Lûm 15

Ghàyn e nə̂ ghɨ mɔ̀ʼɔ ghe saŋnə̂ ə̀ vachi sèngɨŋ saynse

1Ghâsènì ghɛ ə pomə̂ ə ghasènìze tɛ kyi sə̂ tsâmtə̀ ghɛ ə pomə̂ ə ghənə̂zè tɛ va. Kə ghâsènì ə nə̂ kə ghɛ ghɛ ə ghe tsɔ̂fə̀ kə sê ghâsènì. 2Ghâsènì kyi sə̂ nə̂ ə̀ghɛ endom vɛ ə ve nə̀ nə̂ nə ghɔnyì ə ghasènìghe nə pomə̂ ə ghənə̂zè ə tɛ. 3Nâʼà Klâys paʼà tîəm nəyn ghɛze sə̂ saŋnə̂ kə è ngɨŋ Vəyn. Pîza è nə̂ kə nyi mə ə nyàʼ ə Ŋwàʼlè ə Fèzhə̀ nə, “Nâʼà tèsoylè tèkɨ̂m tɛ ə ghɨ tè sòylə ghàyn ə pfɨ̀ ə mì ə tu.” 4Naʼapi èghɛ èkè zɛ ə tè nyaʼ ə Ŋwàʼlè Fèzhə̀ sə mɨ tè nyì se zaʼlə ghâsènì. Ze tè nyi kə ghâsènì ə kyi èkwaʼtè zɛ ə ze ndô pə̂ ewàmnè ə Fezhə̀zè, nə̂ nə ghâsènì ə kyi èkol ətəmze, fɨnə fo ghâsènì è temghe. 5Ə m tsə̂mə̀ nə Zhə̀ fɛ ə fe nə̂ nə ghâsènì ə kolə ə̀təm, fɨnə fo ghâsènì è təmghe, nə fe nəyn nə ghàyn ə nyi choze emɔ̀ʼ è ngɨŋ saynse kə ghàyn chùmtə̀ Njisə̀s Klâys. 6Zɨnə tə kyânə̀ kə ghàyn əkɨ̂m tsɨynte choze emɔ̀ʼ se tsìtə Fezhə̀, ə Pɨ̀a ə̀ Pɛ̂pɛ ə̀ ghâsènì Njisə̀s Klâys.

Ghàyn e fiə nâʼàpî ndè

7Ghàyn e fiə ə̀ ghɔnyì ghanə kèpî eghɨ kə Klâys fi ghàyn, wùə èmɔ̀ʼ èmɔ̀ʼ, kə pomsê zə nyi sê Zhə̀fè. 8M tsâ se ghàyn nə Klâys tè pəyn sə wûə èfɨ̀aʼa sê ghɨ Njûsə̀ se tyə̀yn sê ghənə nə tsɨ̂nè ə Fezhə̀zè pfɨ̀ə tsɛ̂ va. È tè nəyn nyi se lwiynse etsɨnè zɛ ə Zhə̀fè tè nə̀yn sê pɨ̀a ə pɨ̀a ə ghənə̂ghè. 9È tè pə̀yn se nə̀yn nə ghɨə ghɛ ə̀ va əghɨ ə Njûsghè ə pɔmsə̂ Fèzhə̀ ə Fəynfe ekosê esəynze. E nyi kə nyâʼ ə ŋwàʼlè ə̀ Fèzhə̀ nə,

“Nyiəmə m tə tsîtə̀ ghò ə fètə̂ ə̀ghɨ ghɛ ə vachi ə̀ghɨ ə Njûsghè.

M nə zhəmə sènjàŋ tsitə̀ èzə zɛze.”

10Ə nyàʼ kepî nə,

“Ghɨ ghɛ ə̀ vachi ə̀ghɨ ə Fezhə̀ghè, ghàyn e saŋnə̂ ghâyn ghə̀ ghɨ Fezhə̀ghè.”

11Ə fɨyn nyâʼ kepî nə,

“Ghàyn ghɨ ghɛ ə̀ va əghɨ ə Njûsghè nâʼà ə̀kɨ̂m tsite Zhə̀fè,

ə ghɨghe əkɨ̂m ə mbi tsite vəyn.”

12Fɨ̀aʼtè Èsayà ə tə pì kepî kə nyi mə ə nyàʼ nə,

“Wùə tə fɨə etɔ̀ŋ ə ndɛ ə Njesì

mə è tə pə̂ ə è və kyi àtyaʼ etûə ə̀ghɨ ghɛ ə̀ vachi ə̀ghɨ ə Njûsə̀,

ə nyì se vəyn ə ghɨ ghɛ ə vachi ə̀ghɨ ə Njûsghè tə ndə̂mə̀ təm ə ghənə̂ghè əkɨ̂m.”

