Mateos 23

Aꞌc̣his dyijyedyeꞌ fariseos muꞌin judyeyaꞌ jịꞌchiyacsitysiꞌ yụꞌtacdyeꞌ in

(Mar 12:38-40; Luc 11:37-54; 20:45-47)

1Aty meꞌsiꞌ muꞌ Jesús jéyacsi jịꞌchiyactyiꞌ muꞌ räjenꞌdye muꞌyaꞌ in yi muꞌ:

2—Muꞌin jịꞌchiyacsity yụꞌtacdyeꞌ in judyeyaꞌ muꞌin fariseo in, muꞌin yụꞌtac in paj qui jịꞌchiyacsity in mọꞌ yụꞌtacdyeꞌ Jenꞌsiꞌ muꞌ jasoꞌmitis muꞌ Moisés jiquej. 3Yụ jéyac, tupuj seꞌvacsebi miꞌin muꞌinsiꞌ jiꞌchäyitidyeꞌ muꞌin, junꞌ chuc jínac in, jam qui na ramꞌ cäc̣häꞌchucsebi dyijyedyeꞌ miꞌin, junꞌ chuc bäꞌyi muꞌin in, muꞌin vaꞌve bäꞌyi in, jam cäc̣häꞌchuqui ĉụiꞌsiꞌ jiꞌchäyitidyeꞌ muꞌin. 4Anic carijsis jämꞌtyeꞌ jiꞌchäyitidyeꞌ in, judyeyaꞌ jéyacsi muntyiꞌ in paj qui tas chiqueꞌve in, jeñej jiyiꞌ javquis jiꞌveyecsis in, mijam qui namꞌ damꞌ nọ́tyetacsi in paj qui chiqueꞌve in. 5Meꞌ tsanꞌ jämꞌ carijtacdyeꞌ Jenꞌdyes muꞌin, mọꞌ mọmoꞌ muꞌin mạꞌjeꞌ in paj qui timaꞌcacsi muntyiꞌ in. Meꞌdyes qui vaꞌbunyi in, yụꞌtaqui ĉụiꞌ sánacdyeꞌ Jenꞌsiꞌ in jáficheꞌ muꞌin judyeyaꞌ unyaꞌ muꞌin, judyeyaꞌ moc̣has minacdyeꞌ yụꞌtaqui quịꞌsiꞌcheꞌ muꞌin paj qui timaꞌcacsive muntyiꞌ in.#23:5 Ọij minacdyeꞌ jịꞌĉocdyes in paj qui dyijtute Jenꞌ in. 6Chimeꞌdye muꞌin fer mạꞌjeꞌ bäꞌyi in mọꞌ mọjoꞌchascheꞌ bäꞌyaquis feshtadyes, judyeyaꞌ tashchescheꞌ bäꞌyaquis vajmuꞌyadyeꞌĉansiꞌ. 7Chimeꞌ muꞌin fer mạꞌjeꞌ in paj qui muntyiꞌ in jämꞌjeĉunacsi cayeĉan in judyeyaꞌ chimeꞌ paj qui jämꞌyedyeꞌtum vorjeyacsi in, judyeyaꞌ paj qui jéyacsi muntyiꞌ in: "Mi nash jịꞌchiyacsity."

8Miꞌin na raꞌ jam meꞌ, paj yoctyiꞌ in jam jínac in: "Mi jịꞌchiyacsity", ĉaĉaij na yirity mọmoꞌ muꞌyaꞌ anictyity Jịꞌchiyacsity miꞌin, mọꞌdyes miꞌin vojity buꞌyi miꞌin. 9Chimeꞌdye jam raꞌ yụꞌtinte jacchety muntyiꞌ paj qui jenꞌ buꞌyi miꞌindyes, ĉaĉaij na yirity mọmoꞌ Jenꞌ miꞌin, mạyedyeꞌchety. 10Chimeꞌdye paj jam jínac in: "Mi nash ayoꞌ tsun", yụ Jiꞌc̣honacsity Muntyiꞌ yụmꞌ yirity ayoꞌ miꞌin. 11Jụꞌñity chuc mạꞌjeꞌ mujuꞌchaꞌ buꞌyi miꞌindyes, jemoñeꞌ nọ́taquity yuꞌti yoctyidyes miꞌin. 12Jụꞌñity chuc mujuꞌchaꞌ yuꞌtity, muꞌ raꞌ Jenꞌ uyaꞌyaꞌ jayuꞌti, jụꞌñity chuc uyaꞌyaꞌ yuꞌtity, muꞌ raꞌ Jenꞌ mujuꞌchaꞌ jayuꞌti.

