Zakariya 11
11
Ukulowa kwamfumu nkalale
1Siyiyula ivisakati vyako, we Lebanoni,
alyakuti umulilo woche imiti yako iyamilemwa!
2Sililanji muwasinsimuchila, mwemiti yamilemwa—
imiti yamilemwa yinji yapona;
imitinye yoyo imilumbililwe yakomwa!
Si aleni namwe mwe miwuyu yamwe Bashani, lilanji muwasinsimuchila—
imisitu mipumpile yakomwa-pyu!
3Izyamfumu zyawo zikupunda iyapamutwe kuwulanda;
uwukankala wawo wasowa napano walyata!
Teyelezyani ukuwuluma kwavimbwi;
umusitu wakwikala kwawo walowa.
Awachemi wawili
4Imfumu e Leza, e Leza wane amvwanzya ati, Uwe wemuchemi wawufyo wang’onzi zyane zino wakulonda ukuzikoma. 5Aweni ng’onzi wakazikoma nanti kusundwa. Wakakazya inyama awati, Ndi Imfumu e Leza achindikwe! Kanonzi twachindama! Nawening’onzinye wasi nuwulanda kung’onzi zyawo.
6Imfumu e Leza ati, Ntachiwanga ninkumbu swinya kuwantu wane wikala munsi. Nenenye nalwane nandi ndemeke awantu wonsi kwewakapanzya wawo nakumfumu zyawo. Wakapanzya wawo waliyonona insi, riga naninye ntalitula insi mbafyombotole mumakasa yawo.
7Wano wakazile ing’onzi awanyoka awazikazya wampile umulimo, imba nemuchemi wang’onzi zino zyayanga mukukomwa, Insenda insonzo ziwili. Insonzo yimwi injita inti Nkumbu, nimbuye inti Kulemenkana. Ndanga nkusayila uwufyo. 8Imvitilwa awachemi watatu, wane wampasile, mbawinga pamwezi wonganye. 9Ngapano nena uwufyo inti, Ntachiwanga nemuchemi winu swinya. Ing’onzi zino zikulonda ukufwa, kazifwange. Nazino zikulonda ukukomwa, kazikomwange. Nazino zyasyala zilikomana izyenecho. 10Ngapano nsenda insonzo yoyo e Nkumbu injivuna, kukusyusyuta ilayano lino nalayine nimyiko yonsi. 11Achaleka ilayano lyasyusyusilwe uwandanye wowo. Awantu wawo wane wakazile ing’onzi nukuzikazya awalanga wakundolechesya, awamanya awati Imfumu e Leza wavwanjilanga kwechino wachisile. 12Imbanena inti, Ndi chawasechelesya, ndipilani ichilambu chane. Ukuwa ndimusinakulonda, lekani. Ngapano awandipila indalama ntiswe amakumi yatatu izyachilambu chane,
13Imfumu e Leza amvwanzya ati, Kawike indalama zino wakulipila muchisengulilo chang’anda yakupepela. Achaleka nasenzile indalamanye zyozyo amakumi yatatu—zyozyonye imvule zino welenganianga wakuti nachindama —inja nziwika muchisengulilo chamung’anda yakupepela. 14Ngapano mvuna insonzo yachitiwili, yino natanji we kulemenkana, nga ukulemenkana ponga kwakwe Yuda nu Israeli akuputuka.
15Ngapano Imfumu e Leza amvwanzya ati, Swinyanye uyikolanie kumuchemi winji, umuchemi wino atanga azipile. 16Nalemaka ing’onzi zyane kumuchemi, ukuwa asikwavwilizya ing’onzi zino zikutina ukukomwa, nanti akuvwamba zino zyasowa, nanti akupozya zino zyachisika, nanti akuchema zino zyasyala. Ukuwa akulyanga inyama yang’onzi njine, aputula inkando zyawo. 17Umucheminye we yo uwavye-wavye walowa! Wasya uwufyo wakwe! Isumo liliyonona amaka yakwe, Ikasa lyakwe lilikwinyana, naminso yakwe yalitonkoka.
Currently Selected:
Zakariya 11: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
