Fìlipì 2

Kristo swi ìwi nyɔd aseg, Ŋwiye nɔ̀ aməd

1Ŋwiye we nə̀rə ìtən fìŋ icheg ne mbə̀ yaʼi ane ifɔti tì Kristo. Icheg ne Kristo kɔ̀ŋi awən, a ze ghìyə̀ ìtən fìŋ zùtə̀. Mbə̰ mbe ane ifɔti tì Azwighi Ŋwiye. Mbə̰ mbe ghìyə̀ ìchɔ̀mì abə ìmbən məfi fɔrɔ ìtən njàbi. Mbə̰ mbe chwìye àsɔ̀mnəfiŋ igun bəd. 2Ane, mbə̀ nɔŋɔ ìwən ikɔndi ane ìwi imɔʼ. Mbə̀ ya bə̀ kɔ̀ŋɔ̀ ìmbən məfi fɔrɔ ìtən njàbi. Mbə̀ ya bə̀ ghìyə̀ inug icheg bəd ne beri ikɔndi imɔʼ. Mbə̰ mə̀ ya ghìyə̀ ane, mə biri ya taŋ gyènde. 3Imbə̀ʼ mbə̰ ya ghìyə̀ awən inug ni gha ighi ijìm yaʼ məyi inən. Imbə̀ʼ mbə̰ ghiyə awən inug ne chwìye gha mbə̰ mbe nɔ̀ nyɔd. Wə̀d swi ìwi nyɔd aseg, niŋ gha bəd ndəŋ chè aməd. 4Imbə̀ʼ wə̀d imɔʼ imɔʼ abɔ̀ʼ inən si ya nḛ̀ yi məyi inug ne bɔŋi ibo. Wì ya bə̀ nḛ̀ fɔrɔ inug ne bɔŋi abə bəd ndəŋ.

5Mbə̀ ghiyə ìwən ikuchèg yaʼ icheg ìwi Yeso Kristo.

6Yeso ne yaʼi icheg Ŋwiye,

chəyi wì ya niŋi anug ne wì yaʼi icheg Ŋwiye ane anug mɔ̀ʼɔ ibo.

7Wì ya sàŋì ìwi ìkyen zìye zìye,

swi ìwi nyɔd aseg si yaʼi yi yaʼ icheg wə̀d àfàʼì.

Mbi ya gwi aməd kwàʼ icheg ne mbe gwìye wə̀d-aku.

8Məd we ne ya niŋi nyàmnyɔd si yaʼ wə̀d-aku, wì ya swi ìwi nyɔd aseg, zùgrə Ŋwiye ghò pè ane wì ya bḛ ni ku.

Wì ya ku ane yaʼi igun azed abaʼri.

9Icheg ne wì ya ghi ane, Ŋwiye ya si nɔ̀ aməd nɔ̀ŋì igun ati kyen ne che iti ndəŋ ijìm.

Wì ya bə̀ nàʼ ikum ibo ne che tikum ndəŋ tijìm.

10Ane ya ni ghì gha, wə̀d mɔ̀ʼɔ mə̀ kàrì ikum Yeso,

ighi ijìm ikaŋ àbɔ̀ŋɔ fɔrɔ ighi ijìm igun isəg fɔrɔ ighi ijìm aton ìseg#2:10 ìŋwàʼrì mɔ̀ʼɔ kàrì “bəd aton isəg” yaʼ ane “bəd ne yaʼi inga isèg”

mənyìʼ gɔ̀m itog inwḭ aseg zùgri aməd.

11Wə̀d ijìm fɔrɔ ighi ijìm biri bḛ ane ìwɔb ichug gha Yeso ya Anɔŋisəg.

Ane, ze biri ghì gha bəd ghumnə Ŋwiye ne yaʼi Mbaʼ.

Wə̀d Kristo bèrì ni zuʼ icheg titəm iməg

12Ìmbum mə̀sə̀ʼ ne mə̀ taŋ kɔ̀ŋ, icheg ne mbə̀ yaya zùgrə Ŋwiye anyumə̀ ne mə̀ ya yaʼi abɔ̀ʼ inən, amad anìŋ ne chəyi mə̀ ywirì yaʼ abɔ̀ʼ inən, mbə̀ che imbìghè ni taŋ zugri aməd. Mbə̀ kirə ika ni təm kà icheg ne Ŋwiye fə pumni awən. Mbə̀ ya ghìyə̀ yaʼ inug ne chwìye gha mbə̰ mbe ghùmnə Ŋwiye bə̀ zùgrə aməd. 13Mbə̀ kyeri gha, à ya Ŋwiye we fàʼà inga ìtən fìŋ ni ghì gha mbə̀ ya ghìyə̀ inug chɔm mbe ne məd kə̀bi. À ya məd we bə̀ nàʼà ika inən ni ghì inug mbe ne məd kɔ̀ŋi.

