1 Kɔrèn 15
15
Anug imbə̀ʼ icheg ne Yeso ya zweme ane iwu
1Ìmbum məfi fɔrɔ ìtum njàbi, anug ne mə̀ kəbi ni wendi inən amad anìŋ ya anug imbə̀ʼ ikən chɔm we ne mə̀ ya gha inən. Mbə̰ ya zug bḛ bə̀ təm kà igun. 2Mbə̰ biri pum anjìm ikən chɔm gho̰ àmə yaʼ ne mbə̀ nyimi Ìngam Ŋwiye we ne mə̀ ya gha inən kwàʼ icheg chɔm. Àmə chəyi ane, nji inug mbe ne mbə̀ nɔŋi ibḛfiŋ igun ya ati ako.
3Anug kyen mbègtog ne mbi ya gha inum, mə̀ ya bə̀ ghà inən. Anug ze ya gha Kristo ya ku imbə̀ʼ ìmba inug tibɔ̀ŋ icheg ne mbi ya ŋwàʼri inga Àŋwàʼrì Ŋwiye. 4Mbi ya twəŋi aməd, wì zwème ane ineg ya pe itad icheg ne mbi ya bə̀ ŋwàʼri inga Àŋwàʼrì Ŋwiye. 5Wì ya dù ìwi ìfe abə Pità, bə̀ fɔrɔ abə bədtɔm mbe ìghum chɔ̀b ibe. 6Ane nyùmə̀ ndəŋ, wì ya bə̀ dù ìwi ìfe abə bəd Kristo ndəŋ ne che che ane aki ata̰ kwàʼ ighəm fìbì. Bəd ndan ndàn abɔ̀ʼ bəd mbo̰ kiri biri izɔm, ka mbi mɔ̀ʼɔ fə ku. 7Wì ya bə̀ si dù ìwi ìfe abə Jem bɔ̀ŋ si dù abə bədtɔm Kristo mbin məjìm. 8Wì ya bə̀ si nwḭ̀yḛ̀ dù ìwi ìfe inum. Mo ya icheg wə̀d ne mbi ya gwi waʼ nyumə̀. 9Mo ya wə̀dtɔm Kristo ne kə chè bədtɔm Kristo məjìm. Chəyi mə̀ bi kòʼ ni gha mbe kàrà amə ane wə̀dtɔm Kristo imbə̀ʼ icheg ne mə yaya chɔ̀ʼɔ ibɔʼì ighog abə ifeti bəd Ŋwiye. 10Si ya gha, Ŋwiye ghì ìchɔ̀mì inum mə si wə̀d ne mə yaʼ ìwiwən amad anìŋ. Ìchɔ̀mì we ne Ŋwiye ghi inum, chəyi wi ya che ako. Tesiʼ ya gha, mə we taŋ zìyè atog ni fàʼ chè bədtɔm mbin. Kayi mo we fàʼà. À ya ìchɔ̀mì we ne Ŋwiye ghi inum we fàʼà inga inum. 11Ane, kə̀ àkə Ìngam Ŋwiye we ne mə ghà, kə̀ ìwe ne mbɔb mbe ghà, anug ne te chètè ya anug ze ne mbə̀ ya zughi bə̀ bḛ.
Inug imbə̀ʼ icheg ne bəd ku biri zweme
12Icheg ne mbe ghà inən gha Ŋwiye ya zwemne Kristo, ze kə si chè iye gha bəd mɔ̀ʼɔ abɔ̀ʼ inən mbe ghà gha chəyi bəd ku biri zweme? 13Àmə yaʼ ni gha chəyi bəd ku biri zweme, nji chəyi Ŋwiye ya bə zwèmne Kristo. 14Àmə yaʼ ni gha chəyi Ŋwiye ya zwemni Kristo, nji Ìngam Ŋwiye we ne te ghàmà ya ati ako. Ane, icheg ne mbə̀ bə nɔ̀ŋì ibḛfiŋ igun Kristo ya bə̀ ati ako. 15Ze mə̀ yaʼ ane, nji ze chwi gha tì ya ghàmà inug ako imbə̀ʼ Ŋwiye gha wì ya zwemne Kristo ne chəyi wì ya zwemne aməd. Ze mə yaʼ ni gha chəyi Ŋwiye ya zwemni Kristo, nji chəyi bəd ku biri zweme. 16Àmə yaʼ ni gha chəyi bəd ku biri zwemne, nji chəyi Ŋwiye ya zwemne Kristo. 17Àmə yaʼ ni gha chəyi Ŋwiye ya zwemni Kristo, nji icheg ne mbə̀ nɔŋi ibḛfiŋ igun Kristo ya ati ako. Ane, chəyi Ŋwiye kiri waʼi ìmbən inug tibɔ̀ŋ. 18Ane ya gha, bəd mbe ne ya bḛ Kristo bɔŋ se kùyə, mbɔb fə nim. 19Àmə yaʼ ne ikɔndi we ne tì nɔŋi igun Kristo biri nwḭ̀yḛ̀ məyi inga ìtḛ̀ gho̰, nji bəd kòʼ ni sɔ̀mnɔ̀ imbə̀ʼ awa chè icheg ne mbe sɔ̀mnɔ̀ imbə̀ʼ bəd ndəŋ məjìm.
