Filiposĉantyidyes 3
3
Jenꞌ rụij yuꞌsinꞌ anicyedyeꞌyaꞌ tsun
1Vojity, yụ raꞌ q̂uinꞌ jéyac, maꞌjojamꞌ bäꞌjamꞌ miꞌin ĉaĉaij na Ayoty aty miꞌin. Meꞌ raꞌ tsanꞌ aty jéyac miꞌin sánacdyeꞌcheꞌ jiquej ọij jiꞌchäyitidyeꞌ yụ, jam qui namꞌ shọijtyeꞌ jịjcaiꞌ yụ, quivij raꞌ jébadyeyac mọꞌdye ĉaĉaij na miꞌin anic jemontiñeꞌ mọꞌ p̂eyacdyeꞌ. 2Mọꞌdyes yụ yi, areꞌĉa jiꞌpennac in muꞌin cäjsis tuiꞌtyiꞌ jiꞌchäyitidyeꞌ in, muꞌin anic fer dyijtuiꞌtyiꞌ seiꞌtacdyeꞌ in. Muꞌin där ac̣hiꞌtyity in, jeñejtyity ac̣huj in. 3Muꞌin yi in: "Tsun anictyity Jenꞌtyiꞌ ạvaꞌ muꞌ ĉaĉaij na seiꞌtactyiꞌ aꞌ tsun", yi in. Jam na meꞌ, tsun nash anictyity ạvaꞌ muꞌ ĉaĉaij na tsun anictyity timaꞌquejaty Jenꞌ, Ạꞌedyeꞌyaꞌ muꞌ timaꞌqueja tsun judyeyaꞌ maꞌjodyeꞌtum bäꞌjaꞌ tsun ĉaĉaij na Jesucristoty tsun. Meꞌ tsun jeñej anictyity seiꞌtactyiꞌ aꞌ tsun, meꞌ shupquejaꞌ tsun. Chimeꞌdye tsun jam ĉútiĉaꞌ ĉụiꞌsiꞌcheꞌ dyijyedyeꞌ tsun, mijam yicdyeꞌcheꞌ tsun. 4Anic meꞌ, muꞌyaꞌ muntyiꞌ in ĉụiꞌsiꞌcheꞌ dyijyedyeꞌ ĉúti in. Mạꞌjeꞌ jụijyaꞌ yụ chimeꞌ, a vuty dadamꞌ mujuꞌchaꞌ tupuj ĉụiꞌsiꞌcheꞌ dyijyedyeꞌ ĉúti yụ, paj qui tsanꞌ c̣hoñi yụ, 5ĉaĉaij nash yụ anictyity hebreo naꞌi yụ, räj vóshiꞌvun yụ hebreo jiquej in, meꞌdyes qui q̂uenꞌĉan mạyedyeꞌ tyiti jiquej yụ seiꞌbun aꞌ yụ in. Yụ nash anictyity Israeltyiꞌ vóshiꞌ yụ, Benjamínĉantyiꞌ ñuruꞌtyity yụ. Anic mọjoꞌchaꞌ fer cäc̣häꞌchuiꞌtyiꞌ yụ mọꞌ yụꞌtacdyeꞌ, ĉaĉaij na fariseoĉantyiꞌ ñuruꞌtyity yụ. 6Cäc̣häꞌchucdyeꞌyaꞌ yụ mọꞌ jiꞌchäyitidyeꞌ tsun, yụ dadamꞌ meij jịjcaij jịꞌñibeꞌcacsi jiquej yụ muꞌin Jesucristoty ñuruꞌtyity in. #3:6 Úñedyeꞌ 8:3 Anic mọjoꞌchaꞌ chiqueꞌ yụ mọꞌ yụꞌtacdyeꞌ, mijam yiris vaꞌ jiꞌchäyitidyeꞌ jiquej yụ, meꞌ ĉúti yụ, anic rụij bäꞌyi ĉúti yụ. 7Q̂uinꞌ qui namꞌ jam joꞌmes maꞌjotyeꞌ yụ, räj ọij vaꞌbunyi yuꞌtyinsiꞌ jiquej yụ, q̂uinꞌ aty chịj yụ mọꞌ anic fibis shupquiꞌ jiquej Cristosyaꞌ vej muꞌ, mọꞌ jam tupuj jiꞌc̣hoñin yụ. 8Anicdye meꞌ, meꞌ tsanꞌ anictyity hebreo naꞌi yụ, meꞌ tsanꞌ rụij bäꞌyity jiquej yụ, paj qui tsanꞌ rụij yụꞌtac Jenꞌyaꞌ yụ, meꞌ ĉúti yụ, q̂uinꞌ qui namꞌ anic fibis mọꞌ ĉọiꞌ yụ, ĉaĉaij na aty chịj yụ jam mọꞌ mọmoꞌ meꞌ, räj junꞌ chuc