14Mbə̀ ghiyə inug ijìm ne chəyi mbə̰ mbe zḭ̀ʼḛ̀ kə̀ tàŋà inug. 15Mbə̰ mə̀ ghì ane, nji chəyi bəd biri bèrì anug tibɔ̀ŋ mɔ̀ʼɔ ni ghà imbə̀ʼ awən. Mbə biri zen icheg bɔn Ŋwiye ne chəyi anug tibɔ̀ŋ mɔ̀ʼɔ igun inən. Ane, mbə biri yaʼ icheg titəm iməg ne zùʼə igun nyùmə̀ isəg àpiye gho̰ ne bəd mbe ghìyə̀ inug tibɔ̀ŋ. 16Mbə̀ nyimi ikən chɔm we ne nàʼà ìtḛ̀ ni ghì gha mə biri bèrì aton ni kɔ̀m igo ane aneg ze ne Kristo biri ywiri yeʼe gha chəyi mə̀ ya nòto atog ako, kə̀ fàʼ àfàʼì ako. 17Ka mə bì ku, àmə anəm biri yaʼ icheg mənoʼ ne mbe zìyè igun ighi àfàtì. Ighi àfàtì mbe ya àfàʼì ze ne mbə̰ mbe fàʼà abə Ŋwiye anjìm icheg ne mbə̀ nɔŋi ibḛfiŋ igun Kristo. Ane, mə we gyènde icheg ne mbə̰ məjìm mbe bə̀ gyènde. 18Mbə̀ ya bə̀ gyènde icheg ne mə bə̀ gyènde.

Pɔl ŋwàʼrì inug mɔ̀ʼɔ imbə̀ʼ Timotì fɔrɔ Èpàfròditùs

19Anɔŋisəg Yeso mə̀ bḛ nji mə biri zàmbi chà Timotì abɔ̀ʼ inən. Ane, anyumə̀ ne wì biri bə̀ndì yeʼe abɔ̀ʼ inum, mə biri gyen ni zug icheg ne mbə̀ yaʼi ibo. 20Chəyi mə̀ beri wə̀d ndəŋ icheg Timotì ne nɔŋi fìŋ ni ghì gha mbə̀ yaʼ icheg chɔm. 21Bəd ndəŋ məjìm ya zìyè atog yaʼ igun ìmbɔb inug kayi igun anug ne Yeso Kristo kə̀bi. 22Àsi Timotì, mbə̰ kyeri àzən aghi gha, məd fə chwi gha zìye ya wə̀d àfàʼì chɔ̀m. Wè fàʼ tì inum ni chètì ikən chɔm imbə̀ʼ Kristo. Wè fàʼ kwàʼ icheg ŋwan we fàʼà tì ìwi mbaʼ. 23Mə we kɔ̀ndɔ ni zàmbi cha aməd abɔ̀ʼ inən anyumə̀ ne mə̀ fə bàri icheg ne inug biri yaʼ tì inum aŋa. 24Mə kyèri gha Anɔŋisəg mə̀ bḛ, mə biri zàmbì yeʼe bàd awən kwàʼ mo mo.

25Anug ne mə kɔ̀ndɔ ya gha, ze bɔ̀ŋ gha mə̀ ywirì chà Èpàfròditùs abɔ̀ʼ inən. Məd ya ìmə ifi ne te fɔrɔ fàʼà bə̀ yaʼ icheg sogyì icheg inum ne te fɔrɔ zɔ̀ŋɔ̀ ane anug Kristo. Məd ya bə̀ ìwən wə̀d ne mbə̀ ya cha gha wì yeʼe wètì amə. 26Məd we kə̀bə̀ ni bàd awən mbə̰ məjìm. Wì ya se nyə̀ngi nyəngi ni yeʼe icheg ne mbə̀ ya zughi gha məd we ghɔ̰̀. 27Tesiʼ ya gha, məd yaya ghɔ̰̀. Wì ya fə ŋa kùyə. Si ya gha, à ya Ŋwiye ya si sɔ̀mnɔ̀ igun məd. Chəyi Ŋwiye ya beri àsɔ̀mnəfiŋ məyi igun məd. Wì ya bèrì àsɔ̀mnəfiŋ fɔrɔ igun inum nji Èpàfròditùs ya ku, mə bèrì ibəʼ. 28Ane, mə taŋ kɔ̀ŋ ni ywiri chà aməd abɔ̀ʼ inən ni ghì gha mbə̀ bə gyèndi anyumə̀ ne mbə̀ biri bàd aməd. Ane, chəyi mə̀ biri ywiri ya nwìʼè nyɔd imbə̀ʼ awən. 29Ane, anyumə̀ ne wì yèʼe, mbə̀ niŋ aməd kwàʼ ane igyendi icheg ne mbə̰ mbe nìŋə bəd mbe ne bḛ Anɔŋisəg. Mbə̀ ya ghùmnə bəd ne yaʼi icheg məd, 30imbə̀ʼ icheg ne wì ya fə ŋa kùyə ane àfàʼì Kristo. Wì ya sɔ̀ŋ àze atog ni wètì amə ane nyùmə̀ ne chəyi tì mbə̰ ya wètì amə.

Currently Selected:

Fìlipì 2: MBTP

Highlight

Copy

Compare