Jị'cavacdye' 22
22
1Anjer jiꞌcaviyin yụ muꞌĉantyiꞌ cojiro anic chintyiꞌ, mọꞌ na ojñiꞌ muꞌ tsạꞌchucsis raꞌ muntyiꞌ in, mọꞌĉan shupquiꞌ bäꞌyaquisĉan Jenꞌsiꞌ muꞌ judyeyaꞌ Oveca buꞌyitysiꞌĉan. 2Mọꞌ ojñiꞌ chidyiꞌĉanyaꞌ caye tyeiꞌ, mọꞌ tashchescheꞌ caye. Ovemun tyeiꞌ cojirove mọꞌ tsạꞌchucsis cätidyeꞌ. Mọꞌin cätidyeꞌ in ịvaj jịjcaiꞌ väshiꞌ in, yiriꞌtac päräꞌ jiyiꞌ quiꞌ yiris yómodyeꞌ väshiꞌ in, meꞌsiꞌ quiꞌ jịjcaiꞌ väshiꞌ in. Mọꞌ na shan mọꞌ räshchucdyes jacchety muntyiꞌ in.#22:2 Génesis 2:9 3Räj jämꞌ buꞌyiꞌ mọꞌcheꞌ, jam jeñej tashchesĉan jac jiquej, mọꞌ cạiꞌsiꞌ vaꞌtacdyeꞌ Jenꞌsiꞌ jiquej muꞌ.#22:3 Génesis 3:17 Mọꞌĉan raꞌ bäꞌyiꞌ bäꞌyaquis Jenꞌsiꞌ muꞌ judyeyaꞌ Oveca buꞌyitysiꞌ, muꞌĉan raꞌ ayoꞌbuꞌyi in. Ĉụiꞌtyiꞌ ramꞌ úñity muꞌ timaꞌquete in. 4Muꞌin raꞌ vejyaꞌ cạvete in, vaj vejti raꞌ muꞌtum in, tịj raꞌ muꞌ meꞌchupte jáficheꞌ muꞌin. 5Aty raꞌ jam quivij cạvebanꞌ tsedyedyeꞌ in, mijam raꞌ jemonac mạijyis mọꞌcheꞌ mijam raꞌ mạijquedyeꞌ tsunsimꞌ, muꞌ Jenꞌ Ayoꞌ tsun muꞌ ramꞌ mạij buꞌyi muꞌindyes in. Chat qui raꞌ muꞌin yụꞌtac in ayoꞌbuꞌyi in mijam raꞌ jụꞌñisĉan mạyedyeꞌ mọtsiꞌ ayoꞌbuꞌyedyeꞌ muꞌin.
Aty c̣hẹiꞌyaꞌ ayidyemꞌ Jesucristos
6Yi anjer jin yụ:
—Ọij p̂eyacdyeꞌ q̂uinꞌ anicsis, anic raꞌ cạ̈tsiꞌ mọꞌ. Jenꞌ Ayoꞌ tsun muꞌ soꞌmacsity p̂eyacdyeꞌ jutactyiꞌ muꞌ Ạꞌedyeꞌyaꞌ muꞌ, muꞌdyemꞌ jutaqui anjer muꞌ paj qui muꞌ jịꞌcaveyacsi úñity muꞌ junꞌ chuc raꞌ jiyiꞌ cavintum yocsiꞌ mạyedyeꞌ, jụꞌñisĉan raꞌ ĉụiꞌ mạyedyeꞌ cạ̈tsiꞌ —yi muꞌ anjer.
7Yi Jesús:
—¡Seꞌvaĉamꞌ, atoꞌ o c̣hẹiꞌyaꞌ ayidyeꞌ yụ! ¡Där raꞌ maꞌjoij in tyi chuc chiqueꞌtyiꞌ in ọij p̂eyacdyeꞌ yụꞌtyes yụ, mọꞌ sánacsiꞌ ọ́cheꞌ! —yi Jesús.
8Yụ Juan, yụ nash cạveꞌ räj ọij jiꞌcavitidyeꞌ judyeyaꞌ yụ́dye ọij seꞌveꞌ p̂eyacdyeꞌ, mọꞌ sánacsiij ọ́cheꞌ. Aty räj cạveꞌyaꞌ yụ judyeyaꞌ seꞌveꞌ yụ, chat qui meꞌĉandye dyụtsyi tsanꞌ yụ anjersiꞌyaꞌ vej muꞌ, muꞌ jiꞌcaviyintyiꞌ yụ, timaꞌquete raꞌ tsanꞌ ĉúti yụ. 9Muꞌ na yi jin yụ:
—Jam raꞌ meꞌ mi ĉaĉaij nash yụ úñity Jenꞌtyiꞌ muꞌ chimeꞌ, yojdyemꞌ mi u judyeyaꞌ vojity mi, muꞌin jasoꞌmitity p̂eyacdyeꞌ Jenꞌ in judyeyaꞌ muꞌin chiqueꞌtyiꞌ ọij sánacdyeꞌ in, meꞌdye yụ chimeꞌ. Jenꞌ mọmoꞌ timaꞌqueme —yi jin yụ.
10Chimeꞌdye yi jin yụ:
—Jam raꞌ caminve yụꞌtyem ọij sánacdyeꞌ q̂uinꞌ, ĉaĉaij na aty c̣hẹiꞌyaꞌ tupudyemꞌ cạ̈tsiꞌ raꞌ mọꞌ p̂eyacdyeꞌ sánacsiꞌ ọ́cheꞌ. 11Jeshaꞌ muꞌin jam rụij bäꞌyity in paj meꞌdye bäꞌyi jam rụij in, judyeyaꞌ muꞌin ac̣hiꞌyity in, paj meꞌdye bäꞌyi in. Muꞌin na jämꞌyity in, tupuj yejĉoij mọmoꞌ meꞌ jämꞌyi bäꞌyi in, judyeyaꞌ muꞌin Jenꞌdyety in tupuj yejĉoij mọmoꞌ meꞌ cäc̣häꞌchute in —yi jin yụ.
