Eksodas 35
35
Vetula gna Narane Sabat
1Moses ne kilo meidi mavitu gna Israel ne cheke eghu ka mare, “Igre cheke teke chekedi Lord te mala edi tahati re: 2‘Ghotilo au namno narane te mala edi ghotilo nomi gloku re, nu fafitu narane na nomi narane blahi ghotilo. Igne nogu narane Sabat iara Lord eghuteuna ghotilo mala gnafa tagna. Jame ihei te loku ka narane igne, ghotilo ginauna faleheni mana. 3Vido te gnafa te au ghotilo tagna na, ghotilo thosei ifu khaꞌaghi ka narane Sabat.’ ”
Fafara mala loku nogna Suga Tapuale te Blahi Lord
4Moses ne cheke eghu ka naiknodi Israel, “Igne unha teke chekeni Lord ranghi ghita te mala eni tahati na. 5Tahati gnafa mala fafara ka Lord. Ihei te magnahaghei fafara ka Lord, mana tangomana te tusu lao:
“gol, silva, bras,
6famane pohe vegha teke hohoro ka khakla sipu,
nei famane pohe teke hohoro ka khakla nanigot,
nei ghajo blu, ba ngonge, ba ukru,
7nei guli sipu nalhaꞌugna te eni faꞌukru mare,
guli vena,
thaba gaju akesia,
8oliv oel mala juta,
khakla gaju te famane sisiri kelidi te mala nhaꞌa lao ka insens, eghuteuna mala lilisei ka oel blahi mala taofi pris,
9famane thina ukru te kiloi mare soham, baludi keha famane thina te mala lilisei lao ka nodi pohe blahi te brahu mae pris biꞌo te kiloni mare efod, nei paos te mala fagefe ka babango gna mana.”
Glepo blahi gna nogna Suga Tapuale te Blahi Lord
10Moses ne cheke eghu ka mare, “Mae te gnafa ka ghotilo te thofno lasedi gloku igre, mare mei mala edi glepo teke chekedi Lord mala edi tahati teku ra.
11“Glepo igre: Suga Tapuale te Blahi baludi thotoku gna, nei peg gna, nei thaba baludi pesidi pari, nei thaba ka geridi, nei khegra gna baludi pesidi pari.
12Eghuteuna Bokis Blahi gna nogna Nhaꞌa Cheke Lord, baludi phei gaju brahu mala pala, nei thotoku gna na, nei pohe biꞌo mala fofotho gna vido te thono Blahi fara aheva Bokis Blahi te au tagna.
13Eghuteuna Tevo malagna Bret Blahi baludi phei gaju mala pala, eghuteuna keha nogna glepo, eghuteuna Bret Blahi te mala laseni Lord te au baluda.
14Eghuteuna glepo mala lilisei juta balu oel.
15Eghuteuna Olta mala gahu Insens baludi phei gaju mala pala, eghuteuna oel blahi mala fablahi glepo, eghuteuna insens te au glepo te famane sisiri,
eghuteuna pohe biꞌo mala fofotho grengatha ke ulugna suga tapuale te blahi igne.
16Eghuteuna Olta te mala Gahu Fafara balu glepo jateula kaisei kharaꞌo eghu ka thagrugna na teke horo mare ka bras, nei phei gaju mala pala, nei keha glepo gnare.
Eghuteuna Dis teke horo ka Bras balu pesigna.
17Eghuteuna pohegna bara malagna glalaba te ligohoni Suga Tapuale te Blahi baludi khegradi bara igre nei pesidire, nei pohe te mala fofotho gna grengatha gna bara igne.
18Eghuteuna gnarho gna Suga Tapuale te Blahi nei bara gna, nei glepo teke tuge sukha iagho lamna glose te mala haru famaku gnarho igre.
19Eghuteuna nogna pohe blahi pris te mala fahaghe kate loku mana ke lamna gna Chogho Blahi na. Igre pohe blahi Eron nei thugna mana re eghu nate fahaghe kate eni mare nogna loku pris.”
