Romaĉantyidyes 11
11
Jenꞌ ñịbeꞌ ĉọcsi muꞌin Israeltyiꞌ vóshiꞌ in
1Yụ raꞌ jéyac: ¿Vaꞌcacsequi buty Jenꞌ muꞌin judío in ĉụiꞌtyiꞌ tsimꞌtactyiꞌ muꞌ? Jam junꞌ vaꞌcacsequi. Yụ́mun nash chimeꞌ Israeltyiꞌ vóshiꞌ muꞌ, Abraham vóshiꞌvun yụ jiquej, Benjamíntyiꞌ ñuruꞌtyity yụ. 2Jenꞌ jam junꞌ vaꞌcacsequi muꞌin judío in muꞌin tashchety tsimꞌtactyiꞌ muꞌ. ¿Jam adac chị́yetiñeꞌ ọij sánacdyeꞌ p̂eijtes jiquej Elías? Elías cọdyete Jenꞌ, jiꞌmeꞌtacsi muꞌin Israeltyiꞌ vóshiꞌ in, yi muꞌ: 3"Tsuntyiꞌ Ayoꞌ, uts Israeltyiꞌ vóshiꞌ in aty ijabun in mítyiꞌ soꞌmactyiꞌ p̂eyacdyeꞌ in, judyeyaꞌ chimeꞌ räj patsacjibun in jiꞌcoꞌshayacdyeꞌ in. Yụ́dyety yirity mícheꞌ ĉúti, yụ́mun chimeꞌ mạꞌjeꞌ ijan yụ in", yi Elías jéte Jenꞌ. 4Jenꞌ na vorjajiti: "Jam nash mídyety yirity mọmoꞌ muꞌyaꞌ, daiꞌ nash tacaꞌ muꞌyaꞌ yụ́cheꞌ ĉútity in, yävätidyeꞌ mir tacaꞌ muꞌyaꞌ in jam ĉútity Baalcheꞌ in", yi Jenꞌ jajiti. 5Meꞌdye chimeꞌ q̂uinꞌ in tacaꞌ damꞌ muꞌyaꞌ judío in ĉútity Jenꞌcheꞌ in, muꞌin tsimꞌtactyiꞌ Jenꞌtyiꞌ muꞌ, muꞌin ñịbeꞌ ĉọcsity Jenꞌ ñịbeꞌjitidyesyaꞌ muꞌ. 6Muꞌ Jenꞌ tsimꞌtacsi ñịbeꞌjitidyesyaꞌ muꞌ jam tsimꞌtacsi ĉụiꞌsiꞌyaꞌ rụijquedyeꞌ muꞌin, junꞌ chuc jämꞌ bäꞌyi in. Jenꞌ tsimꞌtacsi ĉụiꞌsiꞌyaꞌ rụijquedyeꞌ jụijyaꞌ muꞌin, a vuty jam mọꞌ ñịbeꞌjitidyes shupquiꞌ o.
7Mọꞌ jísinꞌ muꞌin Israeltyiꞌ vóshiꞌ in, meꞌ tsanꞌ dyijyi in, mạꞌjeꞌ tsanꞌ rụij yụꞌtac Jenꞌyaꞌ, meꞌ tsanꞌ ĉúti in, jam qui namꞌ meꞌ dạqueꞌ in. Muꞌin qui namꞌ in Jenꞌtyiꞌ tsimꞌtactyiꞌ muꞌ, muꞌin mọmoꞌ rụij yụꞌtacsi. Muꞌin na yoctyiꞌ judío in jiꞌyäjcac mọmoꞌ muntyiꞌ ĉojtyiꞌ in. 8Mọꞌdye p̂eyeꞌ mọꞌ sánacdyeꞌ yiꞌ: "Muꞌ Jenꞌ itŝiꞌ dyijyedyeꞌ jiꞌtacsebi ĉojtyiꞌĉansiꞌ muꞌin, q̂uinꞌ aty meꞌ shupqui muꞌin in, meꞌ tsanꞌ cạvi in, jam qui namꞌ naijti in, meꞌ tsanꞌ seꞌvaqui in, jam qui namꞌ chicacsi in, tacaꞌdye q̂uinꞌ meꞌ in", yiꞌ sánacdyeꞌ. 9Chimeꞌdye muꞌ David jiquej p̂eyacsebi vaꞌtacdyeꞌ raꞌ judíos muꞌin, yi muꞌ jiquej:
"Yụ cọdyete Jenꞌ paj qui mọꞌin feshta muꞌin vaꞌtacdyeꞌ shupquiꞌ,
jeñej raꞌ jibej quepyis,
paj meꞌ shupquiꞌ mọꞌ feshta muꞌin,
paj vaꞌtacdyeꞌ jịꞌĉojtyeꞌ in.
