Zefaniya 1
1
Uwanda wawukali wa Mfumu e Leza
1Yaa amazwi yano Imfumu e Leza wanenile Zefaniya pampindi yino Josia umwanakwe Amoni walinji amfumu ya mweYuda. (Zefaniya awachikwatilwe chamfumu Hezekiya. Hezekiya akwata Amariya, nawe akwata Gedal iya, nawe akwata Kushi, nawe akwata Zefaniya.)
Uwanda wawukali wa Mfumu e Leza
2Imfumu e Leza ati, Nandi njonone ivintu vyonsi munsi, 3awantu wonsi nivinyamana, inyunyi ninswinye. Nandi ndovye awawembu. Nandi njonone awalawa, nanti kusya wumwi munsi. Anenenye ne Mfumu e Leza nalwane navwanga.
4Ndisyutungula awantu wamwe Yuda na wamwe Yerusalemu. Ndiyonona ukuloleka konsi ukwakwe Baali, ndovye nizinanye nukwizukwa kwakwe wasimapepo wane wakamupakata, ndovye nawasimapepo wane watamanya Leza, ndovye apaliponga nawasimapepo wanenye. 5Ndilovya awantu wonsi wane wakakwela pamusonje awapepa ilanzi, umwezi, nintanda. Swinya ndilovya nawano wakampepanye wane wakalapa kwenene nukusimichila, ukuwa mbali awalanga wakulapa izina lyakwe e Milikomu kaleza. 6Ndilovya wane wamfutatila waleka ukunkonka, wane wasikwiza kwenene ukuti wandambilizye ndawakolelela.
7Uwanda wa Mfumu e Leza wapalamila, uwanda wuno Leza alichita ichakuchita; kolopanani pakwe weliwe. Imfumu e Leza akuyisengania ukokoma awantu wakwe ngati anzuwi. 8Pawandanye wowo uwakukoma, avino Imfumu e Leza wataka wati, Ndisunda awantu wakulu, awana wamfumu, nsunde nawonsi wano wakachita imyata yamakandi. 9Ndisunda wonsi wane wakapepa ndivino amakandi yakapepa, wane wakakwiwa mbali nuwuchikoma, awizuzya akavuwa kakwe kaleza kawo nivisampwa.
10Pawandanye wowo, avino Imfumu e Leza wataka wati, muliyivwa ichongo chakupunda pampongolo yanswi mwe Yerusalemu. Muliyivwa awantu wakulila mumusolo wachitiwili uwamukaya, nichongo chakuvongonyola kukulu mumyamba. 11Sinsimuchilanji nukulila pakwivwa choo, mwe wantu mukakwikala mukaya mwisika, amuno awalonsi wonsi walifwa!
12Pampindinye yoyo ndisenda inyale ndavwamba mwe Yerusalemu. Ndisunda wachinzinkania wano wachita inzila zyawo, wane wakuyinenanga awati, Leza asichita chimwi, nanti chiwe wuli. 13Insawo yawo ilipokwa, ning’anda zyawo zimongolwe. Wataliyikala mung’anda zino wakuzenga, nanti akung’wa ipala lyamuvyalo vyamikomwa yawo yino wakalembeka.
14Uwanda wukulu uwa Mfumu e Leza wapalamila — wuli mupipinye wukwiza nanti kuzinguluka! Pawandanye wowo nawavita awakalambane nkani waliwalila wasowe nichakuchita! 15Wuliwa awanda wawukali, uwanda wamatamyo namalanda, uwanda wakulowa uwawononi, uwanda wamfinzi uwung’wamane, uwanda wiwingo uwachipunga, 16uwanda wuno wuliwa nichongo chankangang’ombe zyisumo nukulila kwawavita wane wakulwisya utwaya twamalinga nutupungu tutali.
17Imfumu e Leza ati, Ndileta umupamba wukulu pawalawa wize wapulumba ngati antonko. Wawembuka kwenene, achaleka kanonzi uwazi wawo wuliyitika ngati aminzi, nivyala vyamiwili yawo viliwolela pansi.
18Esilivara nugolide wawo vitaliwatula pawanda wuno Imfumu e Leza alilanjizya uwukali wakwe, Insi yonsi iliyononwa numulilo wawukali wakwe. Alilovya—ukulovya kwakupelelechezya—alovye awantu wonsi munsi.
Currently Selected:
Zefaniya 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