Fariseo in ac̣hiꞌ dyijyity in, jämꞌ yuꞌti tsanꞌ in

13-14Fer raꞌ ñịbeꞌ cạvetiñeꞌ miꞌin jịꞌchiyacsity yụꞌtacdyeꞌ miꞌin judyeyaꞌ miꞌin fariseo, anic ac̣hiꞌ dyijyity miꞌin jämꞌ yuꞌti tsanꞌ miꞌin. Miꞌin ĉärꞌjetacsi muntyiꞌ in mọꞌ Jenꞌyas chụiꞌdyeꞌ paj qui jam siti in ayoꞌbuꞌyedyeꞌĉan muꞌ. Mijam ĉụiꞌ siti miꞌin mijam jiꞌsitacsi miꞌin muꞌin mạꞌjeꞌ sitity in.

15Fer raꞌ ñịbeꞌ cạvetiñeꞌ miꞌin jịꞌchiyacsity yụꞌtacdyeꞌ miꞌin judyeyaꞌ miꞌin fariseo, ac̣hiꞌ dyijyity miꞌin, jämꞌ yuꞌti tsanꞌ miꞌin. Anic moch jịjcaij miꞌin, nopej mar jịjcaij miꞌin yocsiꞌve jac, quevacsi muntyiꞌ miꞌin paj qui jụj jaꞌyacsi miꞌin. Meꞌ tsanꞌ yirity mọmoꞌ dạquictinte miꞌin, jụj jaꞌyetinte chijämꞌ judyeyaꞌ jịꞌchiyetinte paj qui cäc̣häꞌchubunac dyijyedyeꞌ miꞌin, yojdyemꞌ miꞌin u meꞌ jiꞌshuptinte muꞌ yojdyemꞌ miꞌin u tŝijĉandyety miꞌin, meꞌdye muꞌ mujuꞌchaꞌ tŝijĉandyety shupqui.

16Fer raꞌ ñịbeꞌ cạvetiñeꞌ miꞌin. Miꞌin jeñej yirity tofety muntyiꞌ tapchute yoctyiꞌ tofety muntyiꞌ. Yi miꞌin jiꞌchäyitidyeꞌĉan: "Yirity muntyiꞌ yụꞌtaquiyaꞌ tsäquiꞌsistumsiꞌ p̂eyacdyeꞌ jụijyaꞌ, jiꞌjäcbite Jenꞌsiꞌ acaꞌ muꞌ jụijyaꞌ paj qui chịj in anicsis p̂eyacdyeꞌ muꞌ, mọꞌ qui namꞌ jam yaꞌimꞌ, jam jemoñeꞌ jịꞌcätsaqui", meꞌ buꞌyi yi miꞌin. "Oro qui namꞌ acaꞌĉantyiꞌ jiꞌjäcte jụijyaꞌ, mọꞌ chat yaꞌimꞌ, mọꞌ chat jemoñeꞌ jịꞌcätsaqui p̂eyacdyeꞌ muꞌ", meꞌ buꞌyiꞌ jịꞌchiyacsi miꞌin. 17¡Itŝiꞌ dyijyedyeꞌ miꞌin jeñej tofety miꞌin! ¿Jam adac chịj miꞌin mọꞌ Jenꞌsiꞌ acaꞌ muꞌ mọjoꞌchaꞌ tsäquiꞌ buꞌyiꞌ, uyaꞌyaꞌ muꞌĉantyiꞌ oro? Ĉaĉaij na mọꞌ Jenꞌsiꞌ acaꞌ muꞌ tsäquiꞌ yụꞌtyeꞌ mọꞌĉansiꞌ jedyeꞌ in. 18Chimeꞌdye jịꞌchiyacsi miꞌin: "Yirity muntyiꞌ jiꞌjäqueꞌ mọꞌ jiꞌcoꞌshayacdyeꞌcheꞌ paj qui chịj in anicsis p̂eyacdyeꞌ muꞌ, mọꞌ jam yaꞌimꞌ, jam jemoñeꞌ jịꞌcätsaqui muꞌ. Mọꞌ qui namꞌ jiꞌjäqueꞌyaꞌ mọꞌches cuꞌdyeꞌ jiꞌcoꞌshayacdyeꞌches, mọꞌ chat q̂uinꞌdyemꞌ yaꞌimꞌ, mọꞌ chat jemoñeꞌ jịꞌcätsaqui p̂eyacdyeꞌ muꞌ", meꞌ buꞌyi yi miꞌin. 19¡Jeñej tofety miꞌin! ¿Jam adac chịj miꞌin mọjoꞌchaꞌ tsäquiꞌ buꞌyiꞌ mọꞌ jiꞌcoꞌshayacdyeꞌcheꞌ Jenꞌdyes, ọyaꞌyaꞌ mọꞌches cuꞌdyeꞌ? Ĉaĉaij na mọꞌ jiꞌcoꞌshayacdyeꞌcheꞌ tsäquiꞌ yụꞌtyeꞌ mọꞌches jedyeꞌ. 20Jụꞌñity ĉụiꞌ jiꞌjäqueꞌ jụijyaꞌ mọꞌ jiꞌcoꞌshayacdyeꞌcheꞌ, räjtumdye jiꞌjäqueꞌ mọꞌches jiꞌcoꞌshayacdyeꞌches. 21Jụꞌñity ĉụiꞌ jiꞌjäcbite Jenꞌsiꞌ acaꞌ muꞌ jụijyaꞌ, jam mọꞌ mọmoꞌ jiꞌjäcbite, aꞌmundye chimeꞌ muꞌĉan bäꞌyity jiꞌjäcte. 22Tyi chuc jiꞌjäqueꞌ mạyedyeꞌches jụijyaꞌ, ayoꞌbuꞌyedyeꞌmundye jiꞌjäcbite Jenꞌsimꞌ, muꞌtumdye ayoꞌbuꞌyi muꞌcheꞌ.