Naiknore atha ne mei glepo te mala loku nogna Sugablahi Lord
20Aonu mavitu gna Israel ne kafe jifla kokoni Moses neke figri ka nodi suga re. 21Iheire fateo te thofno magnahagheni fara ka nagnafadi fateote'o te mala tusu lao keha glepo ka Lord, nei thofno magnahagheni fara te eni igne teuna, mare atha mei glepo igre mala tusu lao ka Lord. Mare atha mei glepo mala eni Suga Tapuale te Blahi te mala thafoni God, nei glepo mala tarai ke lamna gna Suga Tapuale te Blahi igne, nei mala edi nogna pohe pris. 22Uve, nalhaꞌu ba gaꞌase te thofno au nagnafadi fara te mala tusu lao glepo ka Lord igre, mare atha mei famane glepo teke horo mare ka gol, nei keha nafnata glepo mala lilisei ka pohe, nei dedenge, nei ring, nei chen mala babaꞌo. Mare pala haghe gol igre jateula nodi fafara eghu mala fagaglana gna te glepo igre nogna Lord. 23Eghuteuna iheire te gnafa te au famane pohe vegha, nei pohe teke eni ka khakla nanigot, nei ghajo te blu, ba ngonge, ba ukru, ba guli sipu nalhaꞌu gna te ukru, ba famane guli vena, mare atha mei. 24Eghuteuna iheire fateo te au silva nei bras mare jaola atha mei mala fafara ka Lord malagna gloku igne. Eghuteuna iheire te au thaba gaju akesia naba te mala eni ka gloku igne, mare jaola atha mei. 25-26Goro gaꞌase te gnafa iheire te lasedi fara te edi ghajo maladi famane pohe vegha, ba te mala edi ghajo te blu, ba ngonge, ba ukru, ba edi ghajo ka khakla nanigot, mare atha mei nafnata ghajo igre. 27Eghuteuna mae lida gre mare atha mei famane thina ukru te kilodi mare soham, eghuteuna keha famane thina na mala lilisei ka efod nodi pohe mae pris biꞌo, nei ka paos mala gefe ka babango gna mana na. 28Eghuteuna mare atha mei oliv oel mala lilisei ka juta nei mala ei oel blahi mala fablahi glepo. Eghuteuna mare jaola atha khakla gaju te famane sisiri kelidi, mala lilisei lamna ka oel blahi igne, nei mala lilisei ka insens. 29Nalhaꞌu te gnafa nei gaꞌase te gnafadi Israel, iheire te magnahaghei toghoni gloku teke chekeni Lord ka Moses, mare atha ne mei glepo igre ne tusu lao kolho ka Lord.
Mae mala loku gna nogna Suga Tapuale te Blahi Lord
30Moses ne cheke eghu ka naiknodi Israel, “Lord la vahinihi Besalel thugna Uri, gragna Hua ka vikegna Juda. 31Eghuteuna Lord ne snakreni Tharunga gna na mala au balugna Besalel, ne tusu ranghini mana gaoghatho te keli nei glalase, mala lasedi nei edi eghu mana thua nafnata gloku te keli. 32Besalel au tagna famane gaoghatho te keli mala tangomana te edi glepo igre ka gol nei ka silva nei ka bras. 33Mana jaola tangomana te kato thina te famane filodi re mala lalaoni thua nafnotu glepo, nei mana jaola tangomana te edi glepo ka thaba. Eghuteuna mana jaola lasedi fara te edi thuagna nafnata gloku te jateula igre teu na. 34Lord tusu lao glalase ka mana nei ka Oholiab thugna Ahisamak ka vikegna Dan, mala tangomana phia mare te farirhiudi keha mae mala edila mare nafnata gloku igre. 35Lord ne tusu lao glalase ka phia mare mala kato thina te keli mala lalaoni gobigna lepo, nei mala edi keha nafnata glepo nate edi phia mare, nei mala edi famane pohe vegha, nei mala valakasi pohe ka ghajo te blu, ba ngonge, ba ukru, nei jaola mala edi keha nafnata pohe. Phia mae igre thofno lalase fara te mala ghaoghathodi thua nafnata glepo te keli, eghuteuna phia mare jaola tangomana te mala edi gobigna gloku re.
Currently Selected:
Eksodas 35: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
