Gàlesìyà 1
1
Pɔl chàʼrì bəd Kristo
1À ya mo Pɔl, wə̀dtɔm Kristo, ŋwàʼri àŋwàʼrì azo̰. Kayi bəd kə̀ wə̀d mɔ̀ʼɔ ya chɔʼi amə, tɔm inən. À ya Yeso Kristo fɔrɔ Ŋwiye we ne yaʼi Mbaʼ we ne ya zwemne Yeso Kristo ane iwu, mbi tɔmi amə. 2Ìmbum məfi məjìm fɔrɔ ìtum njàbi tijìm ne tì yaʼi ane anug amɔʼ tì Kristo, ne bə yaʼ abɔ̀ʼ inum, mbe bə̀ chàʼrà awən, mbə̰ bəd inga tifeti bəd Kristo te a Gàlesìyà.
3Ŋwiye ne yaʼi ìwa Mbaʼ tì Anɔŋisəg Yeso Kristo wì ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd. 4Anɔŋisəg Yeso Kristo ya fə nàʼ ìwi nyɔd ane aghi àfàtì imbə̀ʼ ìmba inug tibɔ̀ŋ. Wì ya ghì ane ni chì awa inga nyùmə̀ isəg inug tibɔ̀ŋ gho̰. Wì ya ghì ane icheg ne Ŋwiye ne yaʼi ìwa Mbaʼ kə̀bi. 5Tì ghumni Ŋwiye kwàʼ ane ighə̀m imɔʼ. À ya ane.
Chəyi ywìrì ikən chɔm ndəŋ
6Anug ze chè amə imbə̀ʼ icheg ne mə we zùghə gha mbə̰ mbe fə se sàŋà Ŋwiye we ne ya ghi ìchɔ̀mì inən anjìm Kristo, kàrì awən. Mbə̰ mbe sàŋà aməd se bḛ anug ndəŋ gha à ya ikən chɔm. 7Tesiʼ ya gha, chəyi bèyi ikən chɔm ndəŋ angu. À ya gha, bəd mɔ̀ʼɔ mbe kə̀bə̀ ni bùrì ìmbən itog bə̀ kə̀bə̀ ni kɔpi ikən chɔm imbə̀ʼ Kristo ne ya ikən tesiʼ. 8Anug ne angu ya gha, ka bèyi mba mbo̰ kə̀ angirə̀ ne swiʼi ikaŋ àbɔ̀ŋɔ mə̀ ghà anug mɔ̀ʼɔ inən gha à ya ikən chɔm chèyi ane we ne tì ya fə gha inən, Ŋwiye ziye ndɔ̀n igun tengàŋ. 9Anug ze ne tì ya fə gha inən a mbègtog, mə̀ ya anìŋ bə̀ ywìrè bèʼre inən gha: Wə̀d mɔ̀ʼɔ mə̀ ghà anug ndəŋ inən gha à ya ikən chɔm, ne kayi ikən chɔm we ne mbə̀ ya fə zughi bḛ, Ŋwiye ziye ndɔ̀n igun tengàŋ!
10Mbə̰ kə kɔ̀ndɔ gha mo ya kə̀bə̀ gha bəd bḛ gha mo bɔ̀ŋ, kə̀ gha Ŋwiye bḛ gha mo bɔ̀ŋ? Kə̀ mbə̰ kə kɔ̀ndɔ gha mo ya kə̀bə̀ ni ghì inug ne biri bɔ̀ŋ yaʼ abə bəd? Indèʼ ka! Àmə yaʼ aghi ne mo ya kə̀bə̀ ni ghì inug ne biri bɔ̀ŋ yaʼ abə bəd, nji mo kayi ywìrè wə̀d àfàʼì Kristo.
Icheg ne Ŋwiye ya chɔʼi Pɔl
11Ìmbum məfi fɔrɔ ìtum njàbi, mə kə̀b gha mbə̀ kyeri gha ikən chɔm gho̰ ne mo we ghà anìŋ ya kayi anug ne wə̀d-aku tàngi. 12Kayi wə̀d-aku ya ghà ikən chɔm gho̰ inum. Kayi bə̀ wə̀d-aku ya chwiti inum. À ya Yeso Kristo ya ghi mə kyeri ikən chɔm gho̰.
13Mbə̰ ya fə zug icheg ne mə̀ yaya zìyè atog ane àza anug Ŋwiye mə̀Ju. Mə ya taŋ chɔʼ ibɔʼì ighog abə bəd inga ifeti bəd Ŋwiye bə̀ kə̀b ni fə nimni awɔb nimni. 14Mə ya taŋ zì atog ane àza anug Ŋwiye mə̀Ju chè mə̀Ju nɔʼ nɔʼ ne yaʼi ìmbum bəd kàŋ. Mə ya bə̀ taŋ zì atog ni nɔ̀ŋì ikuchèg aben we ne ìmba mə̀mbaʼ ya chwiti ina. 15Si ya gha, bɔŋ mbi ya se gwi mə, Ŋwiye ya fə ghì ìchɔ̀mì inum, chɔʼ amə gha mə̀ yaʼ wə̀d àfàʼì məd. 16Wì ya taŋ kɔ̀ŋ, ghì mə̀ bàd Ŋwan məd kwàʼ ane àmə aghə. Wì ya ghì ane ni gha, mə̀ si ghò chètì ikən chɔm imbə̀ʼ Ŋwan məd we abə bəd ne kayi mə̀Ju. Ane, chəyi mə̀ ya biri anug imbə̀ʼ ikən chɔm gho̰ abə wə̀d mɔ̀ʼɔ ka. 17Chəyi mə̀ ya bə kɔʼ ghò a Jèrusalèm ni biri anug imbə̀ʼ ikən chɔm gho̰ abə bədtɔm Kristo mbe ne wì ya cha awɔb bɔŋ se chà amə. Mə ya ghò kwàʼ ati yaʼ a Àrabìyà. Mə ya chughi angu, si nɔ̀ʼ bə̀ndì ghò a Dàmaskòs.
18Anyumə̀ ne tituʼ titad ya che, mə̀ ya kɔʼ ghò a Jèrusalèm ni taŋ kyeri Pità. Mə ya pè chùghi tì məd ane ineg ìghum chɔ̀b ita̰. 19Chəyi mə̀ ya bàri wə̀dtɔm Kristo ndəŋ ka chèyi ane Jem we ne yaʼi ifi Anɔŋisəg. 20Ŋwiye kyèri gha anug azo̰ ne mə ŋwàʼrà inən anìŋ ya kwàʼ tesiʼ, kayi anug ako. 21Mə ya si nɔ̀ʼ a Jèrusalèm ghò a Sirìyà fɔrɔ a Sìlisìyà. 22Chəyi tifeti bəd Kristo te a Jùdeyà ya kiri bari amə. 23Mbɔb ya zug məyi anug ne bəd yaya ghà imbə̀ʼ amə gha, “Wə̀d we ne yaya chɔ̀ʼɔ ìmba ibɔʼì ighog, məd gho̰ fə bə̀ŋə se ghàmà bḛ ikən chɔm we ne wì yaya kə̀bə̀ ni nimni.” 24Mbɔb ya zug ane, se ghùmnə Ŋwiye imbə̀ʼ ìchɔ̀mì məd ne wì ghi inum.
Currently Selected:
Gàlesìyà 1: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
