Galesia 1

1Mae Jisas Kraes nei God Kmada neke vahi ghau iara mae Pol mala kaisei nogna mae khuru. Naiknore neke theome vahi ghau iara, eghuteuna theo kaisei naikno teke tusu mei ka iara u nolaghi te mala loku jateula mae khuru. Nu God mae ihei teke fakarha fapuloni mae Jisas kau glehe ia teke eni igne ka iara na. 2Iara nei naikno khiloau fateo te au balugu igre kubae ghami ghotilo naikno te au ka Provins Galesia.

3Iara toreni nogna khokofakasai nei pharikeli God Kmada nei nogna mae Jisas Kraes noda Lord mala au balumi. 4Mae Jisas neke snakreni thegna mala lehe tughudi nakhibodare mala snagla tahati ka puhi te diꞌa te funei frunini nauthoglu igne. Tutuani fara mae Jisas neke eni igne, naugna igne unha teke magnahagheni God Kmada na. 5Tahati kilo fnaknoni God tifa tifa. Amen.

Theo kaisei Nonomho te Keli te nhogri

6Iara jaglo nogu ka ghotilo te ghosei te figri tagruni God, mae ihei teke kilo ghami ka nogna khokofakasai mae Jisas Kraes. Gognaro na ghotilo figri mala fanomho ka keha nafnata Nonomho te Keli te nhogri. 7Nu jare na theo keha nafnata Nonomho te Keli. Keha naiknoi kolho te goigoni ghami ghotilo te magnahaghei tuthughu tafri nogna Nonomho te Keli mae Jisas Kraes. 8Nu neubane mae ihei, ba ghehati ba kaisei engel gna kligna, toutonuni u Nonomho te Keli te nhogri ka unha te toutonuni hi ghehati ka ghotilo igne, mae tuana nabagna na toreni God mala au papara mana ka namono Gehena. 9Iara gognaro nake cheke leuleghu ka unha teke chekedihi ghehati ka ghotilo tifa ra. Jame ihei te toutonuni u Nonomho te Keli te nhogri ka unha teke fatutuani nihi ghotilo na, mae tuana nabagna na toreni God mala au papara mana ka namono Gehena.

10Ghotilo laseni, iara gne theome fariuriu mala keli tadi naiknore ka iara. Theo! Iara fariuriu mala keli tagna God ka iara. Jame tutuani me cheke famaemahedi nei muamugnadi eghu iara naiknore na, iara theome tangomana te nogna gloku mae Kraes na.

God neke vahini mae Pol mala mae khuru

11Kheraguro, iara magnahaghe ghami ghotilo te thofno laseni u Nonomho te Keli te toutonu iara igne, u Nonomho te Keli igne neke theome mei funu ka naikno. 12Iara neke theome nomhini ka mae ihei ba theo kaisei mae teke farirhiu ghau iara na, nu thegna mae Jisas Kraes ngala teke falalase ka iara u Nonomho te Keli igne.

13Ghotilo nomhihi unha teke eni iara tifa kani au teku ka nodi puhi hatimare mae Jiura. Iara neke faheaheta fara mala paradi iheire teke fatutuani ni mae Jisas. Iara neke fariuriu roꞌeni nogna khiloau God na. 14Eghuteuna iara heta fara mala leghu fakelini nodi kastom hatimare mae biꞌomi Jiu tifa ra. Ka puhi igne iara loku heta fara uludi kmana mae kheragu te majaghani ra. 15Nu God au nogna gaoghatho malagu iara kani au nga teku iara ka thi'agna idogu na. Aonu mana neke kilo ghau iara ka nogna khokofakasai mala 16toutonu iara u Nonomho te Keli eigna mae Thugna God ka naikno te theome Jiure. Tutuani fara God ne falalase ka iara mae thofno Thugna na. Kate kilo ghau God na, iara neke theome hata farirhiu ba thotogho ka mae ihei. 17Iara neke theome tei Jerusalem mala filodi mae iheire teke kulu mae khuru ke ulugu iara re. Nu iara doglo neke tei Arebia, eghuteuna ke leghugna igne iara neke pulo Damaskas.

18Sala'u thilo finogha ke leghugna igne iara neke tei Jerusalem mala filoni mae Pita, eghuteuna iara au balugna mana nabotho glima narane. 19Nu ka narane igre iara neke theome filodi keha mae khurure kaisei mae Jemes tahigna Lord kolho teke filoni iara na. 20Iara cheke tutuani, eigna God laseni unha te riso ari iara ka ghotilo igre thofno tutuani fara.

21Ke leghugna igne, iara neke tei ka phei Provins Siria nei Silisia. 22Nu naikno khiloau te au ka Provins Judia, mare theome filoniu thinigu iara na. 23Mare nomhini kolho thoutonu eigu iara na, “Mae igne neke para ghita tahati tifa. Nu gognaro na mana kela toutonu eigna u fatutuani teke fariuriu roꞌeni thegna tifa ia.” 24Eghuteuna naikno khiloaure ne kilo fnaknoni God eigna unha te eni mana ka iara na.

Currently Selected:

Galesia 1: mrn

Highlight

Copy

Compare