Zakariya 8
8
Imfumu e Leza alayilizya ukunyosezya Yerusalemu ulongo
1Imfumu e Leza alayilizya Zakariya namazwi yaa, 2ati, Naluchila ukwavwa Yerusalemu amuno alukundo lwane ulukulu pawantu wamwe Yerusalemu, nulukundo Iwamwatanye woo Iwamvitisya nkaninye kuwalwani wakwe Yerusalemu. 3Nandi nyochele kwe Yerusalemu, akaya kane akatele, nkikalange momonye. Kize kamanyikwe kuno akaya kakusimichila, numwamba wa Mfumu e Leza wamaka yonsi wuliwakwitwa amwamba wutele. 4Swinyanye mwe Yerusalemu muliwawa wasongo awonsi nawanachi, wize wakote wapitila kumilinda, wakwikala mumisewo namumisolo yamwe Yerusalemu. 5Mumisolo monsi muliyizula awalumendo nawakazyana walange wakwizya mwenemo.
6Nche pamwi chonye-choo chingaloleka ngati achintachitwa kuwamwiko wano wasyala kanonzi, ukuwa kwenene chisi achitale. 7Ndipususya awantu wane mbafumye munsi zyakapela nizyakasika, 8mbanyosye wize wakwikala mwe Yerusalemu. Wize wawe awantu wane, nani imbe ne Leza wawo; njize nsunge ilayano line twalayine nawo.
9Simpani. Kanonzinye kaa mukwivwa amazwi ayaliyonganye yano awatumwa wavwanzile pano ulufula Iwimbwanga ukuti ing’anda yakumpepela ilimbuzwe. 10Pano impindinye yoyo iyakulimbuzya ing’anda yane yachilinji ukufika pasi wumwi wino walembelanga wumwi ukumuwombela umulimo nanti avinyamananye, swinya kutawanga wumwi wino wapitanga apusuka kuwalwani wakwe. Napetuzile imyezo yawantu awasambuchilana. 11Ukuwa kanonzi nkuchitila wane wapusuka awamwikonye woo munzila yinji. 12Waliwatanda imbeyu zyawo mumutende. Imiti yawo iliwakoma ivikomwa vyakusuta ipala, nawo umusili wuliwamezya ivizawalo, nimvula nayo ilivula. Ndipa ukupepwanye koo konsi kuwantu wamwiko wane wane wapusuka. 13Mwe wantu wamwe Yuda namwe wa Israeli! Kali, amakandi yatipanga awantu wanji awati, Sivyo namwenye amuponelwa nimipamba yakwe Yuda niyakwe Israeli! Ukuwa ndiwapususya, apano amakandi wawo waliwati, Sivyo amupepwa ndivino Yuda nu Israeli! Achaleka simpani mutatentemuka.
14Imfumu e Leza wamaka yonsi akuti, Pano wasokulu wamvitisizye, nelenginie ukuti mbaponezye imipamba nkana nukunyosya umwezo. 15Ukuwa kanonzi nkwelengania ukupepa awantu wamwe Yerusalemu nawamwe Yuda. Achaleka mutize muwatina. 16Vyoo avili vintu vino mwazipila ukuvichita: Vwanjilananji nukusimichila kuno kukaleta umutende. 17Mutize muwakwelengania inzila zyakulovyania. Mutize muwapa uwukalola wawufi amulapa nukulapa. Napata uwufi, nukukalala, nulombwa.
18Imfumu e Leza wamaka yonsi walayilizizye Zekariya amazwi yaa. 19Ati, Ukakana ukulya ichakulya umwenzo kuno kwalinji mumwezi wachitini, nuwachitisano, namuwachitimunenulambali, nga namuwachitikumi iliwa amyezi yachakulya chakuyitopwa nichimwemwe nukusechela kwawantu wamwe Yuda. Achaleka mwazipila ukukunda ulukundo numutende.
20Imfumu e Leza wamaka yonsi akuti, Impindi yalanga ikwiza pano awantu wamyiko mikulu nawamutwaya tukulu waliyiza mwe Yerusalemu. 21Awantu wamukaya kamwi waliwanena awantu wamukaya kanji awati, Twaya mukupepa Imfumu e Leza wamaka yonsi ukuti tukamulambilizye ukuti atupepe. Tuyani swensi mukupepa! 22Imyiko mikulu imikazawane waliwaya kwe Yerusalemu mukupepa Imfumu e Leza wamaka yonsi, wamulenga ukuti awapepe. 23Mumandanye yayo, amakandi ikumi waliwaya ku Muyuda wenga awati, Tukasi tupite swensi amuno twivwa kuno Leza ali nawe.
Currently Selected:
Zakariya 8: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
