Mateyu 23
23
Lewukanji awasambilizya wamasundo nawa Falisi
(Marko 12:38-39; Luka 11:43, 46; 20:45-46)
1Ngapano Yesu avwanga kumawumba nakuwasambilizi wakwe ati, 2Awasambilizya wamasundo nawa, Falisi, awano wangalondolola amasundo yakwe Musa. 3Achaleka tontelanji vyonsi vino wakuwanena muwavisunga nukuvisunga; ukuwa mutize muwachita ndivino wakachita, amuno weni wasichita vino wakawizya. 4Wakalonga iviya ving'wame awatwika awantu paviweya, ukuwa weni nanti kwelezya ukulemelela nant'amunwe ukuwatwika ukunyamula iviya vyovyonye. 5Wakachita ivintunye vyoo vyonsi ukuti walolwe nawantu. Silolani uwukulu wakwe vino amazwi matele yawalikwa penepo vino wanyepelela pampumi zyawo napamakasa yawo, swinya mulolechesye vino imiko yavizwalo vyawo yapapatala! 6Wakunda amasyo mazima apakwikala pavyakulya vyakuyitopwa swinya wakalonda ivilimba vyakunkolelo mung'anda zyakupepela; 7wakunda ukulamukwa numuchinzi mumasyo yakukazizya awalonda ukuti awantu wawita wakuti, Musambilizya. 8Mutize muwalonda ukwitwa ilyakuti, Musambilizya, amuno mwensinye mwewanyina nawanyina ukuwa muli numusambilizya wengansu. 9Swinya kusikwezya ukwita umuntu wumwi munsi moo amuwati, Tata, amuno muli nuso wenganye-nsu uwamwiyulu. 10Mutize muwakwitwa ukuti, Nankolelo, amuno we Mesaya-nye wenga-nsu awili nankolelo. 11Wino wesongo nkani pakwe mwemwe awino wazipila ukuwa amuwomvi winu. 12Wensi wino akuyikuzya alichefwa, nawensi wino akuyichefya alikuzwa.
Yesu avitilwa uwukachenjezya wawo
(Marko 12:40; Luka 11:39-42, 44, 52; 20:47)
13Oko, chawawipila wuli, mwewasambilizya wamasundo-mwe namwenye mwe wa Falisi! Mwewakachenjezyamwe! Mukwiyalilanga awantu ivisakati vyakuyila mu Wufumu wamwiyulu, ukuwa namwenye mutaliyinjila mwenemo, nanti awantunye wano wakulondesya ukwinjila mwenemo mukawalesya!
[ 14Oko, chawawipila wuli, mwewakasambilizya wamasundo-mwe namwenye mwe wa Falisi! Mwewakachenjezya-mwe! Mukatondowezya awanachi wafwilwe awalume amupoka ing'anda zyawo, nga amuwayilanjizya namapepo yinu amatali! Muno achonye-choo ukusundwa kwinu kuliwipa nkaninye!]
15Oko, chawawipila wuli, mwewasambilizya wamasundo-mwe! Amuno mukapita-pita mwesumbi amulanga mukuvungula insi yonsi ukuti mufunkule wumwi awakonke; ngandi wawakonka, yemwamuletelela mwalutilizya kukuya kwilungu lyamulilo kuno namwenye muliya!
16Oko, chawawipila wuli, mwentonko zino zikakolelela-mwe! Mukasambilizya mukuti, Ndi umuntu walapa ing'anda yakwe Leza kusi nachimwi; ukuwa ndiwalapa golide wino ali mung'anda yakwe Leza, peni atela walapa molimonye. 17Mweviwelewele ntonko-mwe! Ngachino chakula chalusya achani, egolide pamwi ing'anda yakwe Leza yino ikaleka nu golidenye awa amutele? 18Swinya mukasambilizya amuti, Ndi umuntu walapa akavuwa, kusi nachimwi, ukuwa nkandi ndiwalapa ichawila chino chili pakavuwa, apano atela walapa molimonye. 19Ye, mwaziwata wuli! Ngachino chakula chalusya achani, ichifimwa pamwi akavuwa kano kakaleka ichifimwa achiwa achitele? 20Achaleka fwandi, ndi umuntu akulapa akavuwa atela akulapa akavuwanye nivifimwa vino vili penepo; 21nanti ndi umuntu akulapa ing'anda yakwe Leza atela akulapa ang'andanye apaliponga nu Leza, wino akwikalanga mwenemo; 22nanti ndi umuntu akulapa iyulu, atela akulapa indulu yakwe Leza nawino akakwikala penepo.