23Fer raꞌ ñịbeꞌ cạvetiñeꞌ miꞌin jịꞌchiyacsity yụꞌtacdyeꞌ miꞌin judyeyaꞌ fariseo miꞌin, anic ac̣hiꞌ dyijyity miꞌin jämꞌ yuꞌti tsanꞌ miꞌin. Miꞌin räj meꞌchutiñes jedyeꞌ mọꞌ pạrejjetiñeꞌ damꞌ Jenꞌdyes, yiriꞌtacĉansiꞌ jedyeꞌ soꞌmetinte, meꞌ tsanꞌ miquis cätidyes shan, mọꞌ chimeꞌ pạrejjetiñeꞌ Jenꞌdyes miꞌin.#23:23 Yiriꞌtacĉansiꞌ jedyeꞌ yiꞌ naposĉan "décima parte" mọꞌ yiꞌ mọꞌyaꞌ yiriꞌtac shan in yiris Jenꞌdyes. Meꞌ tsanꞌ mọꞌ dyijtutiñeꞌ miꞌin, mọꞌ qui namꞌ mọjoꞌchas jiꞌchäyitidyeꞌ yụꞌtacdyes farajjetiñeꞌ miꞌin, junꞌ chuc jemontiñeꞌ rụij bäꞌyi miꞌin judyeyaꞌ ñịbeꞌ ĉọcsity miꞌin judyeyaꞌ jịꞌcätsaquity p̂eyacdyeꞌ miꞌin. Mọꞌin mọjoꞌchaꞌ jemonac in, jam qui na ramꞌ farajjetiñeꞌ mọꞌ ọyaꞌyas yụꞌtacdyeꞌ chimeꞌ. 24Miꞌin jeñejtyity yirity tofety muntyiꞌ tapchute yoctyiꞌ tofety muntyiꞌ, jiꞌmiꞌiti tsanꞌ in. Meꞌ buꞌyi miꞌin, ọyaꞌyas yụꞌtacdyeꞌ chiquetiñeꞌ miꞌin, mọjoꞌchas qui namꞌ yụꞌtacdyeꞌ vaꞌquectiñeꞌ miꞌin, mọꞌ jeñej buꞌyi junꞌ chuc shajsis tyeij miꞌin paj qui jam jedyeꞌ miquis facsetiñeꞌ miꞌin, muꞌ qui namꞌ cameyo jeñej facsetinte miꞌin, meꞌ buꞌyiꞌ dyijyedyeꞌ shupquiꞌ miꞌin.

