Gàlesìyà 4

1Anug ne mə ya aniŋ ghà ya gha, àjəgnəb mə̀ kiri biri ŋwan kwa, ka ighi ijìm ya ìmbi məd, məd biri kiri yaʼ icheg àbòʼì. 2Wì biri chughi aton bəd mbe ne nèghè aməd fɔrɔ bəd ne nḛ̀ ighi məd anene nyùmə̀ kòʼ ne mbaʼ məd ya nɔŋi gha mbe naʼa ati məd ibo. 3À ya bə̀ kwàʼ ane tì ina. Anyumə̀ ne tì ya yaʼi bɔn kwa tì ya yaʼ icheg ìbòʼì abə izwighi mbe ne sàʼa isəg gho̰. 4Si ya gha, anyumə̀ ne nyùmə̀ ya kòʼi, Ŋwiye ya chà Ŋwan məd ina. Mbi ya gwi Ŋwan məd gho̰ kwàʼ icheg ne mə̀yi mbe gwìye bɔn. Wì ya bə̀ kweg aton mə̀nɔ̀ʼɔ̀ Muse, 5ni gha wì biri zeri awa chì ane mə̀nɔ̀ʼɔ̀ mbe. Wì ya ghì ane ni gha Ŋwiye niŋ awa ane ìmbi bɔn. 6Icheg ne tì si yaʼ bɔn Ŋwiye, wì fə chà Azwighi Ŋwan məd inga ìta fìŋ. À ya Azwighi ze ze nàʼà ika abə wə̀d ni kàrì Ŋwiye gha, “Ìmə Mbaʼ, Ìmə Mbaʼ!” 7Ane ya gha, chəyi mbə̀ ywirì yaʼ ìbòʼì. Mbə̰ ya si bɔn Ŋwiye. Icheg ne mbə̀ si yaʼ bɔn məd, wì fə ghì mbə̰ si mbè àjəgnəb.

Pɔl bèrì fìŋ igun məGàlesìyà

8Mbə̀ wendi gha, a mbègtog ne chəyi mbə̀ ya kiri kyeri Ŋwiye, mbə̰ ya yaʼ ìbòʼì abə mə̀ŋwiye ne kayi bè ighi mɔ̀ʼɔ. 9Amad anìŋ ne mbə̀ kyeri Ŋwiye, ne Ŋwiye fə bə kyeri awən, mbə̀ kə ywìrè zùghrə izwighi mbe ne sàʼa isəg gho̰ ne chəyi mbi beri ika ane aghə? Mbə kə ywìrè kə̀bə̀ ni bḛ ìbòʼì abə izwighi mbe? 10Mbə̰ mbe ghùmnə ineg mɔ̀ʼɔ tì aməg mɔ̀ʼɔ tì nyùmə̀ mɔ̀ʼɔ fɔrɔ tituʼ mɔ̀ʼɔ. 11Anug azo̰ ne mbə̰ mbe ghìyə̀ ze nàʼà ibɔ inum gha, ighəm mɔ̀ʼɔ mə chètì ikən chɔm inən anìŋ kwàʼ ati ako.

12Ìmbum məfi fɔrɔ ìtum njàbi, mə we bòʼo ibo inən gha mbə̀ nɔŋɔ ibḛfiŋ igun Kristo icheg inum imbə̀ʼ icheg ne Ŋwiye ya chì amə ane mə̀nɔ̀ʼɔ̀ ghì mə yaʼ icheg inən. Anyumə̀ we, chəyi mbə̀ ya gùghi anug mɔ̀ʼɔ inum. 13Mbə kyèri gha à ya imbə̀ʼ aghɔn ne mə̀ ya bi ghà ikən chɔm gho̰ inən. 14Ka àmə aghɔn yaya kwàʼ àkwàʼrì inən, chəyi mbə̀ ya wèghi mə kə̀ nyèti amə. Mbə̰ ya niŋ amə kwàʼ icheg ni gha mo ya angirə̀ Ŋwiye. Mbə̰ ya bə̀ niŋ amə kwàʼ icheg ni gha mo ya kwàʼ Yeso Kristo. 15Mbə̰ yaya gyènde imbə̀ʼ amə. Ìwən igyendi imbə̀ʼ amə kə̀ si ghò aya amad anìŋ? Mo we tì mə gha, àkə aghi ne ze ya chwi gha mbə̀ chiye àzən aghə nàʼ inum, nji mbə̰ ya chì nàʼ. 16Mə wa si bə̀ŋə̀ ane ìwən wə̀d ìpàb icheg ne mə̀ ya gha tesiʼ inən?

17Mbə̀ kyeri gha, bəd mbe ne chwìye gha mbe bèrì fìŋ chɔm igun inən, anug ze ne mbɔb mbe kɔ̀ndɔ ni fàʼ ya anug tibɔ̀ŋ. Mbɔb ya kə̀bə̀ məyi ni chì awən ane inum ni gha mbə̀ se nɔ̀ŋɔ̀ fìŋ yaʼ igun inɔb.