bäꞌyi yụ jiquej, junꞌ chuc dyijyi yụ, räj mọꞌ joꞌmemes fibis ĉọiꞌ yụ. Meꞌdye yiris mọmoꞌ dyijtuiꞌ yụ, dadamꞌ mọjoꞌchaꞌ mạꞌjeꞌ yụ paj qui rụij chị́yete yụ muꞌ Cristo Jesús, Ayoꞌ yụ, muꞌ chat mujuꞌchaꞌ yaꞌij, jam jeñej yocsiꞌ jedyeꞌ in, ọyaꞌyaꞌ in. Meꞌdyes farajjeꞌ yụ joꞌmes tashches dyijyedyeꞌ yụ räj, mọꞌ jeñej buꞌyiꞌ patsacdyeꞌ shupquiꞌ yụ́tum, yụ meꞌjeꞌ paj qui muꞌ penꞌdyetun yụ muꞌ Cristo, muꞌ chat mujuꞌchaꞌ yaꞌij. 9Q̂uinꞌ aty Cristoty yụ aty jam ĉụiꞌsiꞌcheꞌ rụijquedyeꞌ ĉúti yụ, junꞌ chuc chiqueꞌ yụ mọꞌ yụꞌtacdyeꞌ, jam mọꞌcheꞌ ĉúti yụ paj qui mọꞌ rụij yuꞌtyin yụ. Muꞌ na Jenꞌ muꞌ rụij yuꞌtyin yụ anicyedyeꞌyaꞌ yụ Cristocheꞌ, muꞌ Jenꞌ vayacjibusinꞌ juchaj tsun anicyedyeꞌyaꞌ tsun. 10Mọmꞌ yiris dyijtuiꞌ yụ paj qui rụij chị́yete yụ muꞌ Cristo, muꞌ vañinyebantyiꞌ jiquej ferdyeꞌyaꞌ muꞌ. Yụ mạꞌjeꞌ paj qui mọꞌdye ferdyeꞌ meꞌchupte yụ carijtacdyeꞌyaꞌ muꞌdyes yụ, judyeyaꞌ mạꞌjeꞌ yụ jịꞌĉojtyeꞌ ñịbedyes muꞌdyes, yojdyemꞌ muꞌ ñịbeꞌ cạveꞌ Jenꞌdyes jiquej u, meꞌdye mạꞌjeꞌ yụ chimeꞌ, meꞌ tsanꞌ säñi yụ carijtacdyedyes yụ Cristodyes, mọꞌ mạꞌjeꞌ yụ. 11Yụ chimeꞌ biseꞌ yụ paj qui yụ meꞌjindye vañinjibun sänꞌdyeꞌĉantyiꞌ yụ, paj qui tsạꞌ buꞌyi yụ muꞌdyes.
Fercheꞌ cäc̣häꞌchupja Jenꞌsiꞌ dyijyedyeꞌ muꞌ
12Yụ na jam tupuj yi: "Aty jam jụꞌñiij yụ, mijam yiris jedyeꞌ jayej yụ", jam meꞌ yi yụ. Yejĉoij qui namꞌ yụ ferdyeꞌyaꞌ yuꞌti yụ mạꞌjeꞌ jịꞌcäts yụꞌtyepte yụ mọꞌ dyijyedyeꞌ Jenꞌsiꞌ muꞌ, mọꞌ soꞌminsiꞌ yụ muꞌ Cristo Jesús, ĉaĉaij na meꞌdyes muꞌ jiꞌc̣hoñin yụ jiquej. 13Vojity, yụ jam yi yụ: "Atyuꞌ u räj jịꞌcätsepte yụ Jenꞌsiꞌ dyijyedyeꞌ muꞌ", meꞌdye yiris mọmoꞌ jedyeꞌ dyijtuiꞌ yụ, aty mạꞌjeꞌ farajjeꞌ dyijtucdyeꞌ yụ junꞌ buꞌyi chuc jiquej yụ, meꞌ tsanꞌ jämꞌ carijtaqui yụ jiquej, meꞌ tsanꞌ jam. Q̂uinꞌ qui namꞌ yụ ferdyeꞌyaꞌ yuꞌti paj qui jịꞌcätsepte yụ Jenꞌsiꞌ dyijyedyeꞌ muꞌ, räj junꞌ chuc raꞌ muꞌ meꞌ mạꞌjeꞌ yụ́dyes. 14Jeñej yirity majmaijtyiꞌ muntyiꞌ chụiꞌ p̂iqui paj qui bijodyeꞌ soꞌmac, meꞌdye yụ chimeꞌ meꞌ buꞌyi yuꞌti yụ carijtaqui Jenꞌdyes yụ, mọmꞌ dyijtuiꞌ yụ mọꞌ bijodyeꞌ soꞌminsiꞌ raꞌ yụ muꞌ Cristo Jesús, aty raꞌ Jenꞌyaꞌ shupquequiyaꞌ yụ, muꞌ fayintyiꞌ yụ.
