1 Jɔn 5
5
Bəd ne bḛ Ŋwan Ŋwiye fə màʼ chè isəg
1Wə̀d ne bḛ gha Yeso ya Wə̀d we ne Ŋwiye zɔ̀ʼi ya wə̀d Ŋwiye. Wə̀d ne kɔ̀ŋi Mbaʼ ya bə̀ kɔ̀ŋɔ̀ ŋwan məd. 2Aŋa ya icheg ne te kyère gha tè kɔ̀ŋ bɔn Ŋwiye: Tì ya kɔ̀ŋɔ̀ Ŋwiye bə̀ nɔ̀ŋɔ̀ tikə məd. 3Ni kɔ̀ŋ Ŋwiye ya ni nɔ̀ŋì tikə məd. Chəyi tikə məd ka ina ni nɔ̀ŋì. 4À ya ane imbə̀ʼ icheg ne wə̀d Ŋwiye ijìm fə màʼ chè inug inga isəg. Tì we tì tì màʼ chè inug inga isəg ijìm icheg ne tì nɔŋi fìŋ igun Yeso. 5Wə̀d ne tì wì màʼ chè inug inga isəg àkə we? À ya məyi wə̀d ne bḛ gha Yeso ya Ŋwan Ŋwiye.
Inug ne chwìye gha Yeso Kristo ya Ŋwan Ŋwiye
6Anyumə̀ ne Yeso Kristo ya yeʼe, wì ya chwi gha zìye ya Ŋwan Ŋwiye icheg ne wì ya niŋi mənib fɔrɔ icheg ne wì ya chəmni anəm igun azed abaʼri. Chəyi wì ya niŋi məyi mənib. Wì ya niŋ mənib bə̀ chə̀mni anəm. Azwighi Ŋwiye zìye ze bḛ gha anug azo̰ ya tesiʼ imbə̀ʼ icheg ne Azwighi Ŋwiye ya ghà tesiʼ. 7Ane, inug itad mbe angu ne chwìye gha anug azo̰ ya tesiʼ. 8Inug mbo̰ ya Azwighi Ŋwiye tì mənib fɔrɔ anəm. Inug mbo̰ itad ya mə̀tə̀ məyi anug afibì. 9Tè bḛ anug ne bəd mbe ghà. Si ya gha, anug ne Ŋwiye we ghà ze faŋ chè imbə̀ʼ icheg ne à ya anug ne Ŋwiye gha. Ŋwiye zìye fə ghà gha anug imbə̀ʼ Ŋwan məd ya anug tesiʼ. 10Wə̀d ne bḛ Ŋwan Ŋwiye fə bə̀ bḛ anug ze ne Ŋwiye gha. Wə̀d ne chəyi wì bḛ anug ne Ŋwiye gha imbə̀ʼ ìwi Ŋwan, tengàŋ we ghà gha Ŋwiye ya wə̀d inug ako. À ya ane imbə̀ʼ icheg ne chəyi məd bḛ anug ze ne Ŋwiye gha imbə̀ʼ ìwi Ŋwan. 11Anug ze ne wì gha imbə̀ʼ ìwi Ŋwan ya gha: Ŋwiye fə ghì gha tì jəg ìtḛ̀ ighə̀m imɔʼ we ne Ŋwan məd we nàʼà ina. 12Wə̀d ne yaʼi ane anug amɔʼ tì Ŋwan Ŋwiye biri jəg ìtḛ̀ we. Wə̀d ne chəyi wì yaʼi ane anug amɔʼ tì Ŋwan Ŋwiye, chəyi wì biri jəg ìtḛ̀ we.
Inug ne si nwḭ̀yḛ̀
13Mə ya ŋwàʼrà inug mbo̰ anìŋ inən, mbə̰ mbe ne bḛ Ŋwan Ŋwiye, ni gha mbə̀ kyeri gha mbə̰ biri jəg ìtḛ̀ ighə̀m imɔʼ. 14Aton ne chəyi te bɔ anyumə̀ ne te chàʼrà Ŋwiye ya imbə̀ʼ icheg ne tì fə kyeri gha məd we zùghə inug mbe ne te bìre anyumə̀ ne tì biri anug ne məd kə̀bi. 15Icheg ne tì kyeri gha məd we zùghə awa anyumə̀ ne te bìre inug ibo, tè bə̀ kyèri gha wì biri nàʼ ighi mbe ne te bìre.
16Wə̀d mɔ̀ʼɔ mə̀ bàd ìwi ifi ne we ghìyə̀ anug tibɔ̀ŋ ze ne chəyi ze biri ghì gha wì ku nim, wì chaʼra Ŋwiye gha wì naʼa ìtḛ̀ ibo. Mə ya ghà yaʼ bəd ne ghìyə̀ inug tibɔ̀ŋ mbe ne chəyi mbe ghìyə̀ gha wə̀d ku nim. Anug tibɔ̀ŋ ze angu ne ghìyə̀ gha bəd ku nim. Chəyi mə gha wì chaʼra Ŋwiye igun bəd ne ghìyə̀ iku anug tibɔ̀ŋ we. 17Anug tibɔ̀ŋ ya fə anug tibɔ̀ŋ. Si ya gha, inug tibɔ̀ŋ mɔ̀ʼɔ mbe angu ne chəyi mbe ghìyə̀ gha wə̀d ku.
18Tè kyèri gha chəyi wə̀d Ŋwiye mɔ̀ʼɔ angu ne chè imbìghè ni ya ghìyə̀ inug tibɔ̀ŋ. Ŋwan Ŋwiye we kyèʼrè aməd ne chəyi icheg ne tì Wə̀d Tibɔ̀ŋ ywirì zì anə igun məd.
19Tè kyèri gha mba ya bəd Ŋwiye. Tè bə̀ kyèri gha isəg ijìm ya aton Wə̀d Tibɔ̀ŋ. 20Tè bə̀ kyèri gha Ŋwan Ŋwiye fə yeʼe. Wì fə ghì gha ìmba itog zen tì kyeri Ŋwiye we ne ya Ŋwiye tesiʼ. Tì yaʼ ane ifɔti tì Ŋwiye we ne ya Ŋwiye tesiʼ. Tì we bə̀ ane ifɔti tì Ŋwan məd, Yeso Kristo. Məd ya Ŋwiye tesiʼ we ne ghi gha bəd jəg ìtḛ̀ ighə̀m imɔʼ.
21Ìmbum bɔn ne mə̀ taŋ kɔ̀ŋ, imbə̀ʼ mbə̰ si bere awən anug mɔ̀ʼɔ ni ghì tì mə̀ŋwiye ako.
Currently Selected:
1 Jɔn 5: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