25Fer raꞌ ñịbeꞌ cạvetiñeꞌ miꞌin jịꞌchiyacsity yụꞌtadyeꞌ miꞌin judyeyaꞌ fariseo miꞌin, anic ac̣hiꞌ dyijyity miꞌin, jämꞌ yuꞌti tsanꞌ miꞌin. Miꞌin meꞌ tsanꞌ jämꞌ jiꞌĉuti miꞌin, ĉojtyiꞌĉan qui namꞌ anic yocve miꞌin aꞌc̣his mọꞌyaꞌ miꞌin, jeñej buꞌyiꞌ yiris tyéquis fajcheꞌ chụiꞌbuiꞌ yụꞌtiñeꞌ miꞌin, ọĉan qui namꞌ aꞌc̣hiꞌ mọꞌ. Ĉojtyiꞌĉan miꞌin dyijtutiñeꞌ shiꞌadyeꞌ judyeyaꞌ ac̣hiꞌyedyeꞌ. 26Jeñej tofety miꞌin fariseo. Tashcheꞌ chum raꞌ chụiꞌbuij yụꞌtaqui ĉojtyiꞌ miꞌin, chat qui raꞌ q̂uinꞌdyem rụij bäꞌyi miꞌin.

27Fer raꞌ ñịbeꞌ cạvetiñeꞌ miꞌin jịꞌchiyacsity yụꞌtacdyeꞌ miꞌin judyeyaꞌ fariseo miꞌin, ac̣hiꞌ dyijyity miꞌin, jämꞌ yuꞌti tsanꞌ miꞌin. Miꞌin jeñej buꞌyi ruꞌdyeiꞌyas acaꞌ, anic tsanꞌ jämꞌ jiꞌĉuti, fajcheꞌ jaiꞌbaiꞌ, ọĉan qui namꞌ anic yoc, aꞌc̣hiꞌ säñitysiꞌ jin muꞌin focoijtyiꞌ in. 28Meꞌdye miꞌin chimeꞌ, jämꞌ jiꞌĉuti miꞌin meꞌ cavinac muntyiꞌ in, ĉojtyiꞌĉan qui namꞌ miꞌin anic aꞌc̣hiij miꞌin, mọꞌĉan bäꞌyi fibiꞌnacdyeꞌ miꞌin judyeyaꞌ juchaj miꞌin.

Jenꞌ raꞌ vaꞌtacdyeꞌ soꞌmacsi

29Fer raꞌ ñịbeꞌ cạvetiñeꞌ miꞌin jịꞌchiyacsity yụꞌtacdyeꞌ miꞌin judyeyaꞌ fariseo miꞌin, anic ac̣hiꞌ dyijyity miꞌin, jämꞌ yuꞌti tsanꞌ miꞌin. Miꞌin jämꞌ yụꞌtacsebity ruꞌdyeiꞌyaꞌ muꞌin jasoꞌmitity p̂eyacdyeꞌ Jenꞌ jiquej in. Chimeꞌ miꞌin sháshatucsebity dyijtucdyety mij muꞌin rụij bäꞌyityvun jiquej in. 30Yi miꞌin: "Faraj vuꞌ caꞌ tsun muꞌyaꞌ jiquej yoquiꞌdyemꞌ vóshiꞌvun jiquej u tsun ijapteyaꞌ jiquej in muꞌin Jenꞌtyiꞌ jutactyiꞌ muꞌ, a vuty jam tsun meꞌ jiquej u nọ́tacsejaꞌ muꞌin ijacsity in", meꞌ yi miꞌin. 31Ĉụiꞌsiꞌyaꞌ p̂eyacdyeꞌ miꞌin meꞌ jiꞌmeꞌti miꞌin ĉụiꞌ junꞌ chuc miꞌintyiꞌ vóshiꞌ jiquej in ijacsity jiquej in muꞌin jutactyiꞌ Jenꞌtyiꞌ jiquej muꞌ. 32¿Miꞌin adac raꞌ jịꞌcätsacsebi dyijyedyeꞌ vóshiꞌvunsiꞌ miꞌin jiquej? ¿Miꞌindye buty raꞌ quivijyeban meꞌ miꞌin yojdyemꞌ muꞌin jiquej u in?

