1 Tèsàlonikà 2
2
Inug mbe ne Pɔl ghi a Tèsàlonikà
1Ìmba məfi fɔrɔ ìta njàbi, mbə̰ fə kyeri àzən aghi gha, kayi àfàʼì ako ne tì ya yeʼe mùg awən. 2Bəd mbe a Filipì ya ghì tì zə̰ ngəʼ. Mbə̰ bə̀ kyèri àzən aghi gha mbi ya zì tìnìrètog igun ina. Si ya gha, Ŋwiye ya nàʼ ika ina gha tì gha ikən chɔm inən, ka chəyi bəd nɔʼ nɔʼ ya kə̀bi gha tì gha ikən chɔm we. 3Ìngam Ŋwiye we ne te ghà inən ya kayi ni fèbrì awən, kə̀ gha tì bèrì ikɔndi tibɔ̀ŋ mɔ̀ʼɔ imbə̀ʼ awən, kə̀ gha tì ya kə̀bə̀ ni tambi awən. 4Anug ne angu ya gha, tì we ghà məyi icheg ne Ŋwiye kə̀bi gha tì gha. Wì fə niŋ awa ane bəd ne kòʼi gha wì ziye ikən chɔm gho̰ ina ikye ibo. Chəyi te ghà ikən chɔm ni ghì gha fìŋ abə bəd bɔŋɔ. Tì ya ghà yaʼ icheg ne ze biri bɔ̀ŋ abə Ŋwiye we ne kyeri ìta fiŋ inga. 5Mbə̰ kyèri gha chəyi tì yaya ghàmà ìngam nəmi nəmi ni tambi awən. Ŋwiye bə̀ kyèri gha chəyi tì yaya ghàmà inug məyi ni kəndi icheg ne te ghə̀ʼrə̀ ìmbən ighi. 6Chəyi tì yaya kə̀bə̀ gha mbə̰ kə̀ bəd ndəŋ ya ghùmnə awa.
7Icheg bədtɔm Kristo, nji tì ya biri ighi inən. Tì ya chughi yaʼ ane àbɔrɔ̀bɔd tì inən icheg ngɔb ne kyèʼrè ìmbi bɔn. 8Ane, icheg ne tì ya taŋ kɔ̀ŋ awən, chəyi tì ya kə̀bi məyi ni ghì gha mbə̀ kyeri ikən chɔm imbə̀ʼ Ŋwiye. Tì ya bə̀ kə̀b ni ghì inug ijìm ni wètì awən icheg ne tì kɔ̀ŋ awən. 9Ìmba məfi fɔrɔ ìta njàbi, mbə̰ kyèri icheg ne tì yaya taŋ zìyè atog fàʼà kwàʼ ane ika. Tì yaya fàʼà ane tisi fɔrɔ izimi ni ghì gha anyumə̀ ne te ghà ikən chɔm imbə̀ʼ Ŋwiye inən, imbə̀ʼ tì yaʼ awa mbèʼ igun inən.
10Mbə̰ kyèri, Ŋwiye bə̀ kyèri gha ìwa ikuchèg tì inən ya zen. Tì yaya ghìyə̀ inug ne koʼi bə̀ ghìyə̀ inug ne chəyi tì wə̀d mɔ̀ʼɔ abɔ̀ʼ mbə̰ mbe ne bḛ Kristo ghà anug tibɔ̀ŋ mɔ̀ʼɔ imbə̀ʼ awa. 11Mbə̰ kyèri gha tì ya nyimi awən icheg ne mbaʼ we nyìme ìmbi bɔn. 12Tì yaya tìmbè awən, bə̀ chè imbìghè ni nəri awən bə̀ bòʼo ibo inən gha mbə̀ chughi ane ikuchèg ne biri ghì gha fìŋ Ŋwiye bɔŋɔ. À ya məd kàri awən gha mbə̀ yeʼe nyi inga anug ìfɔ̀n məd fɔrɔ inga ighumni məd.
13Tì we bə̀ nàʼà məyakà abə Ŋwiye aghəm ajìm imbə̀ʼ icheg ne anyumə̀ ne tì ya yèʼe tì Ìngam Ŋwiye inən, mbə̰ ya zug bḛ gha à ya Ìngam Ŋwiye, kayi ìngam wə̀d-aku. Tesiʼ ya gha, à ya kwàʼ Ìngam Ŋwiye. Ìngam Ŋwiye we we fàʼà inga mbə̰ mbe ne bḛ Kristo. 14Ìmba məfi fɔrɔ ìta njàbi, inug mbe ne ya du abə ifeti bəd Ŋwiye we a Jùdeyà, mbe bə̀ dù inən. Ifeti bəd Ŋwiye we ya bəd mbe ne ya bḛ Yeso Kristo. Mbə̰ ya zə̰ ngəʼ ikye abo abə ìmbən bəd aben bə̀ icheg ne mbɔb ya bə̀ zə̰ ngəʼ ikye abo abə mə̀Ju. 15Mbɔb ya zweti Anɔŋisəg Yeso, bə̀ zweti bədkə̀n Ŋwiye, bə̀ chɔʼ ìmba ibɔʼì ighog. Mbɔb ya ghì inug ne chəyi fìŋ Ŋwiye ya bɔ̀ŋi tì inɔb. Mbɔb ya yaʼ bəd ìpàb abə wə̀d ijìm. 16Mbɔb yaya kə̀bə̀ ni kən gha imbə̀ʼ tì ghama awa ikən we ne ghìyə̀ bəd pumə̀ abə bəd mbe ne kayi mə̀Ju. Ìwɔb ikuchèg gho̰ ya ghì ìmbɔb inug tibɔ̀ŋ sweg mànì. Ŋwiye ya nwḭ̀yḛ̀ gaŋ inɔb kwàʼ icheg chɔm.
Pɔl kɔ̀ŋ ni ywìri ghò bàd bəd Kristo mbe a Tèsàlonikà
17Ìmba məfi fɔrɔ ìta njàbi, icheg ne tì ya sàŋì awən ane iki nyumə̀, tì ya taŋ kɔ̀ŋ ni yeʼe abɔ̀ʼ inən imbə̀ʼ ywiri bàd awən. Tì ya jiʼì sàŋì awən ane, si ya gha, tì yaya kiri kɔndɔ awən aghəm ajìm. 18Tì ya taŋ kɔ̀ŋ ni ywìri yeʼe abɔ̀ʼ inən. Mo Pɔl ya taŋ kə̀b ni yeʼe aghəm nɔʼ nɔʼ, si ya gha, Sàtàn ya ghì inug mɔ̀ʼɔ kən awa. 19Àkə mə̀we ghi gha tì nɔŋɔ ikɔndi igun ighi mbe ne te ghɔ̀mɔ̀? Àkə mə̀we biri ghì gha tì gyendi? Àkə mə̀we biri ghì gha tì kɔmɔ igo imbìghè abə Anɔŋisəg Yeso anyumə̀ ne wì ywirì yèʼe? Imbə̀ʼ à ya mbə̰? 20À ya tesiʼ gha, à ya mbə̰ biri ghì gha tì kɔmɔ igo bə̀ chùghi ane igyendi.
Currently Selected:
1 Tèsàlonikà 2: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
