʼi izɔm. Mə ya ku, si ya gha, nḛ, mə we izɔm kwàʼ ane ighə̀m imɔʼ. Mə bèrì ika igun iwu bə̀ fɔrɔ igun aben iwu bəd. 19Ane, ŋwàʼra inug ijìm mbe ne àghò fə bàri. À ya inug mbe ne yaʼi amad anìŋ tì inug mbe ne biri si dù anjìm. 20Anug ze ne yaʼi inə̀mbi imbə̀ʼ titəm iməg te ìsàmbe ne àghò bàri inga àmə abo jəghi bə̀ fɔrɔ imbə̀ʼ ìtən inam mbe ìsàmbe ne mbi tangi ane gol ya gha: Titəm-məg te ìsàmbe ya mbè angirə̀ mbe ne kyèʼè tifeti bəd Kristo te ìsàmbe. Itən inam mbe ìsàmbe ya tifeti bəd Kristo te ìsàmbe.”

Currently Selected:

Inug ne si nwḭ̀yḛ̀ 1: MBTP

Highlight

Copy

Compare