Malakayi 1
1
Ulukundo lwa Mfumu e Leza kwe Israeli
1Yaa amazwi ya Mfumu e Leza yano wanenile Malakayi ati, Kanene awa Israeli uti, 2Imfumu e Leza wawakunda.
Ukuwa mwenji mukukananga amuti, Nga watukunda wuli?
Imfumu e Leza akatolelela ati, Esau nu Jekapu walinji awakwe nyina wenga, ukuwa nakunda Jekapu ni kwata lyakwenye, 3swinya napata Esau ni kwata lyakwenye. Nonona insi ya myamba iyakwe Esau naleka yaw a ansi yakwikala ivinyamana vyalonde.
4Ukuwa ikwata lyakwe Esau, awa Edomi ndi wati, Utwaya twitu tononwa, lela twandi tutuzenge swinya, ukuwa Imfumu e Leza alitolelela ati, Lekani watuzenge swinya, ndinyoka ntumongolanie. Awantu waliti, Ansi yaluwembu iya-mwiko wuno Imfumu Leza walala wapata.
5Muliya mukayilolele choo na minso yinu, mwize muti, Imfumu e Leza awa maka yonsi na kunsi yino isi a yakwe Israeli-nye!
Imfumu e Leza akukalipila wasikapemba
6Imfumu e Leza wa Maka yonsi akunena wasikapemba akuti, Umwana akuchindikanga yisi, nu muwomvi akuchindikanga yisikulu. Ngamwenji amuno chani chino musinchindichila vino neso? Musinchindichila chani vino nesokulu? Mwankwelengula, amulanga mbali mukuti, Nga twakukwelengula wuli? napano mwankwelengula-nye, amunyoka amumbuzya amuti, Nga twakukwelengula wuli? 7Mwankwelengula muno mukuletanga ivifimwa vyavye pa kavuwa kane amunyoka amumbuzya amuti, Nga twakukwelengula wuli? Nandi mbanene inti mwankwelengula pano mwakwelengula akavuwa kane. 8Wuzye mukutanji achizima, ukumfimila inzuwi zya nyama zino zyafwa minso? Pamwi pano mukundetelanga inyama yino yalemala pamwi yino yalwala, wuzye mukutanji achizima? Mutele mwize mwelezye ukupa imfumu zinu ivyamwatanye ndi vyoo. Wuzye zingasechela, ziwachitile ivizima?
9Mwe wasikapemba aleni kanonzi lambilizyani Imfumu e Leza awe amuzima kwesweswe. Atalitolelela amalambilizyo yinu, wowo amulandu winu. 10Imfumu e Leza wa Maka yonsi akuti, Chingazipa ndi wumwi angiyala ivisakati vya mu ng’anda yakwe Leza ukuwalesya ukupemba umulilo wavye pa kavuwa kane. Insi nichimwemwe namwe ntanga mpochelele ivifimwa vino mukundetela. 11Awantu wa munsi zyonsi wakanchindika. Konsinye wakunjochelanga ivyifungo zima nu kumfimila inzuwi nzima. Wonsinye wakanchindika! 12Ukuwa musinchindika pano mukutanji akavuwa kane akavye, amukwelengula ni chakulyanye chino mukafima kweneko. 13Mukutanji, Twatonta, twapotwa na choo! Amupunamika ni mpuno zinu kwenene. Amuleta kwenene inyama zino mwiwa ukuti azino mumfimile nene, pamwi amuleta indemale pamwi indwale, wuzye mukutanji vyovyonye ingavipochelela? 14Amutipwe ekachenjezya wino akumfimilanga inyama zyavye indemale pamwi indwale, pano ali ni nyama nzima impuma mu wufyo wakwe zino walayilizya ukumpa. Amuno ne Mfumu nkulu indusye, na wantu wa myiko yonsi wakantina nenenye, avino Imfumu e Leza wa maka yonsi wataka.
Currently Selected:
Malakayi 1: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
