Imilimo 13

Awasola Bamaba nu Sauli awawatuma mukuwomba

1Mwi Klezia lino lyalinji mwe Antioki mwalinji awatumwa nawasambilizya: e Bamaba nu Simeoni (wino watanji Mutifi), nu Lukiasi (wino wafumile ku Kureni) nu Manaeni (wino wakulizile apaliponga nu Herodi imfumu), nga nu Suli. 2Wapakatanga Imfumu e Leza wakusolezya nukulya, e Muzimu Mwimichile ati, Mpawulilani e Bamaba nu Sauli, kumulimo wuno nawasolela.

3Awikala ninzala umwenzo awapepa, awawika amakasa yawo pakwe woliwo, awawatuma nukuwatuma.

Mu Sayiprasi

4Nga ala Bamaba nu Sauli watumwa nu Muzimu Mwimichile, awaya ku Selusia swinya ukufuma kokonye awapita muwato awaya kuchilila cha Sayiprasi. 5Awala wafika pa Salamisi, awawizya izwi lyakwe Leza mung'anda zyakupepela izya wa Yuda. Wapisile nu Yohani Marko wino wawavwanga mumulimo wawo.

6Awala wamala ichilila chonsi awafika kwe Pafo, kokonye awazana ekalawula wumwi e Bara-Yesu, umu Yuda wino wayichisile uwutumwa. 7Umuntunye wee walinji achiwuza chakwe Sergio Pauli, wino walinji amulasi wachilila, walinji amuntu muchenjele uwamano. Umulasi ayita Bamaba nu Sauli awaya kweweliwe muno walondanga ukwivwa izwi lyakwe Leza. 8Ukuwa ekalawula weyo (izina lyakwe mu chi-Griki walinji we Elima); awakania muno walondanga ukuvulungania isuwilo lyamulasi. 9Ngapano e Sauli—wino walinji we Pauli—ayizuzwa nu Muzimu Mwimichile; apanga aminso pakwe kalawula 10ati, We mwana wakwe Chiwa! Wemulwani wavintu vizima vyonsi; wavula ikopeka nuwuwipe wonsi, swinya penye ukakwelezya ukuvulungania ukusimichila kwa Mfumu ukuchita uwufi! 11Kanonzi ikasa lya Mfumu lyandi liwe pakwe wewe; wandi uwe wentonko, nanti kulola ilanzi isuke impindi ikule.

Napaponapapo paminso yakwe Elima apakoma susuwe mutifi, awalungana mwalwe ukuti wumwi amuleme ikasa amutungulule. 12Umulasi asuwila pano walola chino chachisilwe; azunguka nkaninye pakwivwa ivya Mfumu e Yesu.

Mu Antioki wakwe Pisidia

13Ngapano Pauli nawawuye awafuma mwe Pafo awapita muwato awaya kwe Perga, mwe Pamfulia; ukuwa Yohani Marko awasya kokonye anyochela ku Yerusalemu. 14A wafuma kwe Perga awaya kwe Antioki wakwe Pisidia; nga pawanda wakusolezya awaya mung'anda yakupepela awikala pansi. 15Awala wasongo wamung'anda yakupepela wawazya amasundo yakwe Musa namawaliko yawatumwa, awasumbila Pauli nawawuye amazwi awati, Wanawitu, ndi muli namazwi yamwi ayakusimpisya awantu tukasi muwanene. 16Pauli ayimilila, ayingania ikasa lyakwe, atalika ukuvwanga: ati,

Mwe wa Israeli wanji namwe makandi mwensi, mwewantu mukapepa Leza: nteyelezyani! 17E Leza wawa Israeli-nye waa wasozile watatakulu, aleka awanyama nkaninye pano walinji munsi yampanzo mu Ijeputi. Awafumya mu Ijeputi nikasa lyakwe ilyamaka, 18swinya kumyaka amukumi yani wapnpuzyanga kumiwele yawo mulumpalang'ang'a. 19Nga ala walovya imyiko munenulambali munsi ya Kenani aleka awantu wakwe awaya awakwikala munsinye yoyo iwa ansi yawo 20nche kumyaka imyanda yini namakumi yasano (450).

Pansizi awapa wakapanzya ukwiza fika pampindi yamutumwa Samueli. 21Awala walambilizya ukuti awape imfumu, Leza awapa Sauli, weyo umwanakwe Kishi, uwamwiko wakwe Benjemani, awino awa amfumu yawo kumyaka amakumi yani. 22Ala wamufumya, Leza apa Davidi uwufumu. Ati, Nazana kuno e Davidi umwanakwe Jese, awili muntu wino nkulonda, wino angachita ivintu vyonsi vino nkulonda ukuti achite. 23Yesu walinji awamwikwata lyakwe Davidi. E Yesunye wee awino Leza walesile awa we Katula wawa Israeli, ndimuno walayilizizye. 24Walile pano Yesu atani atalike ukuwomba umulimo wakwe, Yohani wawizizizye awantu wonsi ukuti wafuntuke kuluwembu lwawo wabatizwe nukubatizwa. 25Ala vino Yohani wati awamala umulimo wakwe, anena awantu ati, Ngamwenji mukwelengania mukuti neweni? Nenji nsi newino mukalolela. Ukuwa lolani! Weni akwiza pansinzi pakwe nene, wino ntazipila ukumuzula indyatu kumanama yakwe.