10Paj tofej shupqui ĉojtyiꞌĉan muꞌin,
paj yejĉoij ñịbeꞌ cạveꞌ in", yiꞌ sánacdyeꞌ Davidvunsiꞌ.
C̣hoñi raꞌ in jam judío in
11Ọij jiꞌchäquiyisinꞌ junꞌ chuc judío in vaꞌquecte Jenꞌ jiquej in. Yụ raꞌ jéyac: ¿Räjĉan buty raꞌ meꞌ monꞌdyeꞌĉan bäꞌyi judío in? Jam raꞌ junꞌ. Jeshaꞌ, muꞌin judío in vaꞌquecte Jenꞌ jiquej in, mọꞌ meꞌ buꞌyiꞌ shupquiꞌ paj qui tupuj c̣hoñi muꞌin jam judío in. Aty juchajyaꞌ muꞌin judío in, chat qui muꞌ Jenꞌ jiꞌc̣honacsi jam judío in, mọꞌ mus dyijyedyeꞌ paj qui muꞌin judío in jiꞌyoquiti in dyijtucdyeꞌyaꞌ in muꞌin jam judío in, mọꞌ raꞌ jiꞌdyijvacseban muꞌin in. 12Meꞌ mọꞌ juchaj judíos muꞌin, mọꞌ jämꞌ shupquiꞌ úchetydyes muntyiꞌ in, muꞌin qui jam judío in, muꞌin qui ñịbeꞌjeyacsi muꞌ Jenꞌ, muꞌin qui jiꞌc̣honacsi. Meꞌ jụijyaꞌ shupquiꞌ juchaj judíos muꞌin, dadamꞌ raꞌ mọjoꞌchaꞌ shupquiꞌ ñịbeꞌjitidyes muntyis muꞌin, aty ayijyaꞌ mọꞌ tupudyeꞌ jụjjebajteyaꞌ quivij muꞌ Jenꞌ muꞌin daiꞌtyiꞌ judío in.
13Q̂uinꞌ raꞌ yụ jéyac miꞌin jam judío miꞌin. Muꞌdye Jenꞌ yuꞌtyin yụ paj qui yụ voroꞌtacsi muꞌin jam judío in, mọꞌdyes yụ maꞌjotaqui carijtacdyeꞌ yụ. 14Mọꞌ dyijyedyeꞌ yụ mạꞌjeꞌ paj qui muꞌin chätidyeꞌ yụ judío in jiꞌyoquiti in dyijtucdyeꞌyaꞌ muꞌin judío in, aty chịjyaꞌ in junꞌ chuc muꞌin qui aty Jenꞌtyiꞌ ạvaꞌ shupqui in, vatyquej raꞌ mọꞌ jiꞌdyijveyacsebanꞌ Jenꞌcheꞌ in, vatyquej raꞌ pạrej muꞌyaꞌ jụj jaꞌyacseban yụ. 15Jeshaꞌ muꞌ Jenꞌ aty vaꞌcacsequi muꞌin judío in, chat qui muꞌ Jenꞌ yụꞌtacsi yoctyiꞌ muntyiꞌ in paj qui jämꞌjibun muꞌtum in. Dadamꞌ raꞌ mọjoꞌchaꞌ shupquiꞌ ñịbeꞌjitidyes muꞌindyes in aty jụjjebajteyaꞌ Jenꞌ in muꞌin judío in. Aty meꞌ yíyaꞌ, där raꞌ jämꞌ shupquiꞌ mọꞌ, yódyemꞌ vañinyeban säñity u in. 16Jeshaꞌ muꞌ pan coc̣haꞌnactyiꞌdyemꞌ, miquiꞌ poc̣hoc yụꞌtac Jenꞌdyety jụijyaꞌ, räjtumdye qui namꞌ Jenꞌdyety shupqui muꞌ pan. Meꞌdye mọꞌ chimeꞌ cätidyeꞌ, ribin mọmoꞌ yụꞌtac Jenꞌdyes jụijyaꞌ mọꞌ, räj mọꞌ Jenꞌdyes shupquiꞌ cätidyeꞌ, räjtumdye dacaꞌ mọꞌ.