33¡Jeñejtyity nas, meꞌtyity nash miꞌin! Jenꞌ raꞌ jam junꞌ c̣honchunac, aty tŝijĉandyety yụꞌtac miꞌin. 34Mọꞌdyes yụ raꞌ juteyeyac muntyiꞌ in muꞌin cayinactyiꞌ p̂eyacdyeꞌ in, muꞌin dyijyedyeꞌtumtyiꞌ in, judyeyaꞌ jiꞌchäyinactyiꞌ in. Miꞌin na raꞌ jam jụjjeĉunacsi, pạrej raꞌ ijabutiĉaꞌ miꞌin, pạrej raꞌ pacbutiĉaꞌ croshcheꞌ miꞌin, judyeyaꞌ pạrej raꞌ siꞌbibutiĉaꞌ vajmuꞌyadyeꞌĉan miꞌin, judyeyaꞌ pạrej raꞌ junanaj ĉụiꞌ jịjijcayibutiĉaꞌ miꞌin, meꞌ meꞌ raꞌ meꞌbutiĉaꞌ miꞌin. 35Q̂uinꞌ q̂uinꞌtyity muntyiꞌ miꞌin, miꞌincheꞌ raꞌ tŝọiꞌ vaꞌtacdyeꞌ räj ijacsity muntyiꞌ jiquej in. Anic daiꞌ muntyiꞌ in úcheꞌ ujactyiꞌ jiquej in, jam ĉụiꞌsiꞌyaꞌ juchaj ujac in, tashcheꞌ yacchutiꞌ Abelyaꞌ jiquej muꞌ rụijtyity, junꞌ quiꞌ chuc jäquiꞌvety jiquej Zacarías, Berequíastyiꞌ ạvaꞌ muꞌ. Muꞌin vóshiꞌ jiquej miꞌin muꞌyaꞌ ijate in Jenꞌsiꞌyaꞌ acaꞌ muꞌ, dyeteꞌĉan mọꞌ jiꞌcoꞌshayacdyeꞌcheꞌ. 36Yụ jéyac, räj vaꞌtacdyeꞌ muꞌindyes tsanꞌ in ijacsity jiquej in, räj raꞌ miꞌincheꞌ tŝọiꞌ mọꞌ vaꞌtacdyeꞌ q̂uinꞌtyity miꞌin.

Jesús fer táracsi Jerusalénĉantyiꞌ in

(Luc 13:34-35)

37Jesús fer dyijtucsi Jerusalénĉantyiꞌ in, yi muꞌ:

—Miꞌin Jerusalénĉantyiꞌ, anic fer dyijtuyac miꞌin. Miꞌin ijacsi jiquej muꞌin jasoꞌmitity p̂eyacdyeꞌ Jenꞌ in judyeyaꞌ farajñeptinte mijyaꞌ miꞌin muꞌin jutactyiꞌ Jenꞌtyiꞌ muꞌ. Daiꞌ quiꞌ tsanꞌ yụ mạꞌjeꞌ vajmuꞌyaꞌtyeyac yụ́yaꞌ, jeñej yiris atava vajmọꞌyaꞌjeyaquiꞌ ạvaꞌ mọꞌ pavajĉan, jam qui namꞌ junꞌ jụjjitiĉaꞌ yụ miꞌin. 38Q̂uinꞌ chat raꞌ vaꞌquetac bäꞌyedyeꞌ miꞌin. 39Yụ jéyac, aty raꞌ jam quivij cavibudyiĉaꞌ yụ miꞌin, a raꞌ tiĉunꞌtiĉaꞌyaꞌ yụ miꞌin, chat qui raꞌ q̂uinꞌdyemꞌ cavibudyiĉaꞌ yụ miꞌin jítiĉaꞌ raꞌ miꞌin: "¡Paj Jenꞌ ñịbeꞌjajiti uts jutactyiꞌ Ayoꞌtyiꞌ tsun!" Q̂uinꞌdyemꞌ raꞌ quivij cavibudyiĉaꞌ yụ miꞌin.

Currently Selected:

Mateos 23: CAS

Highlight

Copy