Marko 16
16
Ukuzyulupuka
(Mateyu 28:1-8; Luka 24:1-12; Yohani 20:1-10)
1Awula uwanda wakusolezya wasila, e Mariya wa ku Magadala, nu Mariya enyina wakwe Jemusi, nu Salome awakala uwusule wununchile awaya mukupaka ichala chakwe Yesu. 2Mwepwi pawanda wa Mulungu pano ilanzi lyatunka, awaya kunkungwe. 3-4Pano wakupita awanenana wakuti, Ngaweni wandi akatutantazizye iwe ukulifumya pankungwe? (Lyalinji aliwe kulu nkaninye.) Awala walola awazana kuno iwe lyatantazizwe. 5Achaleka awinjila munkungwe, awalola umulumendo ayisile lwakwendilo, wazwite umwinjilo wutiswe—awachuluchila. 6Umulumendonye weyo ati, Mutazunguka. Manyile kuno mukuvwamba e Yesu wakwe Nazareti, wino wapamantizilwe pawuchingane. Asi-moo—azyulupuzilwe! Lolani, paa pano wamulambalisile. 7Kanonzi yanji mukanene awasambilizi wakwe apaliponga nu Peter amazwinye yaa muti, Wawatanjilila ukuya ku Galileya; kokonye akuno mwandi mukamulole, ndimuno wawanenezile.
8Achaleka awafuma munkungwe awasamala, amuno intete nukuzakaza vyawalemile. Nanti kunena wumwi, amuno watinanga.
INSILO YIMWI NKALI IYILANDWE ZIMA
Yesu aloleka kwe Mariya wa ku Magadala
(Mateyu 28:9-10; Yohani 20:11-18)
[ 9Ala pano Yesu wazyulupuka, mwepwi pa Mulungu, atalika aloleka kwe
Mariya wa ku Magadala, wino wamufumizye imizimu miwipe munenulambali. 10Aya anena awawuye. Walosyanga nukulila; 11Awala wivwa kuno Yesu amumi amuweni, nanti kuti wamusuwile.
Yesu aloleka kuwasambilizi wawili
(Luka 24:13-35)
12Pansizi pechoo, Yesu aloleka kuwasambilizi wawili mumwata wunji pano wapitanga mulonde. 13Awanyoka awaya awanena wanji, ukuwa nanti kuti wasusile.
Yesu aloleka kuwikumi nawenga
(Mateyu 28:16-20; Luka 24:36-49; Yohani 20:19-23; Imilimo 1:6-8)
14Pakupelelechezya, Yesu aloleka kuwasambilizi ikumi nawenga pane walyanga ichakulya, Awakalipila, muno watalinji nisuwilo muno walinji ni chilumba kukusuwila wane wamuweni. 15Awanena ati, Yanji munsi yonsi mukawizyange Ilandwe zima kuwalawa wonsi. 16Wino wasuwila swinya wabatizwa alitulwa: wino wakana ukusuwila alipanzwa. 17Wano wakusuwila walipwa ivimanyilonye vyoo ivyamaka; waliwafumizya imizimu miwipe mwizina lyane; waliwavwanga indimi-mpya; 18ndi wanyamula inzoka pamwi ndiwang'wa uwanga, watalichisika; waliwawika amakasa pawalwale, awapola.
Yesu asendwa mwiyulu
(Luka 24:50-53; Imilimo 1:9-11)
19Walile pane Yesu wamala ukuvwanga nawo, asendwa aya mwiyulu ayikala kwikasa lyandilo ilyakwe Leza. 20A wasambilizi awapita awaya awawizya monsinye, ni Mfumu e Leza awawomba nawo mbali nukupanichisya kuno ukuwizya kwawo kwalinji akwakusimichila muno wawapile ivimanyilo vyamaka.]
INSILO YINJI INKALI
[ 9 Awanachi awaya kwe Peter nawawuye awaya awawalandila Ilandwe lyonsi lino wanenilwe. 10 Pansizi, e Yesu-nye nalwakwe atumilizya, awasambilizi wakwe, awaya kapela nakasika, namazwi mimichile ayikomolwa lyamuyayaya.]
Currently Selected:
Marko 16: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