15Räj tsun fer buꞌjaty Jenꞌdyes jemoñeꞌ meꞌ dyijyejaꞌ tsun, ferdyeꞌ yụꞌtaĉaꞌ paj qui Jenꞌdyes bäꞌjaꞌ tsun. Jam meꞌ dyijyi jụijyaꞌ miꞌin, Jenꞌ raꞌ jorojĉanjiyinac cäjsis dyijyedyeꞌ miꞌin. 16Mọꞌdyes jemoñeꞌ yejĉojaꞌ mọꞌ jiꞌchäyitidyeꞌ cạjaꞌ yojdyesdyemꞌ cäc̣häꞌchujaꞌsiꞌ q̂uinꞌ u.
17Vojity, cäc̣häꞌchubutiĉamꞌ yụs dyijyedyeꞌ.#3:17 Tashches Corintoĉantyidyes 11:1 Seꞌvacsebijamꞌ p̂eyacdyeꞌ chimeꞌ miꞌin muꞌin cäc̣häꞌchubuntyiꞌ tsunsiꞌ dyijyedyeꞌ in. 18Aty daiꞌ quiꞌ jéyac yụ, q̂uinꞌ quivij jéyac raꞌ yụ táredyeꞌtum: daiꞌ muꞌyaꞌ cäj cạptety in Jenꞌsiꞌ p̂eyacdyeꞌ muꞌ, judyeyaꞌ ac̣hiꞌ bäꞌyity in. Muꞌin meꞌtyity in fibis yụꞌbitety in Cristos sänꞌdyeꞌ croshcheꞌ jiquej, jeñej fạ́quetety in shupqui in. 19Muꞌin meꞌtyity in tsäquiꞌsisĉandyety raꞌ in, ĉaĉaij na mọmoꞌ jenꞌtuiꞌ in aꞌc̣his dyijyedyeꞌ aꞌsiꞌ muꞌin. Tsịcaꞌyis jedyeꞌ mọmꞌ maꞌjotyeꞌ in judyeyaꞌ shejvintuiꞌ in, jacches jedyeꞌ mọmꞌ dyijtuiꞌ in. 20Tsun na jam meꞌ, mạyedyeꞌchedyety, muꞌchety raꞌ atsijban muꞌ Jiꞌc̣honsinꞌtyiꞌ tsun, muꞌ bisvaꞌquejaty q̂uinꞌ tsun, muꞌ nash Jesucristo Ayoꞌ tsun. 21Muꞌ raꞌ yoc yuꞌbusinꞌ ọij sänꞌdyes aꞌ q̂uinꞌ tsun, dadamꞌ qui raꞌ jämꞌsiꞌ yuꞌbusinꞌ aꞌ tsun, yódyesdyemꞌ muꞌsiꞌ aꞌ umꞌ, joꞌmesdye qui raꞌ tsunsiꞌ chimeꞌ, ĉụiꞌsiꞌyaꞌ raꞌ ferdyeꞌ muꞌ yoc yuꞌbusinꞌ aꞌ tsun. Jeshaꞌ muꞌ Cristo ĉụiꞌsiꞌyaꞌ ferdyeꞌ muꞌ räjdyes ayoꞌbuꞌyi, mọꞌyaꞌdye raꞌ ferdyeꞌyaꞌ muꞌ yoc yuꞌbusinꞌ aꞌ tsun.
Currently Selected:
Filiposĉantyidyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
