Josué 3
3
Nobi in muꞌ Jordán
1Nojno mạyedyeꞌ pamꞌdye Josué judyeyaꞌ räj muꞌin Israeltyiꞌ vóshiꞌ in sacti in judyeyaꞌ yạjquibanꞌ in mọꞌ dyäquedyeꞌ Sitimyaꞌ Jordánve qui jịjcaij in chat qui sinve dyäqui in jambiꞌdyemꞌ nobi in. 2Chibin mạyedyeꞌ jiyiꞌ chat qui muꞌin tashcheꞌ buꞌyity in räj socorꞌjeꞌ in mọꞌ dyäquedyeꞌ. 3Jéyacsi muntyiꞌ in:
—Cạvetiñeꞌyaꞌ miꞌin Jenꞌsiꞌ cajón yụꞌtacdyeꞌtumsiꞌ p̂eyacdyeꞌ Ayos, mọꞌ cạc muꞌinyaꞌ in cudyitityyaꞌ Jenꞌcheꞌ Levítyiꞌyaꞌ vóshiꞌ in, aty meꞌ cạvetiñeꞌyaꞌ miꞌin chat qui raꞌ miꞌin yacchuqui dyäquedyeꞌ miꞌin judyeyaꞌ mọꞌ cajón raꞌ jäquiꞌ cäc̣häꞌchutiñeꞌ miꞌin. 4Chat qui raꞌ chịj miꞌin junaꞌ chuc raꞌ jịjcaij miꞌin ĉaĉaij na jam junꞌ muꞌve jịjcaij miꞌin jiquej. Mọꞌyaꞌ raꞌ vav dyeteꞌĉan mọꞌ cajón judyeyaꞌ miꞌin, arajtac quiꞌ cien raꞌ metro vavsiꞌ tuputucdyeꞌ. Jam raꞌ c̣hẹiꞌyaꞌ buꞌyi miꞌin mọꞌ cajón —jéyacsi muꞌin tashcheꞌ buꞌyity in.
5Josué jéyacsi muntyiꞌ in:
—Jämꞌ yuꞌtiĉamꞌ Jenꞌdyes miꞌin ĉaĉaij na nojno raꞌ muꞌ Jenꞌ äjyedyes jiꞌcaviyinac yóyaꞌdyemꞌ raꞌ miꞌin u —jéyacsi Josué.
6Josué jéyacsi muꞌin cudyitity Jenꞌcheꞌ in:
—Cheꞌjevac miꞌin mọꞌ cajón yụꞌtacdyeꞌtumsiꞌ judyeyaꞌ tashi raꞌ miꞌin muntyiꞌyaꞌ —jéyacsi Josué. Meꞌdye muꞌin cheꞌjeꞌ in judyeyaꞌ jiꞌtasheꞌ in.
7Muꞌ Jenꞌ jajiti muꞌ Josué:
—Q̂uinꞌ mạyedyeꞌ yụ raꞌ tiyacchuti mujuꞌchaꞌ buꞌyi yụꞌtyeye muꞌinsiꞌyaꞌ vej in Israeltyiꞌyaꞌ vóshiꞌ in. Meꞌ raꞌ chịj muꞌin junꞌ chuc yụ penꞌdyetuye yojdyemꞌ yụ penꞌdyetute Moisésvun jiquej u. 8Mi raꞌ jéyacsi muꞌin cudyitity Jenꞌcheꞌ in cạiꞌtyiꞌ in mọꞌ cajón yụꞌtacdyeꞌtumsiꞌ: "Aty ojñiꞌve Jordánsiꞌyaꞌ venjoij miꞌin, yejĉoij raꞌ damꞌdye miꞌin junꞌ quiꞌ chuc Jordánĉan buꞌyi miꞌin, chat qui raꞌ dyäqui miꞌin", meꞌ raꞌ jéyacsi mi Josué —jajiti muꞌ Jenꞌ.
