Zakariya 13
13
1Imfumu e Leza wamaka yonsi wavwanga wati, Ndi impindinye yoyo yiza-yiza, ichifula chaminzi chiliyiyulwa kukuswefya ikwata lyakwe Davidi nawantu wamwe Yerusalemu kuluwembu lwawo nakukufukamila amakolania. 2Pampindinye yoyo ndifumya amazina yamakolania munsi, yatize yize yawakwizukwa numuntu wumwi nawanda. Nawatumwa wawufinye ndiwafumya, mfumye ukuluchila kwakupepa amakolania. 3Nga ndi wumwi wiza walanga alandalizile nuwutumwa, eyisinye nunyina awano walimunena ukuti ale afwe, amuno walondanga ukuvwanga izwi lya Mfumu e Leza, ukuwa awavwanga ivyamumutwe wakwe, Ndiwiza watumwa eyisinye nunyina awano walimulemela isumo wamufozole wamusumbe nakoko. 4Ndimpindinye yoyo yiza-yiza, pasi umutumwa nanti wenga wino alitumbila ivilota vyakwe, nanti akuzwala ngati amutumwa, nanti akukopelezya uwutumwa. 5Ukuwa aliwati, nsi nemutumwa. Nemulimi-nesichilima uwulanzi wane wonsi. 6Ndiwumwi wamuwuzya wati, Nga ivilonda vyovyo pachifuwa chako uchisile wuli? aliwatolelela ati, Nachisisile mung’anda yakwe wunji.
Isundo lyakukoma umuchemi wakwe Leza
7Imfumu e Leza wamaka yonsi akuti, Ziwuka, Iupanga, uvundumuchile umuchemi wino akambombela! Mukome, ning’onzi zisalangane. Ndivundumuchila awantu wane 8namunsi yonsinye ndikuli awantu watatu, wawili walifwa. 9Ngapano njize njelezye wawo wano wasyala wenga wenga awano mbaswefye, ndivino silivara akakwengululwa mumulilo. Ndiwelezya ndivino golide akakwelezwa. Waliwampepa, mbatolelela. Imbanene inti mwewantu wane, nawonye waliwazumilizya kuno ne Leza wawo.
Currently Selected:
Zakariya 13: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