17Meꞌdye muꞌin chimeꞌ judío in, muꞌin jeñej buꞌyi dacaꞌ anicsis cätidyeꞌ orivos, meꞌ buꞌyi muꞌin in, pạrej tätstac dacaꞌ mọꞌ. Miꞌin na jam judío jeñej buꞌyi yiris dacaꞌ jeñej jam anicsis cätidyeꞌ orivos, meꞌ buꞌyi miꞌin jam judío miꞌin. Chat qui mọꞌ dacaꞌ peiꞌtac mọꞌyaꞌ täꞌtsacyaꞌ anicsischeꞌ orivo, mọꞌcheꞌ qui chịbiꞌ mọꞌ dacaꞌ, mọꞌmun chimeꞌ soꞌmac ferdyeꞌ mọꞌ tyumeꞌ chäsh ribinsimꞌ, meꞌ buꞌyi shupqui miꞌin jam judío miꞌin. Meꞌ tsanꞌ jam Jenꞌtyiꞌ jiquej tsimꞌtactyiꞌ miꞌin, miꞌinmun qui ñịbeꞌjeyac judíodyes miꞌin, Jenꞌ qui ñịbeꞌjinac. 18Mọꞌdyes miꞌin jam judío miꞌin, jam raꞌ äcäijjeyacsi miꞌin muꞌin judío in. Jenꞌ vaꞌcacsequi jiquej, muꞌin jeñej buꞌyi anicsis dacaꞌ tätstacsiꞌ. Miꞌin qui namꞌ jeñej buꞌyi yocsiꞌ dacaꞌ jam anicsis, peiꞌtacsiꞌ anicsischeꞌ cätidyeꞌ. Mọꞌdyes jam raꞌ vaꞌbunyi judíotum miꞌin. Jeshaꞌ mọꞌ dacaꞌ jam nash junꞌ jạtsaꞌchutiꞌ mọꞌ ribin, mọꞌ ribin tsạꞌchuiꞌ mọꞌ däräs dacaꞌ.
