Profet Maeka 4
4
Lord ginauna eni nauthoglu igne mala au fakeli
1Ka narane nate mei mana na, thogele te kegra nogna Sugablahi Lord igne, ginauna ulu salaꞌudi gnafa keha thogele are. Eghuteuna naikno te gnafa ka keha kantri are ginauna tangomana te salo fodu mei tagna.
2Kmana naikno ginauna mei cheke eghu,
“Mei, tahati na kafe haghe ka nogna thogele Lord,
nogna God mae Jekop.
Uve, tahati na ari mala pogho soruni mana ka Sugablahi na.
Eghuteuna Lord ginauna farirhiu ghita mala leghuni tahati puhigna mana na.”
Uve, mana ginauna eni igne, naugna chekegna Lord na ginauna jifla mei Jerusalem,
eghuteuna mana ginauna farirhiudi naiknore puhigna mana heva heva.
3Eghuteuna ka narane igne,
Lord ginauna fadoglidi puhi fapholai fari hoteidi keha kantri te khaba fara are.
Aonu mare ginauna nake kuri naflahi mala magra ra nei nodi goru teura mala ke vuhai khodo mala dokha glose nei naflahi pekora mala kato grep.
Aonu naiknogna kaisei kantri na ginauna na theome magra ka keha kantri na, ba farirhiudi mae majaghani re mala magra.
4Naikno te gnafa igre ginauna au fakeli, nei au muana fabrahu.
Mare ginauna tangomana te au fakeli ka nodi nagare grep,
eghuteuna mare tangomana te gnokro ke paridi nodi gaju fig.
Eghuteuna na theo kaisei naikno nate famamhagudi.
Igne nogna cheke Lord mae ihei te au nolaghi fateote'o.
5Naiknodi kantri falithui ghita igre theome gnafa te tarai nei leghudi nodi god.
Nu neubane eghu, Lord noda God,
tahati na theome gnafa te tarai nei leghuni mana fabrahu.
Lord ginauna atha fapulo nogna naiknore
6Lord ne cheke eghu,
“Kaisei narane ginauna mei, iara ginauna nake salo fodu mei ghami ghotilo iheire teke para ghami iara ra.
Ghotilo teke huhuru ghami iara teke tei kokodi nomi namono ra,
7ghotilo neke tei au ka kaisei kantri te khaba fara neke glaꞌe jateula ihei te lehe ghahemi gnara neku.
Nu iara ginauna togho ghami ghotilo iheire te karha teura mala kaisei naikno rheta.
Eghuteuna iara ginauna funei fruni ghami ghotilo fabrahu tifa tifa ke kligna Thogele blahi Saion.
8Jerusalem ginauna na jateula kaisei suga mala toetoe eghu mala au iara tagna mala reireghi ghami ghotilo jateula mae ihei te reireghidi nogna sipu ra eghu.
Eghuteuna Jerusalem ginauna na mala namono biꞌo ka nomi kantri ghotilo aheva king nate funei frunidi nogna naiknore jateula tifa ra eghu.”
9Ghotilo naiknomi Jerusalem!
Naugna unha si ghotilo te tanhi fabiꞌo jateula gaꞌase te karha sua ra teu gnea?
Ba? Ghotilo theo nomi king te mala batu ghami na?
Ba, nomi mae biꞌo ghotilo ra la lehehi?
10Tore! Ghotilo thofno nabami kolho te mala diꞌanagnafa te eha fabiꞌo jateula gaꞌase te karha sua ra teuna.
Naugna na theome raugha, naoka ginauna huhuru ghami mala jifla kokodi ghotilo nomi namono re,
mala tei au tafri kolho ghotilo fari hotei sare.
Mae naoka igre ginauna huhuru ghami ghotilo mala tei Babilonia.
Nu ke leghu, Lord ginauna fakarhidi iheire nate karha mei ke leghumi ghotilo ka nodi nolaghi mae naoka.
Naoka falithuni Jerusalem
11Gognarona, kmana naikno ka keha kantri igre khapru mei mala magri nigho.
Mare cheke eghu,
“Tahati mala goigonini Jerusalem, mala filo nodani!
Tahati ginauna keli tada fara kate filoni namono biꞌo igne nate thofno diꞌa fara na!”
12Nu mae igre theome laseni gaoghathogna Lord.
Tutuani, naiknodi kantri igre theome laseni Lord te kilodi mare te mala khapru mei ka vido igne,
eghuteuna Lord ginauna thofno goigonidi fara mare.
Lord ginauna na jateula mae te bubukrei sisi wit te
mala mei buluka te tapla ke kligna te mala fagagae khune ra eghu.
13Lord ne cheke eghu, “Ghotilo naiknomi Jerusalem!
Ghotilo tei goigoni di mae naoka!
Iara ginauna farheta ghami jateula buluka nalhaꞌugna honagna na jateula aean,
eghuteuna ghahegna pari na jateula bras.
Eghuteuna ghotilo ginauna tapla ke klignadi ka naikno ka kantri te kmana te jateula buluka te tapla ka wit te khoko guligna na ra eghu.
Eghuteuna gobigna lepo te uludi ghotilo ka magra, ghotilo ginauna tusu mei ka iara Lord,
nodi Funei naikno te gnafa ka nauthoglu igne.”
Currently Selected:
Profet Maeka 4: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
