Profet Maeka 5
5
1Ghotilo naiknomi Jerusalem!
Tahati mala kilo fodu meidi noda soldia tahati ra!
Gognarona naoka igre falithui ghitahi!
Mare thofno parani nei famamajani eghu fara noda king tahati gne!
Lord nhaꞌa cheke kaisei mae mala funei ginauna jifla mei funu Betlehem
2Lord ne cheke eghu,
“Ghotilo naiknomi ka namono ikoi Betlehem, ka nohi Efrata.
Nomi namono ghotilo igne kaisei namono ikoi kolho ka namono te gnafa te au falithui ghami ghotilo.
Nu neuba, iara ginauna vahini kaisei mae ka vikemi ghotilo agne Juda,
mala funei fruni ni Israel.
Tharakna gna mae igne kaisei tharakna thofno ulu fara neke mei funu tifa.”
3Nu ulu lahu na, Lord neke lisei ghita hi.
Mana neke snakredi mae naoka mala funei fruni ghita ghilei thokeni narane kaisei gaꞌase ginauna karha thugna nalhaꞌu.
Ka narane tuana, kheragna king teke tei sosolo ka keha kantri delei igre,
ginauna nake pulo mei Israel ka nodi kantri na.
4Kate biꞌo haghe mae sua igne, mana ginauna reireghi fakelidi nogna naiknore.
Mana ginauna funei frunidi ka nogna nolaghi Lord teke tusu ranghini mana,
eghuteuna mana ginauna funei ka nanghagna Lord mae ihei te King.
Ka narane tuana, nogna naikno mana re ginauna au fakeli,
naugna naikno te gnafa ka nauthoglu igne ginauna filo glani mana te au nolaghi biꞌo.
5-6Igne puhi nate fakarhi ghita king ka khamedi naiknodi Asiria,
mala ke pulo mei tahati ka namono na au te keli.
Kate jajagha te mei armi gna Asiria ka noda kantri tahati gne te funu atha noda vido keli aheva te mala poru tahati igre,
tahati ginauna kuru tei noda kmana famane lida tahati igre baludi noda soldia te gnafa tahati igre mala magra ka mare.
Eghuteuna naugna te nheta fara noda soldia ka magra,
mare ginauna uluni Asiria ka nogna glose Nimrod.
Lord ginauna fakarhi ghita, nu mana ginauna jaola paradi maedi Asiria.
7Naoka re neke uludi naiknodi Israel neke hatadi neke tei ka keha kantri te khaba fara igre,
naikno igre ginauna te au ka kmana kantri.
Tutuani, mare ginauna tei au heva heva jateula nabubla bongiro,
ba nakhete ikoi teke kuru mei Lord mala famane kotu gano.
Eghuteuna naiknore ginauna rouronu kolho ka God theome ka kaisei naikno, theo!
8Naikno teke au faleghu Israel igre ginauna kate au rheta farihoteidi naikno te jateula lion te tei hiro glepo tautagu mata ba sipu ka sare mala ghamu.
Kate dedi sipu igre, naꞌa gasa kolho tei kathu sasakadi,
eghuteuna theo kaisei naikno tangomana te fakarhidi re.
9Tutuani fara, naiknodi Israel ginauna uludi
nei kafe goigonidi eghu naoka te gnafa re.
10Lord ne cheke eghu,
“Ka narane tuana, iara ginauna roꞌedi nomi hose ghotilo are,
eghuteuna iara ginauna goigoni nomi chariot mala magra ghotilo are.
11Iara ginauna goigoni namono biꞌo ka nomi kantri ghotilo na igre,
eghuteuna iara ginauna paꞌe soru nomi vido rheta mala poru ghotilo igre.
12Iara ginauna atha koko nomi thina blahi te fatutuanidi ghotilo igre,
eghuteuna iara ginauna aknu falehe naikno te au naitu nhaghe te mala chekedi gobigna lepo nate thoke mei.
13Iara ginauna goigoni nomi mumuju nei nomi khegra blahi teu ghotilo are,
mala theome tangomana ghotilo teke tarai ka glepo teke edi kolho ghotilo themi igre.
14Iara ginauna paꞌe soru nomi mumuju god gaꞌase Asera te au tafri ka nomi kantri ghotilo igne,
eghuteuna iara ginauna goigoni nomi namono ghotilo igre.
15Iara diꞌatagu fara ka naiknodi kantri te gnafa te au falithui ghami ghotilo naugna mare ne theome leghu ghau iara Lord.
Eghume iara ginauna thofno paradi mare.”
Currently Selected:
Profet Maeka 5: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