19Vatyquej raꞌ jiꞌpenꞌti yi miꞌin: "Meꞌ tsanꞌ meꞌ, Jenꞌ qui namꞌ vaꞌcacsequi muꞌin judío in, muꞌin jeñej buꞌyi in tätstacsiꞌ dacaꞌ, paj qui tsun tupuj jụjjisinꞌ." 20Anicdye meꞌ muꞌ Jenꞌ vaꞌcacsequi muꞌin judío in ĉaĉaij na jam anicyi in, miꞌin na jụjjinactyiꞌ Jenꞌ q̂uinꞌ, ĉaĉaij na miꞌin anicyi muꞌcheꞌ. Areꞌĉa miꞌin, jam raꞌ vaꞌbunyi fibiꞌyi miꞌin, jemoñeꞌ irijyimꞌ Jenꞌcheꞌ miꞌin. 21Jeshaꞌ muꞌ Jenꞌ jam junꞌ c̣honchucsi muꞌin judío jiquej in, meꞌ tsanꞌ muꞌin jeñej buꞌyi anicsis cätidyes dacaꞌ in, vaꞌcacsequi qui namꞌ mọmoꞌ. Meꞌjeyacsi muꞌin in, chidamꞌ miꞌin u jam judío miꞌin, muꞌ raꞌ jam junꞌ c̣honchunac miꞌin, jam anicjetinte Jenꞌ jụijyaꞌ miꞌin. 22Ọij jiꞌchäquiyisinꞌ Jenꞌ anic jämꞌyity, tsäquiꞌ qui namꞌ muꞌ, muꞌ soꞌmacsi vaꞌtacdyeꞌ, tyi chuc juchaijtyiꞌ jụijyaꞌ in muꞌ raꞌ vaꞌtacdyeꞌ soꞌmacsi. Muꞌ jämꞌjinac miꞌin jam judío miꞌin, yejĉoij ĉúti jụijyaꞌ muꞌcheꞌ miꞌin jämꞌyitycheꞌ Jenꞌ. Jam meꞌ jụijyaꞌ miꞌin, muꞌ raꞌ vaꞌquicnac miꞌin, jeñejjinac raꞌ tätstacsiꞌ dacaꞌ, meꞌjinac raꞌ. 23Chimeꞌdye muꞌin judío in camanꞌ anicjebajte Jenꞌ jụijyaꞌ in, cuvij raꞌ jụjjeyacseban muꞌ, muꞌ tupuj peiꞌtacseban anicsischeꞌ cätidyeꞌ, meꞌ buꞌyi raꞌ muꞌin shuban in. 24Yụ yi miꞌin jam judío miꞌin jeñej buꞌyity tsanꞌ yiris dacaꞌ jam anicsis peiꞌtacsiꞌ anicsischeꞌ cätidyeꞌ orivo, jam na tsanꞌ meꞌ mọꞌ yicdyeꞌ muntyis muꞌin paj qui joꞌmes dacaꞌ peiꞌtac anicsischeꞌ. Dadamꞌ muꞌin judío in jeñej buꞌyity anicsis dacaꞌ in, mijam raꞌ carij paj qui peiꞌtac jubanꞌ anicsischeꞌ cätidyeꞌ in. Meꞌdye muꞌ chimeꞌ Jenꞌ jam carij muꞌdyes paj qui jụjjeyacseban muꞌin judío in.
C̣hoñi raꞌ in Israeltyiꞌ vóshiꞌ in
25Vojity, yụ mạꞌjeꞌ jịꞌchiqueyeyac ọij dyijyedyeꞌ Jenꞌsiꞌ muꞌ, mọꞌ jam chị́yepjas jiquej muntyiꞌ tsun. Yụ mạꞌjeꞌ paj qui mọꞌ chị́yeptinte miꞌin paj qui jam vaꞌbunyedyeꞌtum yi miꞌin: "Tsun anic dyijyedyeꞌtumtyiꞌ." Ọij Jenꞌsiꞌ dyijyedyeꞌ yiꞌ, muꞌin judío in jam raꞌ räjĉan yäcäj buꞌyi ĉojtyiꞌ muꞌin. Junꞌ quiꞌ chuc muꞌin jam judío in aty räj jụjjeteyaꞌ Jenꞌ in, muꞌin tsimꞌtactyiꞌ in, 26chat qui raꞌ q̂uinꞌdyemꞌ raꞌ c̣hoñi muꞌin Israeltyiꞌ vóshiꞌ in. Mọꞌdye p̂eyeꞌ sánacdyeꞌ yiꞌ:
"Siónĉantyiꞌ raꞌ atsij muꞌ Jiꞌc̣honacsity Muntyiꞌ,
muꞌ raꞌ chutyetacsi juchaj muꞌin Jacobtyiꞌ vóshiꞌ in.
