2 Timotì 3
3
Inug ne biri dù inga ineg mbe ne si nwḭ̀yḛ̀
1Àghò wendi gha inug bə bə biri dù inga ineg mbe ne isəg we se nwḭ̀yḛ̀. 2Bəd biri se kɔ̀ŋɔ̀ məyi ìtɔb nyàmnyɔd bə̀ kɔ̀ŋɔ̀ ikab. Bəd biri se kɔ̀mɔ̀ igo, nɔ̀ nyɔd bə̀ zɔ̀mbɔ̀ bəd. Bɔn biri se ghìyə̀ tìzughə̀ abə ìmbɔb mə̀mbaʼ. Chəyi bəd biri ya bḛ inug chɔm ne bəd mbe fàʼà inɔb. Chəyi bəd biri ya bə̀ ghìyə̀ inug ne zḛ imbìghè abə Ŋwiye. 3Chəyi bəd biri ya kɔ̀ŋɔ̀ mə̀mbin. Chəyi mbi biri ya wàʼa inug tibɔ̀ŋ ìmbi mə̀mbin. Bəd biri ya chìkə̀ tikum bəd. Chəyi bəd biri ya nyìmbe nyɔd ane anug. Bəd biri ya kɔ̀ŋɔ̀ àzɔ̀ŋì. Chəyi bəd biri ya kɔ̀ŋɔ̀ inug chɔm. 4Bəd biri ya fḛ mə̀mbin. Bəd biri ya kɔ̀ŋɔ̀ anug ni nèʼre ane agaŋ. Bəd biri ya nɔ̀ nyɔd. Bəd biri ya kɔ̀ŋɔ̀ anug ni tə̀d chè anug ni kɔ̀ŋ Ŋwiye. 5Bəd biri yaʼ icheg bəd ne nyimi anug Ŋwiye, si ya gha, mbi biri to̰ awɔb ika we ne yaʼi inga anug Ŋwiye ze. Imbə̀ʼ àghò ya jə̀grə awe tì tiku bəd te.
6Mbɔb ya tiku bəd te ne nyḭ̀yḛ inga nəb bəd tàmba mə̀yi mbe ne ìtɔb fìŋ bɔri, ghì mbi si yaʼ atog inɔb. Mə̀yi mbo̰ ya mə̀yi ne anug ni ghə̀ʼrì tiku inug tibɔ̀ŋ ijìm fə jəghi awɔb mànì. 7Aŋa ya mə̀yi mbe ne mbe kà chwìte tesiʼ we ne yaʼi inga Ìngam Ŋwiye inɔb, si ya gha, chəyi mbɔb mbe kweʼè bḛ tesiʼ we. 8Kwàʼ icheg ne Janès tì Jambrès#3:8 Janès tì Jambrès ya bəd tikaŋì a Ijìb ne yaya ghìyə̀ mə̀majìg yaya tàŋà inug ne Muse ya gha, à ya bə̀ ane ne bəd mbo̰ ne chwìte inug mbe bə̀ tàŋà tesiʼ we ne yaʼi inga Ìngam Ŋwiye. Mbɔb ya bəd ne ìtɔb fìŋ fə tu. Mbɔb ya mbaŋà te ne chəyi tì ìwɔb ibḛfiŋ igun Kristo taŋ kà. 9Tesiʼ ya gha, chəyi mbɔb biri ghò agha sà imbə̀ʼ icheg ne bəd biri zambi kyeri tiku bəd ne mbɔb yaʼi mbiwən. À ya icheg ne ze bə yaʼ abə Janès tì Jambrès.
Tikə ne Pɔl ya si nwḭ̀yḛ̀ nàʼ abə Timotì
10Timotì, Àghò kyèri inug ijìm ne mə̀ yaya chwìte abə bəd, bə̀ kyèri icheg ne mə̀ yaya chùghə. Àghò kyèri atog anug ne mə̀ ya nɔŋi ìmə ìtḛ̀ igun, fɔrɔ icheg ne mə̀ ya nɔŋi ìmə ibḛfiŋ inga Yeso. Àghò kyèri icheg ne mə̀ ya beri inyimbifiŋ, bə̀ kyèri icheg ne mə̀ yaya kɔ̀ŋɔ̀ bəd. Àghò bə̀ kyèri icheg ne mə̀ yaya nyìʼè fìŋ inga nyùmə̀ ngəʼ. 11Àghò kyèri icheg ne bəd yaya chɔ̀ʼɔ ìmbum ibɔʼì ighog, bə̀ kyèri icheg ne bəd yaya chə amə. Àghò kyèri tiku inug ijìm ne mbi ghi inum inga Antìyɔ̀g, tì a Ìkonìyùm fɔrɔ a Listrà. Àghò kyèri icheg ne bəd ya chɔʼri ìmbum ibɔʼì ighog mə bə̀ kiri nyiʼ fìŋ. Bəd ya jiʼì ghì inug mbo̰ ijìm inum, si ya gha, Anɔŋisəg ya chì amə inga nyùmə̀ ngəʼ ìto̰ tijìm. 12Tesiʼ ya gha, wə̀d ijìm ne kə̀bə̀ ni chughi icheg ne Ŋwiye kə̀bi anjìm icheg ne wì nɔŋi ibḛfiŋ igun Yeso Kristo, mbi mənyìʼ chɔʼ ibɔʼì ighog məd. 13Àsi bəd inug tibɔ̀ŋ fɔrɔ bəd mbe ne nìŋə tikum bəd tàmba mə̀mbin, mbɔb biri chè imbìghè ni ya tàmba bəd. Bəd ndəŋ biri bə tambi awɔb. 14Àsi awe, àghò che imbìghè ni nɔ̀ŋì inug mbe ne àghò nàni bə̀ bàd gha à ya kwàʼ tesiʼ. Taŋ nyìmi inug mbe imbə̀ʼ icheg ne àghò taŋ kyèri wə̀d ne ya chwi inug mbe ine. 15Àghò bə̀ wèndi gha, ni ko ane nyumə̀ ne àghò ya yaʼi ŋwan kwa, àghò ya fə kyeri Ìngam Ŋwiye. À ya Ìngam Ŋwiye we biri nàʼ iwe ine ni ghì gha àghò pum anjìm icheg ne àghò nɔ̀ŋì ibḛfiŋ igun Yeso Kristo. 16Ìngam Ŋwiye ijìm ya Ŋwiye ya cha àzi Azwighi gha ze ghiyə mbe ŋwaʼra. Ìngam Ŋwiye bɔ̀ŋ ni chwiti inug abə bəd inga, tì ni gaŋ bəd ne ghìyə̀ inug tibɔ̀ŋ angu. Ìngam Ŋwiye ya wètè ni sèmbì bəd ne fèbè. Wi ya bə̀ wètè ni də̀ni bəd gha mbe se ghìyə̀ inug ne təmi kòʼ. 17Inug mbo̰ ijìm biri ghì gha wə̀d àfàʼì Ŋwiye taŋ kòʼ ni fàʼ ìfàʼì chɔm ijìm.
Currently Selected:
2 Timotì 3: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