20Tesiʼ ya gha, Ŋwiye ya zwemne Kristo. À ya bə̀ tesiʼ gha, Kristo ya wə̀d mbègtog ne Ŋwiye ya zwemni abɔ̀ʼ bəd məjìm mbe ne fə ku. 21Icheg ne iwu ya yèʼe inga isəg ijìm anjìm anug tibɔ̀ŋ ne wə̀d imɔʼ ya ghi, à ya bə̀ ane ne anug ne zweme fə bə yèʼe anjìm icheg ne wə̀d imɔʼ ya zweme ane iwu. 22Bəd məjìm mənyìʼ ku anjìm icheg ne mbi yaʼi ane ifɔti tì Adàm. Ane, bəd məjìm biri bə chughi izɔm icheg ne mbi yaʼi ane ifɔti tì Kristo. 23Ŋwiye biri zwemni wə̀d imɔʼ imɔʼ ane tiwaŋ icha icha. Wə̀d mbègtog we ne Ŋwiye zwèmni ane iwu ya Kristo. Anyumə̀ ne Kristo ywirì yèʼe, Ŋwiye biri zwemni bəd mbe ne yaʼi bəd Kristo. 24Anyumə̀ ne wì biri ghì ane, ìnwḭ biri si yèʼe. Ane nyumə̀ we, Kristo biri nimni izwighi ijìm mbe ne yaʼi ikaŋ, nìmni izwighi ijìm ne yaʼi inga ifə, bə̀ nìmni izwighi ijìm ne yaʼi inga isəg, si nàʼ anug ìfɔ̀n abə Ŋwiye ne yaʼi Mbaʼ. 25Kristo bèrì ni tùmbì isəg ghò pè ane nyùmə̀ ne wì fə ghi bəd ìpàb məd məjìm si yaʼ ibo aton aghog. 26Wə̀d ìpàb we ne məd biri si nwìyḛ̀ ni nimni ya iwu. 27A ze inga Àŋwàʼrì Ŋwiye gha, “Ŋwiye fə nɔ̀ŋì ighi ijìm aton ighog məd.” Ze mə̀ yaʼ inga Àŋwàʼrì Ŋwiye gha, “Ŋwiye fə nɔ̀ŋì ighi ijìm aton ighog məd,” nji ze dù zen gha chəyi Ŋwiye yaʼi abɔ̀ʼ ighi mbe. À ya məd Ŋwiye nɔŋi “ighi ijìm” aton Kristo. 28Anyumə̀ ne Ŋwiye fə nɔŋi ighi ijìm aton aməd, Ŋwan məd zìye biri si chùghi aton Ŋwiye we ne nɔŋi ighi ijìm aton aməd, ni ghì gha Ŋwiye yaʼ igun ighi ijìm bə̀ tùmbì ighi ijìm.