27Yụ raꞌ yụꞌtyeyeyacsi ọij p̂eyacdyeꞌ aty raꞌ c̣hiconꞌjetyetacsi yụ juchaj muꞌin", yiꞌ mọꞌ sánacdyeꞌ.
28Judío in vaꞌcacdyeꞌyaꞌ mọꞌ jämꞌsiꞌ p̂eyacdyeꞌ Jenꞌsiꞌ muꞌ, fáquitity qui Jenꞌtum shupqui in, mọꞌ jämꞌ shupquiꞌ miꞌindyes jam judíodyes miꞌin paj qui ñịbeꞌjinacve muꞌ. Meꞌ tsanꞌ meꞌ muꞌ qui namꞌ Jenꞌ tacaꞌ yejĉoij mạꞌjeyacsi, ĉaĉaij na muꞌin judío in vóshiꞌ muꞌin tashchety tsimꞌtactyiꞌ Jenꞌtyiꞌ muꞌ. 29Mọꞌdyes qui muꞌ Jenꞌ yejĉoij mạꞌjeyacsi muꞌin judío in. Jeshaꞌ tyi chuc soꞌmactyiꞌ Jenꞌyaꞌ, muꞌ raꞌ jam junꞌ jäctac, mijam yocve dyijyi muꞌincheꞌ in tsimꞌtactyiꞌcheꞌ muꞌ. 30Miꞌin na jam judío miꞌin, jam chiquetinte Jenꞌ jiquej miꞌin, q̂uinꞌ qui namꞌ Jenꞌ ñịbeꞌ ĉúnac, ĉaĉaij na muꞌin judío in jam chiquete Jenꞌ in. 31Meꞌdye q̂uinꞌ muꞌin judío in jam chiquete in, paj qui muꞌ Jenꞌ ñịbeꞌ ĉúnac jam judío miꞌin, meꞌ shupquiꞌ mọꞌ. Meꞌdye raꞌ chimeꞌ, yirisĉan raꞌ mạyedyeꞌ Jenꞌ raꞌ ñịbeꞌ ĉọcseban muꞌin judío chimeꞌ in. 32Mọꞌdyes qui räj muntyiꞌ in jam chiqueptety in Jenꞌsiꞌ p̂eyacdyeꞌ muꞌ, muꞌ yi paj qui mọꞌ jeñej buꞌyiꞌ jiꞌĉärꞌtacsis, meꞌ mọꞌ jiꞌshupcacsiꞌ, paj qui muꞌ ñịbeꞌ ĉọcseban räj in, judío in judyeyaꞌ jam judío in.
Timaꞌcacdyes Jenꞌ
33¡Anic jiyiꞌ där ñịbeꞌjeyacsity muꞌ Jenꞌ! Anic mujuꞌchaꞌ chimeꞌ dyijyedyeꞌtumtyiꞌ judyeyaꞌ chị́dyeꞌtumtyiꞌ, mijam ọ́yamꞌ junꞌdyemꞌ tupuj chaꞌshepja dyijyedyeꞌ muꞌsimꞌ, mijam tupuj chị́jaꞌ junꞌ chuc muꞌ bäꞌyi. 34Mọꞌdye p̂eyeꞌ sánacdyeꞌ, yiꞌ: "¿Tyi buty tupuj chị́yepte dyijyedyeꞌ Jenꞌsimꞌ? ¿Tyi buty tupuj voroꞌte? Mijam yirity. 35¿Tyi buty tupuj ñịbeꞌjete Jenꞌ paj qui tsanꞌ jiyaꞌdyeyebajte? Mijam yirity." 36Muꞌ räj jedyeꞌ jämꞌtyety, räj tsạꞌchucsi, tas muꞌdyes buꞌyiꞌ. Jam raꞌ yirisĉan mạyedyeꞌ mọtsiꞌ timaꞌcacdyeꞌ muꞌ. ¡Paj meꞌ!
Currently Selected:
Romaĉantyidyes 11: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
