Marko 10
10
Yesu asambilizya ivyakutayana kwawung'anda
(Mateyu 19:1-12; Luka 16:18)
1Yesu afuntuka mumasyonye yayo, aya munsi yakwe Yudeya, alamba nuluzi Yordani. Swinyanye amawumba ayati nukuya kweweliwe aya awawasambilizya ndivino wachitanga.
2Awa Falisi wamwi awaya kweweliwe ukuti wamuteye. Awamuwuzya awati, Tunene, wuzye mwisundo litu umuntu angawinga umuchi?
3Yesu awatolelela niwuzyo ati, Nga Musa wawapile sundo-chi?
4Awatolelela awati, Musa wazumilizizye awonsi ukuwalika kalata wakutayana ngapano awinga umuchi.
5Yesu awanena ati, Musa wawawalichizile isundonye lyoo amuno chawatalila nkaninye ukusambilila. 6Ukuwa pakutalika-talika, ukwakutumbulwa, chavwangwa chati, Leza welewuzile umonsi numwanachi. 7Achaleka muno achochonye umonsi akasya yisi nun yin a ayikala apaliponga numuchi, 8wonsi wowili awa amuntu wenga. Achaleka wasi wawili swinya, nkandi wenga. 9Achaleka kusikwezyanye, umuntu ukupawunkania, chino Leza wasanzya apaliponga.
10Awala waya mung'anda, awasambilizi awawuzichisya Yesu kwakwe vyovyonye. 11Awanena ati, Umonsi wino wiza wawinga umuchi waya watwala winji alitela akuzeleluka akufyenga umuchi; 12awuliwonganye ndi umwanachi wasya umulume waya watwalwa kumonsi winji atela akuzeleluka.
Yesu apepa utwana
(Mateyu 19:13-15; Luka 18:15-17)
13A wantu wamwi awatwala utwana kwe Yesu ukuti akatukumvye, ukuwa awasambilizi awakalipila awantunye wawo. 14Ala Yesu walola avitwa nkaninye anena awasambilizi wakwe ati, Lekani utwana twize kwenene, mutatulesya, amuno Uwufumu wakwe Leza wuli wakwe tonye-too. 15Yizukanji choo! Wensinye wino wakana ukupochelela Uwufumu wakwe Leza ndivino umwanamutichi atalitela akinjile mwenemo. 16Ngapano Yesu afukatila awana mumakasa yakwe, awika namakasa yakwe pewoliwo, awapepa.
Umuchindame
(Mateyu 19:16-30; Luka 18:18-30)
17Ala vino Yesu wakatuka swinya walema umusinzo, umuntu amusamalila, afika afukama peweliwe, amulambilizya ati, Musambilizya muzima, wuzye nchite chani ngampochelele uwumi wamuyayaya?
18Yesu amuwuzya ati, Ngamuno chani chino ukunjita ukuti muzima? Pasi umuzima nanti wenga nkandi e Leza wenganye-nsu. 19Wamanya amasundo yakuti, Utakoma, utazeleluka; utakwiwa; utawipa uwufi; utachenjezya; uwachindika eso nunyoko.
20Umuntu ati, Musambilizya, ukufumilila kuwutichi wane wonsi nkatontela amasundonye yaa yonsi.
21Yesu amulolechesya nulukundo ati, Wasowelwa ichintu chonga. Yanga kakazye vyonsi vino uli navyo upe awasaluke indalama, nawe uliwa ninsawo mwiyulu; ngapano uyize unkonke. 22Umuntu ala wivwa wowonye, afwilimana nkaninye apita namalanda, amuno walinji amuchindame nkaninye,
23Yesu alolechesya awasambilizi wakwe ati, Ye, chilitalila awachindame wuli ukwinjila mu Wufumu wakwe Leza!
24Awasambilizi wakwe awatina pakwivwa wonye-woo, ukuwa weni Yesu alandalila ukuvwanga ati, Ye, Mwewanane, chatala wuli ukwinjila mu Wufumu wakwe Leza! 25Chatalila awachindame ukwinjila mu Wufumu wakwe Leza ukulusye ingamila ukupulunkana mwilinso lyansindano,
26Awasambilizi wakwe awazunguka nkaninye pakwivwa wonye-woo, awawuzyania wakuti, Ye, ngafwandi weni angatulwa?
27Yesu awalolechesya atolelela ati, Choo achitale kumuntu, ukuwa kwe Leza; vyonsi vingachitwa kweweliwe.
28Ngapano Peter asimpuka avwanga ati, Lola twasya vyonsi twakukonka.