18Wə̀d mə̀ ya kɔ̀ndɔ ni fàʼ yaʼ anug chɔm, ze bɔ̀ŋ ni taŋ bèrì fìŋ igun tengàŋ. Ze kòʼ ni yaʼ ane mà nyumə̀ ijìm, kayi məyi anyumə̀ ne mə̀ yaʼi abɔ̀ʼ inən. 19Ìmbum bɔn ne mə̀ taŋ kɔ̀ŋ, anug azo̰ imbə̀ʼ awən ze tɔ mə kwàʼ icheg tibuʼ ne àyi we nɔ̀mbɔ ni gwi. Ze biri yaʼ ane anene pè ane nyumə̀ ne mbə̀ biri bèrì ikuchèg Kristo. 20Mo we kə̀bə̀ gha nji mə yaʼ tì inən amad anìŋ imbə̀ʼ bɔti ìmə gì ìngam ne mə ghàmà inən. Anug azo̰ ne mbə̰ mbe ghìyə̀ ze fə taŋ nàʼà ngəʼ inum.

Tè niŋ aneni anug abə Hagàyì tì Sèra

21Anug ne mə̀ kə̀bə̀ ni ghà inən ya gha, mbə̰ mbe ne kə̀bə̀ ni ya zùghrə mə̀nɔ̀ʼɔ̀, àkə chəyi mbə̀ kyeri anug ne mə̀nɔ̀ʼɔ̀ gha? 22A ze inga Àŋwàʼrì Ŋwiye gha, Abràham ya bèrì bɔn məbe. Ŋwan ifibì ya yaʼ ane àyi we ne ya yaʼi àbòʼì. Ìywin tì ŋwan ya yaʼ ane àyi we ne kayi àbòʼì. 23Mbi ya gwi ŋwan we ne ngɔb məd ya yaʼi àbòʼì bə̀ icheg ne mbe gwìye bɔn ijìm. Àsi ŋwan ane àyi we ne kayi àbòʼì ya mbi ya gwi aməd icheg ne Ŋwiye ya fə kàʼi. 24Tì niŋ anug azo̰ icheg anug məgri ne chwìye gha, mə̀yi mbe məbe ya chwìye tikan tibe. Àyi we ne ya gwi bɔn ne biri yaʼ ìbòʼì ya Hagà. Məd təm ane ikan we ne Ŋwiye ya wàri ikaŋ iwum Sanàyì. 25Hagà təm ane iwum Sanàyì inga Àrabìyà. Məd ya Jèrusalèm gho̰ amad anìŋ imbə̀ʼ icheg ne, məd tì bɔn məd ya ìbòʼì. 26Àsi Sèra, məd kayi àbòʼì. Məd təm yaʼ ane Jèrusalèm we ne yaʼi ikaŋ àbɔ̀ŋɔ. Məd ya ìwa ngɔb. 27À ya aton ne mbi ya ŋwàʼri inga Àŋwàʼrì Ŋwiye gha,

“Àghò kɔ̀m àyi,

àghò ne chəyi àghò we gwìye, ya gyènde!

Àghò ne chəyi àghò kweʼì nɔ̀mbi ŋwan gwi,

àghò gyendi, zə̀ʼ ikyeg ane gì ka ka.

Àghò gyendi imbə̀ʼ icheg ne bɔn ane àyi we ne inɔm ya waʼi aməd

biri nɔʼ chè bɔn ane àyi we ne ya beri inɔm.”

28Ìmbum məfi fɔrɔ ìtum njàbi, amad anìŋ mbə̰ ya bɔn Ŋwiye ne wì ya kàʼi kwàʼ icheg ne wì ya kàʼi ni nàʼ Azìg abə Abràham. 29Inga nyùmə̀ we ŋwan we ne mbi ya gwi icheg ne mbe gwìye bɔn ijìm ya chɔʼ ibɔʼì ighog abə ŋwan we ne Azwighi Ŋwiye ya nàʼi ika mbi gwi. À ya bə̀ icheg ne mbe kiri chɔʼɔ̀ ibɔʼì ighog abə bəd Kristo amad anìŋ. 30Mbi kə ŋwàʼri inga Àŋwàʼrì Ŋwiye gha? Mbe ŋwàʼrì gha, “Kamni àbòʼì ze fɔrɔ ŋwan we ne məd gwi imbə̀ʼ icheg ne chəyi ŋwan we biri fɔti jəg ighi abɔ̀ʼ ŋwan we ne ngɔb məd ya kayi àbòʼì.” 31Ane ìmbum məfi fɔrɔ ìtum njàbi, mbə̀ kyeri gha, mba kayi bɔn ane àyi we ne yaʼi àbòʼì. Mba ya bɔn ane àyi we ne kayi àbòʼì.

Currently Selected:

Gàlesìyà 4: MBTP

Highlight

Copy

Compare