Mateyu 9

Yesu apozya umuntu wino walwile indwala yachintendya

(Marko 2:1-12; Luka 5:17-26)

1Yesu ayinjila muwato, alamba sumbi, aya kukaya kakumwawo. 2Awantu wamwi awamutwalila uwachintendya, wino walazile pachitanda. Yesu alola isuwilo lyawo, anena echintendya ati, Simpa, mwanane! Amawembuko yako yatetelwa.

3Ngapano awasambilizya wamasundo wamwi awavwanzyania wakuti, umuntunye wee akukwelengula Leza!

4Yesu ala wamanya chino awantunye wawo welenganianga ati, Ngamuno chani chino mukwelengania iviwipisye vyoo? 5Wuzye mukuti achintu chipepuke ukuti, Amawembuko yako yatetelwa, nanti akuti, Katuka uwapita? 6Nandi mbalanjizye, kuno Umwanamuntu ali namaka munsi ayakutetela amawembuko. Achaleka wanenile echintendya ati, Katuka, nyamula ichitala chako, uye kumwinu!

7Umuntu akatuka aya kumwawo. 8Awala awantu walola chonye-choo awatina, awatumvya Leza wino wapa awantu amaka yamwata wonye-woo.

Yesu ayita Mateyu

(Marko 2:13-17; Luka 5:27-32)

9Ala Yesu akupita, yewafuma paponye alola kasonchezya wamusonko, e Mateyu, ayisile mung'anda yamusonko. Amunena ati, Nkonka.

Mateyu akatuka amukonka.

10Nga ala pano akulya ichakulya mung'anda yakwe Mateyu, wakasonchezya wamusonko awavulenye nawawembu awaya awayisanzya kwakwe Yesu, nakuwasambilizi wakwe kukulya ichakulya. 11Awala awa Falisi wamwi walola wowonye awanena awasambilizi wakwe awati, Ngamuno chani chino umusambilizya winu akulya nawakasonchesya wamusonko nawawembu?

12Yesu ayivwa wakuvwanga awatolelela ati, Awapuma wasifwa nukulonda ing'anga, nkandi awalwale. 13Yanji mukavwambisye chino amazwi matele yakusula ayakuti, Nsilonda inzuwi zyanyama, nkalonda inkumbu.

Iwuzyo kuvyakukana ukulya umwenzo

(Marko 2:18-22; Luka 5:33-39)

14Ngapano awasambilizi wakwe Yohani Kabatizya awaya kwe Yesu, awamuwuzya awati, Ngamuno chani chino swenji nawa Falisi tukukana ukulya umwenzo iumapindi-ni-mpindi, ukuwa awasambilizi wako weni nawanda?

15Yesu awatolelela ati, Wuzye wano wayile kuwinga wangafwilimana pano wachili wali nusiwinga? Nanti katichitichi! Ukuwa impindi iliyiza pano siwinga alisendwa kwakwe woliwo, apano waliyikala ninzala.

16Pasi wumwi wino akapatika iumapatikwa yamwenda wupya kuchizwalo chikali, impatikwa yamwenda wupya inganyonkola umwenda wukali, nga itolo likule lilutilizye. 17Swinya pasi wino akuwikanga ipala-pya mumyuwa mikali. Ndiwachita wowonye ipala lingalepula imyuwa nipala litike, nimyuwa iyononeke. Ukuwa, ipala-pya likawikwa mumyuwa mipya, ngapano vyonsi vyowili avilanga vili ichete.

Umwanamukazyana wankombe numwanachi wino wakumvizye kumwinjilo wakwe Yesu

(Marko 5:21-43; Luka 8:40-56)

18Ala pano Yesu achili akuwanena vyovyonye, esongo wawa Yuda aya kweweliwe afika asokowala pankolelo, ati, Umwanane uwachanachi wafwa kanonzinye; ukuwa tuyange ukawike ikasa lyako peweliwe azyulupuke. 19Yesu akatuka amukonka, nawasambilizi wakwenye awapita nawe.

20Umwanachi wumwi wino wapitilizile kumyaka ikumi nayiwili, asochelela kunsizi kwe Yesu afika akumvya umuko wamwinjilo wakwe. 21Ayelengania ati, Ndinakumvya umwinjilo wakwe wutupunye nandi mpole.

22Yesu atalangania amulola ati, Simpa, mwanane! Isuwilo lyako lyakupozya. Nga umwanachi apola imp indinye yoyo.

23Achaleka Yesu aya mung'anda yakwe musika. Ala walola wakimbila wapamfwa, achisanka awantu wonsi, 24ati, Fumani, mwensinye-pyu! Umukazyana atafwile—aponechile awowo! Wonsinye awaseka Yesu. 25Awala vino awantu wafuma, Yesu ayinjila muno mwalinji umukazyana afika amulema ikasa, akatuka. 26Amazwi ayasata ayakwila insi yonsi.

Yesu apozya intonko ziwili

27Ala vino Yesu akupita ye wafuma mumasyonye yayo intonko ziwili azimukonka azipunda aziti, We Mwanakwe Davidi, Tufwile inkumbu!

28Ala Yesu winjila umaung'anda, intonko ziwili aziya mwenemo afika aziwuzya ati, Wuzye mukusuwila kuno ngachita choo?

Azitolelela aziti, Mulali tukusuwila.

29Ngapano Yesu akumvya aminso yawo ati, Ndichichitwe ndimuno mukusuwilila!— 30awapochelela ivyeni vyawoo Yesu awakalipila nkaninye ati, Mutize mukanene umuntu nanti wenga!

31Ukuwa awapita awaya wakusasya ivyakwe Yesu munsi yonsi.

Yesu apozya wiwi

32Awala pano awantu wakufuma, awantu wamwi awatwala kwe Yesu umuntu wino atavwanganga muno walinji numuzimu wuwipe. 33Napaponapapo pano umuzimu wuwipe wawingwa, umuntu atalika awavwanga. Wonsi awazunguka awati, Tusitela tulole ichamwata ndi-woo mwe Israeli! 34Ukuwa awa Falisi awati, Amfumu yamizimu miwipe ayino ikumupanga amaka yakuwinjila imizimu.

Ichilanda achilema Yesu

35Ngapano Yesu awapitapita mutwaya tonsi namuzyampunda. Awasambilizya mung'anda zyakupepela, awawizya Ilandwe Zima ilya Wufumu, mbali nukupozya awantu kundwala namatenda yamisango-misango. 36Ukuwa ala walola amawumba ichilanda achimulema, amuno watamikanga nukuluwaluwa, ngati ang'onzi zino zisi numuchemi. 37Achaleka anena awasambilizi wakwe ati, ivizawalo vyavulisya, ukuwa awawomvi wachepa 38Achaleka lambilizyanji umweni vizawalo atume wakasinza kukusezya ivizawalo vyakwe.

Currently Selected:

Mateyu 9: WWN82

Highlight

Copy