9Josué jéyacsi muꞌin Israeltyiꞌ vóshiꞌ in:
—Atsivac miꞌin judyeyaꞌ seꞌvaĉamꞌ ọij p̂eyacdyeꞌ Jenꞌsiꞌ muꞌ Ayoꞌ miꞌin. 10Q̂uinꞌ raꞌ chịj miꞌin junꞌ chuc muꞌ Jenꞌ tsạꞌtyiꞌ miꞌintum buꞌyi. Judyeyaꞌ chimeꞌ raꞌ chịj miꞌin junꞌ chuc muꞌ Jenꞌ anic raꞌ jiꞌshupcacsi muꞌin jactumtyiꞌ in paj qui ĉụiꞌdyestutiñeꞌ mọꞌ jac miꞌin. Jiꞌshupcacsi raꞌ muꞌin cananeo in, judyeyaꞌ hitita in, judyeyaꞌ heveo in, judyeyaꞌ fereseo in, judyeyaꞌ gergeseo in, judyeyaꞌ amorreo in, judyeyaꞌ jebuseo in. 11Cạvevac mọꞌ cajón yụꞌtacdyeꞌtumsiꞌ muꞌsimꞌ muꞌ Ayoꞌ taquenꞌ buꞌyitysiꞌ jaccheꞌ. Mọꞌ raꞌ tashiꞌ sitiꞌ Jordánĉan chat jäquiꞌ raꞌ miꞌin. 12Meꞌdyes qui dyimꞌtacsevac yiriꞌtac päräꞌ jiyi sonꞌ Israeltyiꞌ vóshiꞌ in. Muꞌin yiriꞌtac päräꞌ jiyi ñuruꞌtyity Israeltyiꞌ vóshiꞌ in, cäts ñuruꞌtyity yirity raꞌ sonꞌ yụꞌtac paj qui yiriꞌtac päräꞌ jiyi sonꞌ shupqui in. 13Muꞌin cudyitity Jenꞌcheꞌ cạiꞌ raꞌ in Jordánve mọꞌ cajón yụꞌtacdyeꞌtumsiꞌ muꞌsimꞌ muꞌ Ayoꞌ taquenꞌ buꞌyitysiꞌ jaccheꞌ. Aty yútyeꞌyaꞌ mọꞌ ojñiꞌ Jordánĉansiꞌ ñitscheꞌ raꞌ dyäquiꞌ mọꞌ ojñiꞌ. Mọꞌ ñitsches ojñiꞌ taccheꞌ raꞌ dụruj buꞌyiꞌ mọꞌ ojñiꞌ —jéyacsi muꞌ Josué.
14Chat qui muꞌin yacchuiꞌ mọꞌ dyäquedyeꞌ judyeyaꞌ Jordánve jịjcaij in paj qui nobi in. Muꞌin cudyitity Jenꞌcheꞌ in tashcheꞌ cạiꞌ in mọꞌ cajón yụꞌtacdyeꞌtumsiꞌ. 15Muꞌ na Jordán bä́ni ĉaĉaij na meꞌ buꞌyi räjĉan vädacdyesĉansiꞌ tupudyeꞌ. Paj tsanꞌ bä́ni venjoijyaꞌ muꞌin cudyitity Jenꞌcheꞌ cajón cạquity in aty yútyeꞌ in mọꞌ ojñiꞌ 16q̂uinꞌdyemꞌ jam miꞌiꞌ mọꞌ ojñiꞌ. Moch ñitscheꞌ dụruj buꞌyiꞌ mọꞌ ojñiꞌ yirisyaꞌ bäꞌyedyeꞌ Adán tịj mọꞌ, jam moch buꞌyiꞌ yocsiꞌ bäꞌyedyeꞌ tịj mọꞌ Saretán. Mọꞌ cashves ojñiꞌ yejĉoiꞌ miꞌiꞌ meꞌdye mọꞌ Mar Säñis, meꞌquiꞌ chañi muꞌ cojiro chat qui muꞌin muntyiꞌ in nobi quic̣henꞌ Jericóve.
17Muꞌin cudyitity Jenꞌcheꞌ cạiꞌtyiꞌ in mọꞌ cajón yụꞌtacdyeꞌtumsiꞌ chidyiꞌĉanyaꞌ cojiro jịjcaij chat dyäqui in chañescheꞌ jac runꞌquenꞌyi cojiroĉan in. Muꞌyaꞌ buꞌyi tacyaꞌ in junꞌ quiꞌ chuc räj muꞌin Israeltyiꞌ vóshiꞌ nobi in. Muꞌin chañescheꞌ jac nobi in muꞌ cojiro. Itŝiꞌ mọꞌyaꞌ ojñiꞌ muꞌĉan.
Currently Selected:
Josué 3: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
