Fìlipì 4

Pɔl nàʼ tikə abə bəd Kristo mbe a Fìlipì

1Ìmbum məfi fɔrɔ ìtum njàbi, mə kɔ̀ŋ awən. Mə bə̀ kə̀b ni bàd awən. Mbə̰ mbe ghìyə̀ ìmə fìŋ bɔŋɔ̀. Mbə̰ ya icheg àmə ichɔʼ àfàʼì ane àfàʼì ze ne mə fàʼà. Ìmbum mə̀sə̀ʼ ne mə̀ taŋ kɔ̀ŋ, icheg ne mbə̀ yaʼi ane ifɔti tì Anɔŋisəg, mbə kòʼ ni təm kà. 2Mə we bòʼo ibo abə Èyodìyà tì Sintikè gha, icheg ne mbi yaʼi ane ifɔti tì Anɔŋisəg, mbe yaʼ ane ichug imɔʼ. 3E! mə we bə̀ gha ine, àghò ne fàʼà tì inum ane ìze fìŋ ijìm gha àghò wete mə̀yi mbo̰ ghì mbe mana àzɔb achɔb. À ya mə̀yi ne yaya kìrə ika fàʼà tì inum anyumə̀ ne mə̀ yaya chètè ikən chɔm imbə̀ʼ Kristo. Anyumə̀ we, tì yaya fàʼà tì Klemèn fɔrɔ bəd àfàʼì ndəŋ. Ìtɔb tikum ti inga àŋwàʼrì ze ne mbi ŋwàʼrì tikum bəd mbe ne biri jəg ìtḛ̀.

4Mbə̀ ya gyènde mà nyumə̀ ijìm icheg ne mbə̀ yaʼi ane ifɔti tì Anɔŋisəg. Mə ya anìŋ ywìrè taŋ ghà gha, mbə̀ ya gyènde! 5Mbə̀ ya ghìyə̀ inug ne wə̀d ijìm biri kyeri gha mbə̰ ya bəd ne bɔ̀tɔ. Nyùmə̀ ne Anɔŋisəg biri yeʼe fə tinde. 6Imbə̀ʼ mbə̰ si nwìʼì awən nyɔd imbə̀ʼ aghi mɔ̀ʼɔ. Mbə̀ ya dèghè ìmbən inug ijìm yaʼ abə Ŋwiye. Anyumə̀ ne mbə̰ mbe chàʼrà Ŋwiye, mbə boʼ ibo ibo, nɔ̰ ìmbən ighi ibo, bə̀ nàʼ məyakà ibo. 7Mbə̰ mə̀ ghì ane, nji Ŋwiye biri zì àbɔrɔ̀bɔd inən inga fìŋ ne biri ghì gha imbə̀ʼ ìtən fìŋ si bɔd yi. Àbɔrɔ̀bɔd ze biri bə ghì gha imbə̀ʼ ìtən tikɔndi si naʼa yi ngəʼ inən icheg ne mbə̀ yaʼi ane ifɔti tì Yeso Kristo. Chəyi tì wə̀d-aku taŋ kyèri iku àbɔrɔ̀bɔd azo̰ ne Ŋwiye we nàʼà.

8Ìmbum məfi fɔrɔ ìtum njàbi, anug ne si nwḭ̀yḛ̀ ya gha, anug mə̀ yaʼ àze tesiʼ, bə̀ yaʼ anug chɔm, bə̀ yaʼ anug ne koʼi, mbə̀ nɔŋɔ ikɔndi igun. Anug mə zen, tì anug ne chwìye àkɔ̀ŋì, bə̀ yaʼ anug ne tì wə̀d nen kɔ̀ŋ, bə̀ yaʼ anug ne tì wə̀d ghùmni, bə̀ yaʼ anug ne taŋ bɔ̀ŋ, mbə̀ bə nɔ̀ŋì ikɔndi igun. 9Anug ne mbə̀ ya nani inum, kə̀ anug ne mbə̀ ya zughi ne mə̀ ya gha anyumə̀ ne mə̀ yaya chwìte inug inən, kə̀ anug ne mbə̀ ya bàri inga ìmə ikuchèg, mbə̀ bə ghì. Mbə̰ mə̀ ghì ane, Ŋwiye we ne nàʼà àbɔrɔ̀bɔd biri yaʼ tì inən.

