Ròmànì 16

Pàwolò à òme lì hwatò ikɔ̀mi

1Nà e òhweyà nanù ema e ndòmɛ ya arzu ema e hwɛ̀lɛ̀hwɛ̀ Hvòbe, ema a òŋgòwàna lì gbeyà èwòlò ò ŋmèmba ema mò hwèlì ò mbòwa ya Rzɛ̀nkrèyà, a gbèeyà èwòlò ya gbamù. 2È mò karzɛ ò lìna la ama e Rzàŋgò, na òma hwatò hwa ama Lohwɛ̀ hwa àŋgàmɛ̀nɛ̀yi lì gbeyà. Ndeŋgànɛ̀lɛ̀ e mò ŋgbe tɔ̀ ima lòŋgòwanɛ ema mɔ̀ à tànɛyi lì e arzana. È hwiye nanù ema mɔ̀ ŋmìti hvɛ à mà lòma lì òŋgòwàna lòŋgò la hwatò ndèŋgànɛ̀lɛ̀ mò à mà nò òŋgòwànà tɔ̀ imba mbiti.

3Inyɔ e nò kɔmèya Prìrzìlà na mòjòmɛ̀ wa eni Akwìlà, ema irzɔ na wɔ̀ i gbeyà èwòlò ya ama Yerzù Krirztò. 4Wɔ̀ hwà mà emeyà ò lì nò ŋwèeyà. Nà hwa èki. Rzeketɛ imba mbiti mɛnɛ ndi na hwa eka, ndi ŋmèmba mò arzɛ mò hwatò ema hwa rza enje wònyà Yudà, mɔ̀ hvɛ mò hwa eka. 5È nò kɔmèya hvɛ ŋmèmba ema mò taneya ò ndawò ya awu.

È nò kɔmèya hvɛ e mbunda ya ami ya mèrziŋge Èpànɛ̀tùrzì, ema mɔ̀ ndi à mà hwɛ, e mòtò wa wòrzò ò lì lòkɛ̀ Krirztò ò erzòòkà ya Èrzìyà. 6È kɔmè Màlìyɛ̀, ema à mà gbèèyɛ̀ èwòlò rzayi-rzayi ò ìtììtènì ja anyu. 7È kɔmè hvɛ Andrɔ̀nìkùrzì na Jùnìyà wònyànyàŋgò hwa ami hwa wònyà Yudà, ema i ma aŋgɛhwɛnɛ ò hwèwòwà. Hwa hwiyahwi kɔ̀yi-kɔ̀yi ò ìtììtènì ja àpɔ̀rzìtòlò. Ndeŋgànɛ̀lɛ̀ wɔ̀ hwà mà lòma lì hwɛ hwàlòkèlì hwa ama Krirztò ndèŋgàna imba na e lòkɛ̀.

8È kɔmè Amplìyàtùrzì, e mbunda ya ami ya ndìŋgɛ ya màlìŋgò ema na lìŋgàni ò lìinà la ama e Rzàŋgò. 9È kɔmè Ubànùrzì, ema mɔ̀ hvɛ a hwèlì ndi mɔ̀kɔ wa arzu ema i gbèeyɛnɛ èwòlò ya ama Krirztò. È kɔmè hvɛ e mbunda ya ami ya ndìŋgɛ ya màlìŋgò Rztàkìrzì. 10È kɔmè Apɛ̀lɛ̀rzì, ema hwɛ̀ɛ̀mɛ̀ wa eni hwe gbamù hwe uŋmɛ̀lɛ̀ nanù ema a emànɛ̀lɛ̀hwɛ̀yì na Krirztò. È kɔmè hvɛ lìtumba la ama Arìrztòbulùrzì. 11È kɔmè Hɛ̀ròdìyɔ̀nì, ŋmanyàŋgò wa arzu wa wònyà Yudà. O lìna la ama e Rzàŋgò e kɔmè hwaŋga hwatò ema hwa lòkɛ̀ Krirztò ò lìtumba la ama Nàrzìrzùrzì. 12È kɔmè Trìhvàyènà na Trìhvòrza, hwaŋga hwalanà ema hwa gbèeyà e Rzàŋgò èwòlò ya màyìmbì. È kɔmè Pɛ̀rzìrzì e mbunda ya ami ya màlìŋgò, òhvɛhvɛ mòlanà ema à mà gbèyɛ èwòlò rzayi-rzayi ò lìna la ama e Rzàŋgò. 13È nò kɔmèya Lùhvɔ̀rzì, ema e Rzàŋgò e hvɔ̀rzì ò lì mò gbèeyà, e kɔmè hvɛ e nyàŋgò ya eni, ema mɔ̀ à nò wò ndi nàa e ŋmanà wa eni. 14È kɔmè Arzìnkrìtùrzì, Hvlɛ̀gɔ̀nì, Hɛ̀mɛ̀rzì, Pàtròbàrzì, Hɛ̀màrzì, na hwanɛ wònyanyàŋgò hwa arzu na indòmɛ̀ ja arzu ema hwa hwèlì na wɔ̀. 15È kɔmè Hvìlòlògùrzì na Jùlìyà. È nò kɔmèya wònyanyàŋgò wa ami hwa ama Krirztò ema hwa hwɛ̀lɛ̀hwɛ̀ Olìmpàrzì na Nɛ̀rìyùrzì na e ndòmɛ ya eni, na hwatò hwa arzɛ hwa ama Lohwɛ̀ ema hwa hwèlì na wɔ̀.

16È arzàŋgànɛ̀lɛ̀ mɔ̀kɔ nà ɔ̀nɛyi ò lìnà là ama Yerzù. Ŋmèmbà me arzɛ mè è òmelì ikɔ̀mi.