13Ə Zhə̀fè mə za nyi eluʼ vɛ ə kwâʼtèzè ndò pə̂ ətəyn, lwiynse ghàyn è saŋnêzè ekɨ̂m, ə ghàyn ə nyi è pɔ̂ynè kûmə̀ èpomə̂ zaynze sê vəyn. Zɨnə mə tə nə̂ ə pomə̂ zaynze ə ndəmə̂ ndûə kə èshike atyaʼ ə Sezuʼ se Ŋwaʼake.

Ghɛ zɛ ə ze nə̂yn kə Pɔ̂l nyaʼ ŋwàʼlè zɨ̀yn

14Ghɔnyì ghɨmə, nâʼà mi è ngɨŋ zɨ̂mè ke ndô nə ghàyn kyi ndô təm ə chûŋghè se nə̀yn efɨaʼ zɛ ə Zhə̀fè kyiŋə nə ghàyn nəyn, ke ə̀ghɛ ə̀kɨ̂m, nyi kàʼa zaʼle ngɨŋ saynse. 15Pîza fa ŋwàʼlè, mə nyàʼ ghɛ ghɛ mə m ndəʼə̀ fânə̀ va. Ə̀ nyi kûmə̀ àfùʼ kɛ ə Zhə̀fè fo sê mi ə m nyâʼà ghɛ nə ghɨ̂yn. 16Zhə̀fè ə fo mi fùʼ nə kɛ mə nə mə nyi wùə èfɨ̀aʼa ə̀ Njisə̀s Klâys, nə mə ndaʼà tom èchùŋ sê ghɨ ghɛ ə̀ va əghɨ ə Njûsghè. M fɨaʼà kə wùə èkɔʼsə nə̂ èshyə̀ sə̂ ndaʼà tom èchùŋ zɛ ə è ndò sê Zhə̀fè, kə ghɨ ghɛ ə va əghɨ ə Njûsghè ə nyi kə efo zɛ ə Zhə̀fè nyi mə fe ə pomə. Zhə̀fè tə pomə ghənə kûmə̀ nə Zuʼse Ŋwaʼase ə nə̀yn ghənə e nyi è ŋwaʼze ə fəynfe əshi. 17Nyiəmə kə m nyi sə afɨa àmɔ̀ʼ ghasè Njisə̀s Klâys, M kyi ndô ghɛ zɛ ə ze nə̂ nə mə pfɨnə̀ àngàŋtè kûmə̀ èfɨaʼ zɨme sê Zhə̀fè. 18M vayn kaʼa m wamne ghɛ zhize ə̀ tsɛ̂ kə va se wàmnè kûmə̀ èfɨaʼ zɛ ə Klâys nə̀yn, m nyi kàʼa m nəyn nə ghɨ ghɛ ə̀ vachi ə̀ghɨ ə Njûsghè ə nə̂ kə Zhə̀fè kyiŋə. Ghɛ ghɛ m wâmnè, è ghɛ ə m nə̂yn nyi əghɛ ghɛ ə ghənə kyi se wàmnè, è kɨsè se nə̀yn. 19M tè nəyn əghɛ nə ghɛ mə, atyaʼ ə sechwîəke, è ghɛ əkayntəghe, è kɨsè atyaʼ ə sezuʼ sə Fezhə̀sè. Zɨnə mə ə tə nə̀yn me ndaʼà tom e chùŋ ə̀ Klâys àchûŋ, kə m tè ndò ə Njèlusalɛ̀m se ndùə tàyn apàs endaʼ ə Ìlilikùmkè. Mə ndàʼà tom èchùŋ èkɨ̂m kûmə̀ Klâys. 20Kɔ̂ŋ zɨme shîŋə̀ tekɨ̂m nyi nə m ndaʼa tom èchùŋ elùʼ vɛ ə nyi mə ə paʼà zɨ kûmə̀ Klâys. M tè nəyn nyiəmə kə m tàʼa ndù elùʼ vɛ ə wùə mɔ̀ʼɔ nyi mə è və kàynè zhə̂tè fɨ̂aʼzè. 21Zɨnə mə nyi kè kə nyi mə ə nyàʼ ə ŋwàʼlè ə̀ Fèzhə̀ nə,

“Ghɨ ghɛ ə tàʼa tyəmə tsàyn eghɛ sê ghənə kûmə̀ vəyn, tə fe vəyn,

ə ghɛ ə ghe tàʼa tyəmə zɨ eghɛ kûmə̀ vəyn, ə zɨ kê.”