23Oko, chawawipila wuli, mwewakasambilizya wamasundo-mwe namwenye mwe wa Falisi! Mwewakachenjezya-mwe! Mukafimila Leza akikumi katwakusanzya muntwilo, ndivino inkwila, nufulwa nga nulutindi, ukuwa mukalechelezya ukutontela imisambilizizye yenecho iyamasundo, ndivino umutende ninkumbu nukusuwilwa. Vyonye-vyoo avino mwazipila ukuvikonka, nanti kulechelezya vinji vyovyo. 24Mwentonko zino zikakolelela-mwe! Mukasusa ipala amufumya ulusazi mwenemo, ukuwa amumilula ingamila!
25Oko, chawawipila wuli, mwewasambilizya wamasundo-mwe namwenye mwe wa Falisi! Mwewakachenjezyamwe! Mukapwizya impindi zinu nindweso kulonde, ukuwa mukasi amulanga mwizula nivintu vino mwasendela kuwulamba nichilumba. 26Mwe wa Falisi ntonko-mwe! Pakutalika pwizyanji impindi zinu mukasi, apano zingaswepa kulonde!
27Oko, chawawipila wuli, mwewasambilizya wamasundo-mwe namwenye mwe wa Falisi! Mwewakachenjezyamwe! Mwakolana ninkungwe ntakase nuchipawu kunzi, yino ikaloleka ichete kunzi, ukuwa mukasi amulanga muli amafupa yawafwe niviwole vyonsi avilanga vili mwenemo. 28Avino namwenye kunzi mukaloleka kwewanji ngati mwewazima, ukuwa mwakwe mwemwe mwizula uwukachenjezya nuluwembu.
Yesu awawumbulila ukusundwa kwawo
(Luka 11:47-51)
29Oko, chawawipila wuli, mwewasambilizya wamasundo-mwe namwenye mwe wa Falisi! Mwewakachenjezyamwe! Mukakwimbila awatumwa inkungwe nzima, amwimika nivyakwimika viyembe ivyakwe wano walinji awantu-wantu, 30amuti, Nd'achino tutele twalinji-po pampindi yakwe watatakulu, tutanga tuchite ndivino weni wachisile awakoma awatumwa. 31Achaleka mukuyisinila kuno mwewana wakwe wano wakomile awatumwa! 32Swili, muwal'ukuya, musuke mumalizye chino wasokulu watalisile! 33Mwenzoka-mwe, twana twanzokamwe! Nga mungapusuka wuli ipanzyo lyilungu lyamulilo? 34Achaleka nkuwanena nkuti: ndiwatumila awatumwa nawantu wamano nawasambilizya; mulikoma wamwi, wamwi muwapamantile pawuchingane, nawamwi muwavwapule mung'anda zinu izyakupepela muwawatilimbika mutwaya nutwaya. 35Achaleka ukusundwa kwawuchikoma wawantu wonsi wano watalinji nuluwi kuliwa pakwe mwemwe, ukufumilila kukukomwa kwakwe Ebelo wino atalinji nuluwi ukwizafika kukukomwa kwakwe Zakariya, umwanakwe Berekiya, wino mwamukomezile mung'anda yakwe Leza pakasi pamasyo mimichile nakavuwa. 36Nachawuzimanye nkuwanena nkuti, Ukusundwa kwakwe vyonsinye-vyoo kuliwa pawantu wankulonye yoo!
Ulukundo luno Yesu wakunzile Yerusalemu
(Luka 13:34-35)
37Oko we Yerusalemu, Yerusalemu! Wemuntu ukakoma awatumwa uponkola nintumi zino Leza watuma kwewewe namawe! Nga ampindi zinga zino nalondanga ukufukatila awantu wako wonsi, mbafukatile ndivino nyinankoko akafukatila utwana muvyapa, ukuwa utanzumilizizye! 38Kanonzi ing'anda yako ilikankamulilwa koko. 39Ukufumilila kanonzi ukuya kunkolela utalitela undole swinya, avino nataka, usuke uyize uti, Ndiwino akwizila mwizina lya Mfumu e Leza awe amupepwe.
Currently Selected:
Mateyu 23: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