29Yesu awatolelela ati, Molimonye, nkuwanena nkuti: wensi wino wasya ing'anda nant'awanyina nant'ankazi zyakwe nanti wenyina nanti weyisi nanti awanakwe nant'avyalo vyakwe muno anene, namuno alilandwe zima, 30alipochelela alutilizye munkulonye yoo, Aliwa ning'anda mvule ukulusye umwanda, nawanyina wavule, inkazi, wanyina, awanakwe, nivyalo vivule—mbali namayimbo; nga munkulo yino ikwiza ayize apochelele uwumi wamuyayaya. 31Ukuwa awavule wano awakutalika kanonzi waliwa awakupelele chezya, nawavule wano kanonzi awakupelelechezya waliwa awakutalika.
Yesu avwanga ivyamfwa yakwe impindi yachititatu
(Mateyu 20:17-19; Luka 18:31-34)
32Walinji pamusinzo wakuya kwe Yerusalemu. Yesu wakolezile pawasambilizi, wano wachintuchizile; awantu wano wakonsile pansizi awatina. Yesu anyoka asenda awikumi nawawili palwawo awanena vino vyandi vimuponele. Ati, 33Yivwani, tukuya kwe Yerusalemu kuno Umwanamuntu wandi akalemekwe kwewasimapepo wakulu nawasambilizya wamasundo. Waliya wakamupanzizye kukukomwa ngawamulemeke kumakandi. 34Waliya wakamwalanganiange, wamuswilile amati, wamuvyapule, wamukome nukumukoma. Ukuwa ndikwapita amanda yatatu azyulupuke.
Iwuzyo lyakwe Jemusi nu Yohani
(Mateyu 20:20-28)
35Ngapano Jemusi nu Yohani, awanakwe Zebediya, awaya kwe Yesu. Awamunena awati, Musambilizya, tukasi ukuti utuchitile chimwi.
36Yesu awawuzya ati, Nga mukasi mbachitile chani?
37Awamutolelela awati, Ndiwiza wikala pandulu yako iyakuchindamikwa kwa Wufumu wako, tukulonda ukuti uyize uleke twikale nawe, wumwi kwendilo nawumwi kwekamani.
38Yesu awanena ati, Mutamanyile chino mukulenga. Wuzye mungang'wela ulupindi luno nkung'wela? Wuzye mungabatizwa ndivino nene?
39Awati, Eta chingawa wowonye. Yesu awanena ati, Nachawuzimanye muling'wela ulupindi luno nkung'wela nukubatizwa ndivino nene. 40Ukuwa nsinamaka yakusola wino angikala kwikasa lyane ilyandilo nanti akwekamani. We Leza awino alipa amasyonye yaa kwewano chayanizwa.
41Awala awasambilizi wanji ikumi wivwa wowonye awavitilwa Jemusi nu Yohani nkaninye. 42Achaleka Yesu awita wonsi apaliponga ati, Mwamanya kuno wano wasolwa kuwukapanzya wali namaka yakupanzizya awantu, wakapanzwa nawanankolelo wawo.
43Ukuwa mwenji, chisi awonye-woo, Ndiwumwi akulonda ukuwa amukulu, wazipila awa amuwomvi wawawuye wonsi. 44Ndi wumwi akulonda ukuwa awakutalika wazipila ukuwa amuzya wawawuye wonsi. 45Amuno nu Mwanamuntunye atizile kukuwombelwa; ukuwa wizizile kukuwomba nukupa uwumi wakwe kukupususya awavule.
Yesu apozya Bartimeyo intonko
(Mateyu 20:29-34; Luka 18:35-43)
46Awaya kwe Jeriko. Ala pano Yesu nawasambilizi wakwe niwumba kulu wakufuma, e Bartimeyo intonko, umwanakwe Timeyo, wisile mumbali yanzila walenganga. 47Walile wivwa wakuti we Yesu wamwe Nazareti, atalika ukupunda akuti, We Yesu! Mwanakwe Davidi! Mfwila inkumbu!
48Awavule awamukalipila wakuti myalala. Ukuwa alutilizya ukupunda nizwi kulu akuti, Wemwanakwe Davidi, mfwila inkumbu!
49Yesu ayimilila ati, Mwitani. Achaleka awita intonko. Awati, Sankana! Katuka, akukwita.
50Asya wasumba umwinjilo wakwe, avundumuka, aya kwe Yesu.
51Yesu amuwuzya iti, Nga ukulonda nkuchitile chani?
Intonko itolelela ati, Musambilizya, nkulonda ukuti mpochelele icheni chane. 52Yesu amunena ati, Pitanga, isuwilo lyako lyakupozya.
Napaponapapo atalika ukulola, akonka Yesu munzila.
Currently Selected:
Marko 10: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