26Mwewanawitu-mwe, likwata lyakwe Abrahamu, namwe makandi mwensi wano mukalumbula Leza: akwakwe sweswenye kuno amazwi yaa ayikomolwa yizila! 27Amuno awantu wano wikala mwe Yerusalemu, nawakapanzya wawo, watamanyile kuno we Katula wawo, nanti akwiluka amazwi yawatumwa yano wawazyanga mumanda yakusolezya yonsi. Ukuwa naponye pakusumbichila Yesu waleka amazwi yano awatumwa wavwanganga yafiswa. 28Swinya naponye chingatenga watamuzanile nuluwi lumwi ulwakuti akomelwe, awalambilizya Pilato ukuti wamukome. 29Nga awala wachita chonsi ndimuno Amawaliko Matele yavwanjila kuvyakwe weliwe, awamwisya pawuchingane awaya awamuzika munkungwe. 30Ukuwa Leza amuzyulupula, 31walolesile chiwiwichiwiwi kwewane wafumanga ku Galileya wakuya kwe Yerusalemu. Kanonzi awali wakalola wakwe ku wa Israeli. 32-33Naswe swe-waa twawaletela Ilandwe Zima: lino Leza walayilizizye watatatukulu ati alichita, kanonzi watuchitila wowonye swewizikulu wawo, wazyulupula Yesu, Ndivino chawalikwa Mwilumbo lyachitiwili ukuti,

Wemwanane:

Ilelonye lyoo nawa neso.

34Wonye-woo avino Leza watasile kuvyakumuzyulupula, nanti kwiza wola nawanda,

Ati, Ndiwapepa nukupepa kwimichile

kuno nalayilizizye Davidi.

35Nachawuzimanye avino wavwanga swinya wati,

Utalilechelezya umuwomvi wako umukundwe

ukuti ayize awole.

36E Davidi weni wapakatanga Leza pampindi yakwe yonsi; asuka ayiza afwa, azikwa papipi nawayisikulu, awola. 37Ukuwa wino Leza wazyulupuzile atatela awole. 38-39Wanawitu mwensi, nkasi mumanye mbali nukusimichila kuno amazwi yakutetelwa kwaluwembu lwinu yawizizizwe kwakwe mwemwe muno we Yesu; mumanye kuno wensi wino akusuwila mwakwe weliwe wafuma mwikoli lyaluwembu luna isundo lyakwe Musa litanga lileke mukululwe. 40Chenjelani alyakuti vino awatumwa wavwanzile vitize viwaponele, ukuti,

41Lolani, mwe wamukwelengulamwe!

Muwazunguka mufwe nukufwa!

Amuno umulimo wuno nkuwomba mumpindi yinu

mutanga muwuzumilizye,

chingatenga nanti wumwinye wawalondololela!

42Ala pano Pauli nu Bamaba wakufuma mung'anda yakupepela, awantu awawalambilizya ukuti wize-wize swinya uwanda wakusolezya wunji alyakuti wakawanene ivivule ivyakwe vyovyonye. 43Awala awantu wasata, awa Yuda wavule namakandi wane wapochelezile ichipepelwe cha chi-Yuda awakonka Pauli nu Bamaba. Awapostile awawavwanzya swinya awawasimpisya ukuti walandalile ukwikala munkumbu zyakwe Leza.

44Ukuti pawanda wunji uwakusolezya kwela awantu wonsinye awamukaya awaya mukwivwa izwi lya Mfumu. 45Awala awa Yuda walola amawumba, uwuzuwa awuwalema nkaninye; awakwelengula amazwi yano Pauli wavwanzile awamutuka nintusi. 46Ukuwa weni Pauli nu Bamaba awalutilizya ukuvwanga nukusinga konsi, awati, Chazipila ukuti izwi lyakwe Leza litalichile livwangwe kwemwemwe. Ukuwa vino musinakulonda, swinya musinakuyilola kuno namwenye mwazipila uwumi wamuyayaya, twandi tuwaleke tuye kumakandi. 47Amuno avino Imfumu yatukomelezya, yati,

Nawasonta ukuti mukawilile amakandi,

Ukuti muwe mwenzila yikomola yansi yonsi.

48Ayala amakandi yivwa wowonye awasechela, awatumvya amazwi ya Mfumu; wanji wonsi wane wasozilwe kuwumi wamuyayaya awasuwila.

49Nga izwi lya Mfumu alikwila insi yonsi. 50Ukuwa awa Yuda awasonkomola wasongo wamukaya nawanachi amakandi wamwi awalumbililwe wane wapepanga Leza. Awayimvya Pauli nu Bamaba, awawawinga munsi yawo. 51Awapostile awawakunkumulila itukumbu lyakumatamba yawo, awaya kwe Ikoniam. 52Awapostile wa mwe Antioki awizula nichimwemwe chikulu mbali nu Muzimu Mwimichile.

Currently Selected:

Imilimo 13: WWN82

Highlight

Copy