Pɔ̂l ə pɨaʼtê se ndùə mòtè əghɨ ə Lûmghè

22Ə̀ nyi ekwî zɛ ə m kwîə tsɛsə̀ ə ze nə̂yn nə mə va se pə mòtə ghàyn. 23Pîza, zôyn kə m mɨ̂sè fɨ̂aʼ zɨme fâyn apàs endaʼa, wiyn nyiə nyûŋnə̀ mi se pə fe ghàyn, kə ve tè nyùŋnə epàm ə sèpìŋ se tsɨəse. 24M kwaʼtə̀ se nə̂ zɛ mə zôyn. M nə̀ nə̂ m mə kɔ̂ŋə̀ se fe ghàyn ezhoghɛ ə m ndûə endaʼ ə Sɨ̀pênzè, ə ghàyn tsamte mi kə m ndu fu. Pîza m tə môtə̀ ghâsènì sə fendîŋə̀ fə ashìŋə̀fè kə ghâsènì zɨne təm ə ghasènìghe. 25Zôyn nyi, m ndùə ə Njèlusalɛ̀m se tsàmtè əghɨ ə Fezhə̀ fu. 26Kûmə̀ nə ghɨ poməghe apàs endaʼ ə Màsèndonyà è kə Àkayàkè ə tə saynê sə ghənə ə ngɨŋ se fo emâʼte se tsàmtè ə ghɨ afɨfə ə ghɨə Fezhə̀ghè ə fètəyn ghɛ ghe nyi ə Njèlusalɛ̀m. 27Ghənə ə tə fe nə ze tsɔ̂fə̀ ndò se nə̀yn nyiəmə, nə ə nyi eluʼ ə ghənə̂vè se tsàmtə ghənə. Kə ghɨ ə Njûsə̀ tè chyàtə pɔsê tə ghənə̂tè yighə̀ ghɨə ghɛ ə tè vachi ə̀ghɨə Njûsghè, e tè nyîə tsɔ̂fə̀ nə ghɨ ghɛ ə tè vachi ə̀ghɨ ə Njûsghè tsamte kepî ə̀ghɨ ə Njûsghè, è fɨave kə, efɨazhiəve, è kɛve, è ndzɨse. 28Shîŋə̀ kɛ m mɨsè fɨ̂aʼ nə kɨ̂ynə̀ ə Njèlusalɛ̀m, ə fo èkɛ ə ghənə̂ vɛ ə tsɨte sê ghənə, m ndo fɨ se ndù endaʼ ə Sɨ̀pênzè. Ə̀ nyì fumə ashìŋə̀ ə m tə tyəmə se fe ghàyn. 29Shîŋə̀ kɛ ə m pə̂yn sê ghàyn, m ke ndô nə m tə pə̂ è kàyntè èpɔsê ə Klâyszè.

30M chyatə̂ ghàyn ə ghɔnyìə ghɨmə, ezə ə Pɛ̂pɛ Njisə̀s Klâyszè, e kɔ̂ŋ zɛ ə ze pə̂ ə sezuʼ, nə ghâsènì tsɨynte se tsə̀m sə ŋaŋ nə Zhə̀fè tsamte mi. 31Ghàyn e tsə̂mə̀ nə Zhə̀fè ə tɔ̂ʼnə̀ è mi kə ghɨ Njòndyâ ghɛ ə ghe ke va Zhə̀fè nə tàʼa fo ètsôs sê mi. Ghàyn tsəm kepî nə Zhə̀fè nəyn, ə ghɨ afɨfə ə fètə̂ ə̀ghɨ̀ ə Fezhə̀ghè ə Njèlusalɛ̀m fi tsâmtè zɛ m ndûə è zəyn sê ghənə. 32Kə nyi ekɔ̂ŋ ə Fezhə̀zè, m tə kɛsê pəyn se ghàyn è saŋnêzè, se mòtè ə ghàyn kə m kaʼa m zɨte kə ghâsènì nyi əmɔʼ. 33Ə Zhə̀fè ə pɔ̂ynèfè ə nyi ghâyn ghə̀ ghənə əkɨ̂m. Ə zə nyi ke zamə.

Currently Selected:

Lûm 15: bfm

Highlight

Compare

Copy