Proverbios 7
7
Mọꞌ rụijsis dyijyedyeꞌ ñutschusinꞌ juchajyaꞌ
1Ạvaꞌ, jämꞌ raꞌ seꞌvibutiꞌ mi ọij p̂eyacdyeꞌ soꞌmeyes yụ,
mọꞌ raꞌ jiꞌsiteꞌ mi ĉojtyiꞌĉan.
2Chiquevaꞌ ọij jutacdyeꞌ jéyes yụ paj qui mọꞌ tsạꞌchun.
Mọꞌ yụꞌtacdyeꞌ anic mọjoꞌchaꞌ yaꞌiꞌ,
yojdyemꞌ jämꞌ ĉujcati vejyaꞌ u mi,
meꞌdye raꞌ mọꞌ chiqueꞌ mi mọꞌ yụꞌtacdyeꞌ.
3Jam raꞌ damꞌ farajjeꞌ mi ọij jiꞌchäyitidyeꞌ,
jeñej buꞌyiꞌ aty sánac ĉojtyiꞌĉan mi judyeyaꞌ aty panac un mi,
meꞌ raꞌ jam farajjeꞌ mi dyijyedyeꞌĉan.
4Meꞌ raꞌ dyijtuiꞌ mi mọꞌ rụijsis dyijyedyeꞌ,
paj qui mọꞌ jeñej buꞌyiꞌ vojiꞌ shupquiꞌ mi,
judyeyaꞌ mọꞌ rụijsis chị́dyeꞌ paj qui mọꞌ jeñej buꞌyiꞌ ĉụiꞌsiꞌ chätidyeꞌ mi,
meꞌ raꞌ räjĉan dyijtuiꞌ mọꞌ mi.
5Meꞌ raꞌ mi paj qui mọꞌ rụijsis dyijyedyeꞌ ñutschun mi paj qui jam voꞌvoij mi,
paj qui jam jụjjebiꞌ mi mọꞌsiꞌ jiꞌmaꞌyacdyes p̂eyacdyeꞌ mọꞌ.
Junꞌ chuc carijtaquiꞌ mọꞌ voꞌvoiꞌsiꞌ p̂en
6-7Yirisĉan mạyedyeꞌ acaꞌĉan bäꞌvaꞌjoij yụ.
Ĉụiꞌdye ventanayaꞌ nạijte yụ yirity nanaty,
anic itŝity dyijyedyeꞌ.
8Cayeĉan tyeij judyeyaꞌ chaꞌshebiꞌ dochtidyeꞌ cayes mọꞌ,
yóyaꞌdyemꞌ bäꞌyiꞌ mọꞌ meꞌsis p̂en o.
9Jurumyejoiꞌ shupqui sóbaqui muꞌ nanaty,
aty raꞌ tomajyejoiꞌ, muꞌyaꞌ muꞌ tyeij jiyi.
10Repjeĉunꞌte vatyquej mọꞌ p̂en,
täcñityĉan quịꞌsiꞌ mọꞌ, joꞌmetyĉan meꞌtaquiꞌ,
aꞌc̣histum ĉojtyiꞌĉansiꞌ dyijyedyeꞌ ayij mọꞌ.
11Ọyaꞌquiꞌdyiꞌ mijam chicacsiꞌ mọꞌ,
chimeꞌdye jam p̂utscuiꞌ.
12Meꞌ meꞌ natiꞌ,
prasayaꞌ jịjcaiꞌ räj caye socorꞌjeꞌ chimeꞌ bisacsiꞌ joꞌmeiꞌve sonꞌ in.
13Nạijte mọmoꞌ noq̂uenꞌ tŝọ́tyete judyeyaꞌ pụꞌsete,
14Mijam tsị́caiꞌ. Jéte:
"Q̂uinꞌ aty jiꞌcoꞌshayeꞌ yụ cuꞌdyeꞌ Jenꞌdyes,
yoj yiꞌdyemꞌ Jenꞌsiꞌ p̂eyacdyeꞌ um,
aty mọꞌyaꞌ shush yụ́sĉan acaꞌ,
mọꞌ raꞌ jebejaꞌ.
15Meꞌdyes ayij yụ, mi ĉọshye, rụijdye dạquishye.
16Aty jubiiꞌ yụ, muꞌ p̂urꞌtyity yụ lino,
anic yaꞌijtyiꞌ, Egiptoĉan jämity muꞌ.
17Jibij yụꞌtyeyete yụ jẹrejres,
mọꞌsiꞌ tịj jẹrejressiꞌ mọꞌin mirra,
judyeyaꞌ áloe judyeyaꞌ canela.
18Acatubajshaꞌ, yụ́tum raꞌ ĉọshi mi,
dyutsenꞌjejaꞌ raꞌ q̂uinꞌ tsedyedyeꞌ maꞌjojaꞌ yiriꞌyaꞌ.
19Anꞌdyemꞌ itŝij vämtyiꞌ yụ,
aty sacti muꞌ,
moch jịjcaij nati muꞌ,
20daiꞌ cạqui querec̣ha yirity obota mendye raꞌ muꞌve tyäpi,
dyuts raꞌ ịvaj, q̂uinꞌdyemꞌ ca raꞌ muꞌ caꞌñibun,
meꞌ yiꞌ mọꞌ p̂eyaqui aꞌc̣histumsiꞌ dyijyedyeꞌ mọꞌ p̂en,
jéte muꞌ nanaty jiꞌmaꞌyete.
21Joꞌmesyaꞌ seꞌ jaꞌyete ạꞌnisyaꞌ p̂eyacdyeꞌ mọꞌ.
Aniꞌ aniꞌ yiꞌ p̂eyaquiꞌ mọꞌ meꞌĉandye seꞌ jaꞌyete muꞌ nanaty.
22Yiristum mọmoꞌ muꞌ cäc̣häꞌchuiꞌ mọꞌ p̂en.
Jeñej yirity vóye cäc̣häꞌchute muꞌ muntyiꞌ bijodyeꞌve jịjcaijtyiꞌ,
meꞌ buꞌyi muꞌ nanaty cäc̣häꞌchuiꞌ mọꞌ p̂en.
Jeñej yiris báchona quepyisĉan tŝọiꞌsiꞌ,
23ĉojtyiꞌyaꞌ chipjeyac, meꞌ buꞌyiꞌ shupqui muꞌ nanaty.
Yojdyemꞌ yiris jaijtyiꞌ sạjiꞌcheꞌ tŝọiꞌsiꞌ mijam chịꞌ junꞌ chuc raꞌ säñiꞌ,
meꞌ raꞌ muꞌ chimeꞌ muꞌ nanaty jam chịj junꞌ chuc raꞌ ñịbedyes jịꞌĉojtyeꞌ muꞌ.
24Mọꞌdyes ạvaꞌ, jämꞌ raꞌ seꞌvibutim p̂eyacdyeꞌ yụ.
25Jam raꞌ jeijmuñi ĉojtyiꞌĉan mi jämꞌsiꞌyaꞌ dyijyedyeꞌ,
mijam raꞌ cäc̣häꞌchubiꞌ majmi mi mọꞌsimꞌ,
mijam raꞌ cäc̣häꞌchubiꞌ chimem dyijyedyeꞌ mọꞌ.
26Daiꞌ mọꞌ jiꞌpenacsiꞌ mọꞌ meꞌsis p̂en,
daiꞌ sänꞌdyeꞌĉan yụꞌtacsiꞌ mọꞌ,
27muꞌin ĉọcbity acaꞌ in tŝijĉandyety raꞌ in.
Currently Selected:
Proverbios 7: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