29Àmə yaʼ ni gha chəyi Ŋwiye biri zwemni bəd, nji aton ne bəd mbe se nìŋə mənib atog abə bəd ne fə ku, àkə gha? Àmə yaʼ ni gha chəyi Ŋwiye biri nɔ̀ʼ zwemni bəd, nji aton ne bəd mbe se nìŋə mənib atog abə bəd ku mbe, àkə gha?#15:29 Anug ni niŋ mənib ane ikum iwu bəd ya anug ako mɔ̀ʼɔ ne bədkə̀n mɔ̀ʼɔ ne yaya chwìte inug ako yaya chwìte abə bəd anyumə̀ ne Pɔl yaya chètè ikən chɔm imbə̀ʼ Kristo 30Àsi mba? Aton ne ngəʼ ze nyḭ̀yḛ igun ina mà nyumə̀ ijìm, àkə gha? 31Ìmbum məfi fɔrɔ ìtum njàbi, mə we ichug iwu ineg ijìm! À ya ane imbə̀ʼ icheg ne mə we kɔ̀mɔ̀ igo imbə̀ʼ awən icheg ne tì yaʼi ane ifɔti tì ìwa Anɔŋisəg, Yeso Kristo. 32Àmə yaʼ ni gha mə yaya zɔ̀ŋɔ̀ tì nyàm tɔ tɔ a Efesùs, icheg ne wə̀d-aku kɔ̀ndi, nji chùd ne mə̀ biri jəg àkə iza? Àmə yaʼ ni gha chəyi Ŋwiye biri zwemni iwu bəd, nji tì we ghìyə̀ inug icheg ne Àŋwàʼrì Ŋwiye gha gha,
“Tì jəg bə̀ no imbə̀ʼ
icheg ne tì biri ku isu.”
33Imbə̀ʼ mbə̰ bḛ awən gha wə̀d mɔ̀ʼɔ tambi awən. Mbə̀ kyeri gha, “Mə̀sə̀ʼ tibɔ̀ŋ ya chìkə̀ bəd inug chɔm.” 34Mbə̀ ywiri taŋ kɔndi icheg chɔm, waʼ inug tibɔ̀ŋ. Chəyi bəd mɔ̀ʼɔ abɔ̀ʼ inən kyeri Ŋwiye. Mə ya ghàmà anìŋ ni nàʼ tìnìrètog inən.
Iku nyàmnyɔd ne bəd biri zweme tì ìziwən
35Wə̀d mɔ̀ʼɔ biri biri gha, “Ŋwiye kə ghùm zwemni iwu bəd iye? Bəd ne zweme kə ghùm bèrì iku nyàmnyɔd weg?” 36À ya kwàʼ ibiri anen! Fitam ngwèd ne mbi nyɔʼi inga ìseg ya mənyìʼ bɔb bɔŋ se gwère. 37Anyumə̀ ne wə̀d we nyɔ̀ʼɔ̀ ngwèd, kə̀ àkə kyì kə̀ aghi ndəŋ, wì ya nyɔ̀ʼɔ̀ məyi fitam, kayi ìtḭ feg we ne biri yaʼ. 38Si ya gha, à ya Ŋwiye we nàʼà ìtḭ feg abə iku titam ijìm icheg ne məd ya fə nɔ̀ŋi. 39Nyàmnyɔd ijìm kayi iku ifibì: wə̀d-aku bèrì ìzi, nyam mben beri ìzɔb, tìnən bèrì ìzɔb, su bə̀ bèrì ìzɔb. 40Ighi mbe ne yaʼi ikaŋ àbɔ̀ŋɔ mbe angu. Ighi mbe ne yaʼi igun isəg mbe bə̀ angu. Si ya gha, ighi mbe ne yaʼi ikaŋ àbɔ̀ŋɔ ya zḛ njànda chè ighi mbe ne yaʼi igun isəg. 41Nyùmə̀ ya zùʼə ane ìwi ikuchèg, iməg bə̀ zùʼə ane ìwi. Titəm-məg ya bə̀ zùʼə ane ìwɔb tì ikuchèg. Iku icheg ne titəm-məg te bə̀ zùʼə ya yi icha icha.
42À ya icheg ne ze biri yaʼ anyumə̀ ne bəd biri zweme ane iwu. Nyàmnyɔd ze ne mbi twəŋi inga isəg ya ze ne bɔ̀bɔ. Àsi nyàmnyɔd ze ne wə̀d zwème ane iwu ya ze ne chəyi ze bɔ̀bɔ. 43Nyàmnyɔd ze ne mbi twəŋi, zè bə bə̀ bɔd. Àsi ze ne wə̀d zweme, zè bɔ̀ŋ bə̀ kà. 44Nyàmnyɔd ze ne mbi twəŋi ya ze ne bèrì nyam fɔrɔ iwu. Àsi ze ne wə̀d zwème ane iwu ya ze ne Azwighi Ŋwiye ze nàʼà.