Pɔl nàʼ məyakà abə bəd Kristo mbe a Fìlipì

10Igyendi fə sweg inga ìmə fìŋ icheg ne mə̀ yaʼi ane ifɔti tì Anɔŋisəg imbə̀ʼ icheg ne mbə̀ ywìri wèndi amə chà ighi inum. Mbə chwi gha mbə bèrì fìŋ igun inum. À ya kwàʼ tesiʼ gha mbə bèrì fìŋ igun inum. Si ya gha, chəyi mbə̀ ya beri apan ni chwi gha mbə bèrì fìŋ igun inum. 11Kayi mə ghàmà anìŋ imbə̀ʼ icheg ne mə cheʼi aghi mɔ̀ʼɔ. Tesiʼ ya gha, mə fə nani icheg ni chughi amə, kə̀ mə bèrì ighi kə̀ chəyi! 12Mə kyèri aghi ne ze yaʼi ni chughi ne chəyi ighi. Mə bə̀ kyèri aghi ne ze yaʼi ni taŋ bèrì ighi. Mə fə nani iwe ni niŋ gha ighi mbe ne mə beri, mbe kòʼ yi. Kə̀ mə jəg kɔd kə̀ mə chughi njèg, kə̀ mə bèrì ighi kə̀ chəyi, mə fə nani icheg ni chughi amə ane mà nyumə̀ ijìm. 13Tesiʼ ya gha, mə we tì mə fàʼ inug ijìm anjìm Kristo ne nàʼà ika inum.

14Mbə̰ ya ghì anug chɔm icheg ne mbə̀ ya wèti amə anyumə̀ ne mə̀ ya yaʼi inga ngəʼ. 15Mbə̰ bəd a Fìlipì kyèri àzən aghi gha, anyumə̀ ne mə̀ ya nɔ̀ʼi a Màsèdonìyà ko gha ikən chɔm, chəyi ifeti bəd Ŋwiye ndəŋ ya wèti amə. À ya məyi mbə̰ ya wèti amə nàʼ ighi inum, mə bə̀ nàʼ ighi inən. 16Anyumə̀ ne mə̀ ya gho a Tèsàlonikà, mbə̰ ya chà ighi inum ywìrì chà, anyumə̀ ne mə̀ ya cheʼi ighi. 17Kayi mə kə̀bə̀ gha mbə̀ naʼa ighi inum. Mə kə̀b yaʼ gha Ŋwiye yeti chùd inən anjìm àfàʼì ze ne mbə̰ mbe fàʼà inum. 18Mə fə bàd ighi mbe ne mbə̀ cha inum. Ighi mbe ne mbə̀ cha mbe kòʼ chè. Mə fə bèrì ìmbum ighi ijìm icheg ne mbə̀ cha Èpàfròditùs wì yeʼe nàʼ ighi inum. Ighi mbe ne mbə̀ ya nàʼi ya icheg ighi àfàtì ne nyòʼro ifɔ chɔm ne ghìyə̀ fìŋ Ŋwiye bɔŋɔ̀. 19Ìmə Ŋwiye biri nàʼ ighi ijìm mbe ne mbə̰ mbe kə̀bə̀ inən. Wì biri chè anjìm Yeso Kristo nàʼ ighi inən inga ighi nɔʼ nɔʼ mbe ne məd bèri. 20Tè naʼa ighumni abə ìwa Ŋwiye ne yaʼi Mbaʼ ane ighə̀m imɔʼ. À ya ane.

Ichaʼri ne si nwḭ̀yḛ̀

21Mbə̀ chaʼra bəd Ŋwiye məjìm ne yaʼi ane ifɔti tì Yeso Kristo. Ìmba məfi fɔrɔ ìta njàbi te ne yaʼi aŋa abɔ̀ʼ inum, mbɔb mbe bə̀ chàʼrà awən. 22Bəd Ŋwiye məjìm aŋa mbe chàʼrà awən. Bəd mbe inga ìtɔʼ Kayisà mbe bə̀ taŋ chàʼrà awən. 23Anɔŋisəg Yeso Kristo ghiyə ìchɔ̀mì inən mbə̀ məjìm. À ya ane.

Currently Selected:

Fìlipì 4: MBTP

Highlight

Copy

Compare