È mbɔrzi yà lìrzùkù

17Ìi wònyamòwè kòkò, nà è kòkòwɛ̀lɛ̀ nanù ema, è aŋgòhweya hwaŋga hwatò ema hwa jànà yùnànelì ò ìtììtènì ja anyu nà lì eŋgìrzɛ̀ hvɛ hwahvɛhvɛ hwatò. Wɔ̀ hwa teŋgɛ̀nɛ̀yi hwèyòkòlèlì ema è ma luwɛ. È rzi keka lì hwa òŋgama. 18È rzi keka lì hwa òŋgama èhwanja hwa rza gbèeyà ndi e Rzàŋgò ya arzu Krirztò, ndi hwa gbèeyà ndi nanù ò lì òndìrzɛ̀ e nyɔ̀ŋgi ya awu. Hwa gbeyàna e mbɔrzi ya awu ya gbamù na jòòhwì ja gbamù ò lì lukɛlɛ hwatò ema hwa rza rzɔ̀ŋgɔ lì rzɔ̀ŋgìtɛ̀nɛ̀. 19Tɔ̀ ima mòtò à mà hweyà lì hvòmɛ̀nɛ̀ lì hweyàna la anyu la ŋmɛ̀ndì mò gbamù, ò lìni lìtìŋga, ò eŋgànɛ̀lɛ̀ na e òkani mɔ̀nyɛ̀ŋgì. Ndi imba na arza nanù ema inyɔ e gbèèye hweyà hwe gbamù, ndi e rzi keka lì ika mèèmà ò lì rzɔ̀ŋgìtɛ̀nɛ̀ mamɛ ema e hwèlì wòhwè. 20Lohwɛ̀ la ɛ̀yɔ̀lɛ̀ ŋmanà mbɔ à hwɛni lì rzììkà Mòkarzɛ̀ ò rze yà matàŋga mà anyu. Inyɛ̀ è ndèli yà ama è Rzàŋgò hwa arzu Yerzù Krirztò è hwɛ nà inyɔ hwa arzɛ.

21Tìmòtì, ema irzɔ nà mɔ̀ i gbèèyɛ̀nɛ̀ èwòlò à è òmelì ikɔ̀mi. Lùrzìyùrzì, Jèrzɔ̀nì nà Rzòrzìpàtà, wònyanyàŋgò wà ami wà wònyà Yudà, wɔ̀ hvɛ hwa e òmelì ikɔ̀mi. 22Imba Tɛ̀tìyùrzì, ema na tìlelì Pàwolò ini itita, imba hvɛ na e òmelì ikɔ̀mi nàa ŋmanyàŋgò wa anyu wa ama Krirztò. 23Gàyiyùrzì, e mòtò ema ò ndawò ya eni ndi na hwèlì, ema ò ndawò ya eni ɔ̀ndi ŋmèmba mò wònya Krirztò mò tàneyà, mɔ̀ hvɛ a e òmelì ikɔ̀mi. Ɛ̀ràrztùrzì, ema mɔ̀ ndi à uta malì ma e mbòwa, na ŋmanyàŋgò hwa arzu Kwàtùrzì wɔ̀ hvɛ hwa e òmelì ikɔ̀mi.#16.23 Lòŋgò la ikààtì ja mòlòmɛ̀ i ma lata ŋmɛ̀ŋgɛ ema mò ùkirzɛ̀ 24: Inyɛ̀ e ndèli ya ama e Rzàŋgò Yerzù Krirztò e hwɛ na inyɔ hwa arzɛ. Inyɛ̀ wò lìya nanù. Lòŋgò la ihvɛhvɛ kààtì i ma lata mònò ŋmɛ̀ŋgɛ ò mburza ŋmɛ̀ŋgɛ ema mò ùkirzɛ̀ 27.

Lìkànɛ là jèka là lìrzùkù

25Inyɛ̀ i ŋgbe Lohwɛ̀ èluhwe èhwanja a òhvi màyìmbì ma lì ètìrzɛ̀ lìlòkɛ̀ la anyu. Ndeŋgànɛ̀lɛ̀ nanù ndi nà mà e òhweyà e hvònda ema nà mà e òhweyà Ŋmɛ̀ndì mò Gbamù mò ama Yerzù Krirztò. Mòŋgò Ŋmɛ̀ndì mò hwèlì ndi e jɔ̀kɛ̀ ema Lohwɛ̀ à mà ute natɛ̀ɛ na e hvònda kòòhwa, ema a rzi uŋmɛ̀lɛ̀ hwatò. 26Ndi ò nàŋgɛ eŋge jɔ̀kɛ̀ e ma jò wuluhwàhwɛlɛ. Mɔ̀ à mà e wuluhwa nàŋgɛ na hweyà ema hwà-òhwèlì hwa hwèlìŋgɛ̀ hwà mà tile ò e kààtì ya ama Lohwɛ̀. Mɔ̀ à mà gbeye ndi nanù, aŋga nanù hwatò hwa arzɛ̀ hwa hwèkòmè hwe ya arzɛ hwa mò lòkɛ̀ na lì mò hweyàne. 27Lohwɛ̀ mɔ̀ ŋmìti mɛnɛ ndi à hwɛni lìhwiyè la arzɛ. Inyɛ̀ i mò ŋgbe èluhwe èhwanja eyà ema Yerzù Krirztò à mà gbeyɛ, ò gbìndèyà na ò gbìndèyà. Inyɛ̀ wò lìya nanù.

Currently Selected:

Ròmànì 16: bri

Highlight

Copy

Compare