12Yi muꞌ Jesús:
—Seꞌvaĉamꞌ aty c̣hẹiꞌyaꞌ ayidyeꞌ yụ, yụ raꞌ soꞌmacsi muntyiꞌ in junꞌ chuc bäꞌyi jaccheꞌ jiquej in, areꞌ bijodyeꞌ soꞌmac in, areꞌ vaꞌtacdyeꞌ. 13Yụ nash Tashchety judyeyaꞌ Jäquity, tashcheꞌ jiquej tạꞌcaty yụ, judyeyaꞌ jadyiquis raꞌ tupudyeꞌ yejĉoij raꞌ yụ —yi muꞌ.
14Där raꞌ maꞌjoij in tyi chuc puptactyiꞌ coftyity in, muꞌin ramꞌ soꞌmac in paj qui jebeiꞌ in mọꞌsiꞌ väsh tsạꞌchucsis cätidyeꞌ, judyeyaꞌ raꞌ chimeꞌ soꞌmac in paj qui siteꞌ in mọꞌ bäꞌyedyeꞌ. 15Muꞌin ac̣hiꞌyity in jorojyaꞌ raꞌ jiꞌyajcati in, judyeyaꞌ muꞌin cọcojsiꞌnaquity in judyeyaꞌ voꞌvoijtyiꞌ in judyeyaꞌ ijacsity in judyeyaꞌ jämꞌtacdyeꞌ jenꞌtuiꞌtyiꞌ in judyeyaꞌ muꞌin maꞌjotyety väñädyeꞌ in, muꞌindye väñädyeꞌyaꞌ carijtaquity in, joꞌmemety raꞌ in jam damꞌ siteꞌ in mọꞌ bäꞌyedyeꞌ.
16—Yụ nash Jesús, yụ nash juteyeyac miꞌin anjer yụ paj qui ọij p̂eyacdyeꞌ q̂uinꞌ muꞌ jiꞌchäquiyinac miꞌin yojyojdyemꞌ ñuruꞌtyity yụ́tyiꞌ u miꞌin. Yụ nash Davidtyiꞌ vóshiꞌ muꞌ, yụ nash jeñej buꞌyi pashyity ọ́rotaꞌ nạijjodyeꞌ tuiꞌtyiꞌ, meꞌ buꞌyi yụ.
17Jenꞌsiꞌ Ạꞌedyeꞌ muꞌ vaj cäts Jesústyiꞌtum muntyiꞌ muꞌ, muꞌin nash Ovecas buꞌyi p̂en in, mọꞌ vämis raꞌ muꞌcheꞌ, muꞌin yi jéte in:
—¡Atsiva!
Tyi chuc seꞌvacsebi p̂eyacdyeꞌ mọꞌin, paj muꞌin yi chimeꞌ in:
—¡Atsiva!
Tyi chuc jajri jụijyaꞌ in, tyi chuc mạꞌjeꞌ ñịbeꞌjeyac jụijyaꞌ in, paj atsij fibiꞌyaꞌ raꞌ tyeij in mọꞌ ojñiꞌ tsạꞌchucsis.
Jadyiquis p̂eyacdyeꞌ Juansiꞌ muꞌ
18Yụ fercheꞌ jéyacsi muꞌin seꞌvety in ọij p̂eyacdyeꞌ yụꞌtyes Jenꞌ, sánacsiꞌ ọ́cheꞌ: tyi chuc ĉụiꞌ mọmoꞌ cächjecajcaiꞌtyiꞌ yocsiꞌ p̂eyacdyeꞌ jụijyaꞌ, jam yódyesdyemꞌ sánacsiꞌ q̂uinꞌ o, chimeꞌjeyacsidye raꞌ muꞌ Jenꞌ cächjeyeyacsi ọij vaꞌtacdyeꞌ jiꞌjäques q̂uinꞌ ọij sánacdyeꞌ. 19Chimeꞌ tyi chuc jäctyetyeꞌ jụijyaꞌ pạrej jiꞌchäyitidyeꞌ ọ́ches p̂eyacdyeꞌ yụꞌtyes Jenꞌ, muꞌin meꞌjeꞌtyiꞌ in, Jenꞌ raꞌ chutyetacsi mọꞌsiꞌ väsh tsạꞌchucsis cätidyeꞌ, mijam raꞌ jiꞌsitacsi chimeꞌ Jenꞌsiꞌĉan bäꞌyedyeꞌ muꞌ, mọꞌ jiꞌjäqueꞌsiꞌ ọij q̂uinꞌ sánacdyeꞌ.
20Jesucristo muꞌ jịꞌchiqueyacsity ọij p̂eyacdyeꞌ q̂uinꞌ yi muꞌ:
—Anicdye meꞌ aty c̣hẹiꞌyaꞌ ayidyeꞌ yụ.
Yụ sáñeꞌtyiꞌ ọij yi:
Paj meꞌ. Atsivamꞌ Jesús Ayoꞌ tsun.
21Yụ cọdyete muꞌ Jenꞌ paj qui muꞌ Jesucristo Ayoꞌ tsun ñịbeꞌjitidyes soꞌminac räj miꞌin.
Currently Selected:
Jị'cavacdye' 22: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
