Mə̀Hibrù 8
8
Yeso ya àza atog wə̀d igun bəd mbàn Ŋwiye
1Anug kyen ne te ghà ya gha: tè bèrì atog wə̀d igun bəd mbàn Ŋwiye ne chughi igun atən ifɔn aba abo jəghi abə Ŋwiye we ne beri ika ijìm. 2Atog wə̀d azo̰ ya fàʼà inga asiŋi ze ne zḛ mànì. Asiŋi ze ya azuŋ tesiʼ ne Anɔŋisəg zìye kɔri, ne kayi wə̀d-aku kɔ̀ri.
3Mbi ya chɔ̀ʼɔ atog wə̀d igun bəd mbàn Ŋwiye ni gha wì ya nàʼà ighi ni tùtì Ŋwiye fɔrɔ ighi àfàtì abə Ŋwiye. Ane, ze bə̀ kòʼ gha àza tè atog wə̀d igun bəd mbàn Ŋwiye bə̀ bèrì aghi mɔ̀ʼɔ ni nàʼ. 4Àkə aghi ne məd ya yaʼi igun isəg nji chəyi wì yaʼi wə̀d mbàn Ŋwiye ka imbə̀ʼ icheg ne bəd mbàn Ŋwiye mbe fə igun isəg ne nàʼà ituti Ŋwiye we ne Mə̀nɔ̀ʼɔ̀ Muse gha. 5Inug mbe ne mbɔb mbe fàʼà icheg bəd mbàn Ŋwiye ya icheg afugri fɔrɔ icheg àzìŋə ane inug mbe ne yaʼi ikaŋ àbɔ̀ŋɔ. Aŋa ya aton ze ne Ŋwiye ya pati Muse anyumə̀ ne Muse yaya se nḛ ni kɔd Azuŋ Ŋwiye. Ŋwiye ya ghà ibo gha, “Àghò niŋ nyumə̀ ni tangi ighi ijìm kwàʼ icheg ne mə̀ ya chwi ine ikaŋ iwum.” 6Ane, àfàʼì ze ne Ŋwiye nàʼi abə Yeso ya àfàʼì ne che àze bəd mbàn Ŋwiye. À ya bə̀ icheg ne məd təmi inga ìsàn abə Ŋwiye tì bəd Ŋwiye chùʼri ikan ne faŋi chè ikan nun. Ikan we təm igun inug mbe ne bɔŋ chè, ne Ŋwiye ya kàʼi.
7Àkə ni gha chəyi anug mɔ̀ʼɔ ya bə inga ikan mbègtog, nji chəyi ywìrè aton mɔ̀ʼɔ ane ikan ndəŋ. 8Si ya gha, Ŋwiye ya bàd anug mɔ̀ʼɔ ne bə tì bəd məd. Ane, wì ya si gha,
“Mə ghà inən gha,
nyùmə̀ we yèʼe ne mə̀ biri sɔb ikan feg
tì mə̀Izre
fɔrɔ məJudà.
9Chəyi ikan feg gho̰
biri yaʼ icheg we ne mə̀ ya sɔbi tì ìmbɔb mə̀mbaʼ aneg,
anyumə̀ ne mə̀ ya niŋi awɔb
dù inga Ijìb.
Chəyi mbɔb ya nyimi ikan we ane fìŋ ijìm.
Ane, mə ya ghabri ìmə fìŋ chì igun inɔb.
10Aŋa ya ikan ne mə̀ biri sɔb tì mə̀Izre
igun aneg ze.
Mə biri ghì mbi se kɔ̀ndɔ ìmbum mə̀nɔ̀ʼɔ̀
bə̀ ghì mbi se nɔ̀ŋɔ̀ ìmbum mə̀nɔ̀ʼɔ̀ inɔb inga fìŋ.
Mə biri yaʼ ìwɔb Ŋwiye.
Mbɔb bə̀ si yaʼ ìmbum bəd.
11Chəyi wə̀d mɔ̀ʼɔ ne biri ya ywìrè chwìte inug abə mə̀sə̀ʼ məd kə̀ abə məfi məd gha,
‹Àghò kyeri Anɔŋisəg!›
Ze biri yaʼ ane imbə̀ʼ icheg ne bəd məjìm biri kyeri amə,
ni ko ane bɔn kwa ghò pè ane bəd kyen.
12Mə biri waʼ ìmbɔb inug tibɔ̀ŋ.
Chəyi mə̀ biri ywiri wendi ìwɔb igug anug.”
13Icheg ne Ŋwiye kàri ikan gho̰ ane ikan feg, ze chwi gha nyùmə̀ ikan mbègtog fə chè. Aghi ze ne nyùmə̀ məd fə che, ze fə nùn. Ze biri bə zàmbi nim.
Currently Selected:
Mə̀Hibrù 8: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