Nyàmnyɔd ni bèrì nyam fɔrɔ iwu mə̀ yaʼ angu, ane ya gha, nyàmnyɔd ne Azwighi ze nàʼà bə̀ yaʼ. 45À ya bə̀ ane ne ze yaʼi inga Àŋwàʼrì Ŋwiye gha, “Ìtḛ̀ ya yaʼ inga Adàm we ne ya yaʼi wə̀d mbègtog.” Adàm we ne si nwḭ̀yḛ̀ ya Azwighi ze ne nàʼà ìtḛ̀. 46Nyàmnyɔd ze ne Azwighi ze nàʼà kayi ze ne Ŋwiye ya bi tàngi. Ŋwiye ya bì tàngi nyàmnyɔd ze ne bèrì nyam fɔrɔ iwu bɔŋ se tànga ze ne Azwighi ze nàʼà. 47Ŋwiye ya tangi mbaŋà mbègtog ane ìseg ze igun isəg. Wə̀d we ne ya si yèʼe anjìm, wì nɔ̀ʼ yaʼ ikaŋ àbɔ̀ŋɔ. 48Bəd mbe ne yaʼi igun isəg ya icheg wə̀d we ne mbi tangi ane ìseg. Bəd mbe ne nɔ̀ʼi ikaŋ àbɔ̀ŋɔ ya bə̀ icheg wə̀d we ne ya nɔ̀ʼi ikaŋ àbɔ̀ŋɔ. 49Icheg ne tì yaʼi icheg wə̀d we ne mbi tangi ane ìseg, à ya bə̀ ane ne tì biri bə yaʼ icheg wə̀d we ne nɔ̀ʼi ikaŋ àbɔ̀ŋɔ.
50Ìmbum məfi fɔrɔ ìtum njàbi, anug ne mə ghà inən ya gha, chəyi wə̀d ne beri nyàmnyɔd tì anəm inga biri jəg anug ìfɔ̀n Ŋwiye. Chəyi nyàmnyɔd ze ne kùyə biri jəg ighi mbe ne yàʼa ane ighə̀m imɔʼ. 51Mbə̀ zug! Anug ne yaʼi inə̀mbi ya gha, chəyi mba məjìm biri ku. Tesiʼ ya gha, Ŋwiye biri kɔpi awa mba məjìm, 52ane iki nyumə̀ kwa kwa kwàʼ icheg ne wə̀d we gwìpè ighə. Anug azo̰ biri dù anyumə̀ ne mbi fə fə tàŋ ne si nwḭ̀yḛ̀. Anyumə̀ ne tàŋ ze ghàmi, Ŋwiye biri zwemni bəd ku. Ane, chəyi mbi biri ywiri ku. Ŋwiye biri bə kɔpi awa mba məjìm. 53Nyàmnyɔd ze ne kùyə mənyìʼ bə̀ŋə̀ ane nyàmnyɔd ne chəyi ze kùyə. Aghi ze ne kùyə mənyìʼ bə̀ŋə̀ ane aghi ne chəyi ze kùyə. 54Anyumə̀ ne nyàmnyɔd ze ne kùyə fə bə̀ŋə̀ ane nyàmnyɔd ne chəyi ze kùyə, aghi ze ne kùyə bə̀ bə̀ŋə̀ ane aghi ne chəyi ze kùyə, Ìngam Ŋwiye we ne mbi ŋwàʼri inga Àŋwàʼrì Ŋwiye biri dù ane tesiʼ. Ìngam we ya gha, “Ŋwiye kà chè iwu, Ŋwiye fə nimni iwu.”
55“Iwu! ìwe ika ni chìkì bəd kə gho aya?
Iwu! ìwe ifin ni te bəd iwa?”
56Ifin iwu ya inug tibɔ̀ŋ. Ika ni ghì inug tibɔ̀ŋ ya nɔ̀ʼɔ̀ ane mə̀nɔ̀ʼɔ̀. 57Tesiʼ ya gha, tì naʼa məyakà abə Ŋwiye ni ghì tì bèrì ika ni chè inug tibɔ̀ŋ anjìm ìwa Anɔŋisəg Yeso Kristo. 58Ane, ìmbum məfi fɔrɔ ìtum njàbi ne mə̀ taŋ kɔ̀ŋ, mbə̀ təm kà. Imbə̀ʼ mbə̰ si saŋa awən gha aghi mɔ̀ʼɔ chiʼre ìwən ibḛfiŋ ka. Mbə̀ ya fàʼà àfàʼì ze ne Anɔŋisəg zi inga ìtən tikye ibo ane ìzən fìŋ ijìm. Mbə̀ ya fàʼà ane imbə̀ʼ icheg ne mbə̰ kyèri gha chəyi anug mɔ̀ʼɔ ne mbə̰ mbe fàʼà abə Anɔŋisəg ne biri chè ako.
Currently Selected:
1 Kɔrèn 15: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
